By រាជធានីភ្នំពេញ ៖ អគារអតីតសណ្ឋាគារអង្គរមានជ័យ (មានឈ្មោះដើមនគរជ័យ) ដែលមានអាយុកាល៧៥ឆ្នាំ ឥឡូវនេះបានរលត់បាត់រូបរាងហើយ បន្ទាប់ពីក្រុមហ៊ុនម៉ៅការ ពិស្ណុការអន្តរជាតិ បានបញ្ចប់ការងារវាយកម្ទេចដោយជោគជ័យ។ គិតត្រឹមព្រឹកថ្ងៃទី០១ ខែវិច្ឆិកា ឆ្នាំ២០២៥ ការងារបានលឿនជាងផែនការរហូតដល់១២ថ្ងៃ។ ក្រុមហ៊ុននឹងបន្តសម្អាតកម្ទេចកម្ទី និងបិទការដ្ឋានទាំងស្រុងនៅថ្ងៃទី០៧ ខែវិច្ឆិកា ឆ្នាំ២០២៥។
កាលពីយប់ថ្ងៃទី៣១ ខែតុលា ឆ្នាំ២០២៥ ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ រួមជាមួយលោក ថេង សុថុល អភិបាលខណ្ឌ៧មករា បានចុះត្រួតពិនិត្យការដ្ឋានផ្ទាល់ ដើម្បីធានាសុវត្ថិភាពចរាចរណ៍ដល់សាធារណជន។ អគារដ៏ចំណាស់នេះស្ថិតនៅលើមហាវិថីព្រះមុនីវង្ស កែងមហាវិថីកម្ពុជាក្រោម ក្នុងភូមិ១ សង្កាត់មនោរម្យ ខណ្ឌ៧មករា រាជធានីភ្នំពេញ ។
គួររំលឹកផងដែរថា កាលពីព្រឹកថ្ងៃទី១៣ ខែតុលា ឆ្នាំ២០២៥ មន្ត្រីជំនាញបានចុះសិក្សាលម្អិតលើអគារអង្គរជ័យ ដែលមានអាយុកាលជាង៧០ឆ្នាំ ត្រៀមវាយកម្ទេចដើម្បីទប់ស្កាត់ហានិភ័យបាក់រលំប៉ះពាល់ដល់ប្រជាពលរដ្ឋ។ អគារកម្ពស់៦ជាន់នេះមានសភាពទ្រុឌទ្រោម និងពុកផុយជាខ្លាំង។ ក្រសួងរៀបចំដែនដី នគរូបនីយកម្ម និងសំណង់ រួមជាមួយអាជ្ញាធរពាក់ព័ន្ធ បានដាក់គ្រឿងចក្រចូលដើម្បីអនុវត្តការងារវាយកម្ទេច។
អគារសហកម្មសិទ្ធិនេះមានផ្ទៃបាតទំហំសរុប៥៩០ម៉ែត្រការ៉េ មាន១០៧បន្ទប់ ដែលបានសាងសង់តាំងពីអំឡុងឆ្នាំ១៩៥០។ មុនការងារវាយកម្ទេច ក្រសួងក៏បានជូនដំណឹងទៅអភិបាលខណ្ឌ៧មករា កាលពីថ្ងៃទី១៧ ខែកញ្ញា ឆ្នាំ២០២៥ ដោយស្នើឲ្យសម្របសម្រួលគ្រួសារចំនួន៤ ដែលមិនទាន់ព្រមទទួលយកដំណោះស្រាយ ឲ្យចាកចេញត្រឹមសប្ដាហ៍ទី៤ នៃខែកញ្ញា ឆ្នាំ២០២៥។ ក្រសួងបានឯកភាពដំឡើងតម្លៃសំណងដល់ ២ ៥០០ដុល្លារអាមេរិក ក្នុង១ម៉ែត្រការ៉េ ដែលធ្វើឲ្យតម្លៃគោលកើនដល់ ៧ ៦៩០ដុល្លារអាមេរិក ក្នុង១ម៉ែត្រការ៉េ គឺលើសពីតម្លៃទីផ្សារប្រមាណ២២%។ មុននឹងចាប់ផ្តើមវាយកម្ទេចនៅថ្ងៃទី១៨ ខែតុលា ឆ្នាំ២០២៥ ក៏មានការសម្អាតសំរាម និងធ្វើពិធីក្រុងពាលីតាមបែបសាសនាផងដែរ។
