By រាជធានីភ្នំពេញ ៖ នៅព្រឹកថ្ងៃទី ១២ ខែវិច្ឆិកា ឆ្នាំ ២០២៥ នេះ ធនាគារជាតិនៃកម្ពុជា បានរៀបចំវេទិកាទីផ្សារហិរញ្ញវត្ថុសកល ជាលើកដំបូងក្នុងប្រវត្តិសាស្ត្ររបស់ខ្លួន។ ព្រឹត្តិការណ៍ដ៏សំខាន់នេះប្រព្រឹត្តទៅក្រោមប្រធានបទ «ហានិភ័យសកល និងទស្សនវិស័យទីផ្សារ ក្នុងអំឡុងពេលនៃការផ្លាស់ប្តូរបរិបទពិភពលោក» ដែលបានប្រារព្ធឡើងក្រោមអធិបតីភាពដ៏ខ្ពង់ខ្ពស់របស់ឯកឧត្តម រ័ត្ន សុវណ្ណនរៈ ទេសាភិបាលរង ធនាគារជាតិនៃកម្ពុជា តំណាងលោកជំទាវបណ្ឌិតទេសាភិបាល នៅសណ្ឋាគារ Shangri-La Phnom Penh ។ 
កម្មវិធីដ៏មានសារៈសំខាន់នេះ រួមមានទាំងបទឧទ្ទេសនាម និងវេទិកាពិភាក្សាស៊ីជម្រៅ ដោយមានការចូលរួមពីវាគ្មិនល្បីៗមកពីធនាគារជាតិនៃកម្ពុជា ធនាគារកណ្ដាលលុចសំបួ ក្រុមហ៊ុនគ្រប់គ្រងទ្រព្យសកម្មដ៏ធំរបស់សហរដ្ឋអាមេរិក (Blackrock) និងក្រុមហ៊ុនគ្រប់គ្រងទ្រព្យសកម្មដ៏ធំរបស់បារាំង (Amundi)។ 
លើសពីនេះ ក៏មានសមាសភាពអ្នកចូលរួមសរុបប្រមាណជា ២៥០រូប មកពីក្រសួងសេដ្ឋកិច្ចនិងហិរញ្ញវត្ថុ បេឡាសន្តិសុខជាតិ វិទ្យាស្ថានស្រាវជ្រាវនិងការអភិវឌ្ឍកម្ពុជា និងគ្រឹះស្ថានធនាគារជាច្រើនទៀត។ 
គោលបំណងចម្បងនៃកម្មវិធី គឺដើម្បីចែករំលែកព័ត៌មានសំខាន់ៗអំពីស្ថានភាពទីផ្សារនិងសេដ្ឋកិច្ចសកល បញ្ហាប្រឈម ទស្សនៈវិស័យទីផ្សារសកល និងទិសដៅទីផ្សារហិរញ្ញវត្ថុនាពេលអនាគត។ 
ក្នុងវេទិកានេះ ក៏មានកិច្ចពិភាក្សាដ៏ក្ដៅគគុកអំពី “What Lies Ahead for Global Markets?” ដែលវាគ្មិនបានជជែកវែកញែកយ៉ាងផុសផុលអំពីយុទ្ធសាស្ត្រវិនិយោគដ៏មានប្រសិទ្ធភាព។ 
ព័ត៌មានទាំងអស់នេះនឹងក្លាយជាទុនដ៏មានតម្លៃសម្រាប់អ្នកចូលរួមក្នុងការធ្វើការសម្រេចចិត្តផ្នែកហិរញ្ញវត្ថុបានកាន់តែប្រសើរឡើងនាពេលអនាគត។ 
អត្ថបទសហការ
