By រដ្ឋាភិបាលអ៊ុយក្រែនក្នុងគ្រាសង្គ្រាម កំពុងរងការរង្គោះរង្គើយ៉ាងខ្លាំង បន្ទាប់ពីអាជ្ញាធរបានសម្រេចព្យួរតំណែងរដ្ឋមន្ត្រីក្រសួងយុត្តិធម៌ លោក Herman Halushchenko កាលពីថ្ងៃពុធ ទី១២ ខែវិច្ឆិកា ឆ្នាំ២០២៥។ ការព្យួរតំណែងនេះ គឺពាក់ព័ន្ធនឹងករណីពុករលួយដ៏ធំមួយក្នុងវិស័យថាមពល ដែលមានតម្លៃរហូតដល់ ១០០លានដុល្លារអាមេរិក។ រឿងអាស្រូវនេះ បានធ្វើឲ្យប៉ះពាល់យ៉ាងខ្លាំងដល់កេរ្តិ៍ឈ្មោះរបស់ទីក្រុងកៀវ ក្នុងការប្រយុទ្ធប្រឆាំងអំពើពុករលួយ និងការគាំទ្រពីបណ្ដាប្រទេសលោកខាងលិច។
ការិយាល័យជាតិប្រឆាំងអំពើពុករលួយអ៊ុយក្រែន (NABU) រួមជាមួយការិយាល័យរដ្ឋអាជ្ញាប្រឆាំងអំពើពុករលួយឯកទេស (SAPO) បានចោទប្រកាន់មនុស្សយ៉ាងតិច ៥នាក់ ក្នុងនោះរួមមានទាំងទីប្រឹក្សារបស់លោក Halushchenko ផងដែរ។ លើសពីនេះ ក៏មានការចោទប្រកាន់ទៅលើលោក Timur Mindich ដែលជាសម្ព័ន្ធមិត្តដ៏ជិតស្និទ្ធរបស់ប្រធានាធិបតី Volodymyr Zelenskyy ផងដែរ។
លោក Mindich ដែលជាសហកម្មសិទ្ធិករស្ទូឌីយោទូរទស្សន៍ដែលធ្លាប់ជួយលើកស្ទួយអាជីពរបស់លោក Zelenskyy មុនពេលលោកក្លាយជាប្រធានាធិបតី ត្រូវបានចោទប្រកាន់ថាបានបើកដំណើរការ «ការិយាល័យសម្ងាត់មួយ» នៅទីក្រុងកៀវ។ ការិយាល័យនេះត្រូវបានគេប្រើប្រាស់ដើម្បីលាងលុយខុសច្បាប់ពីក្រុមហ៊ុនម៉ៅការ ដែលធ្វើការជាមួយក្រុមហ៊ុននុយក្លេអ៊ែរគ្រប់គ្រងដោយរដ្ឋ Energoatom។ ក្រុមអ្នកស៊ើបអង្កេតបានចោទប្រកាន់ទៀតថា អ្នកផ្គត់ផ្គង់ទាំងនោះ ត្រូវបានបង្ខំឲ្យបង់ប្រាក់សំណូករហូតដល់ ១៥% ដើម្បីធានាថាកិច្ចសន្យារបស់ពួកគេនឹងត្រូវបានទូទាត់ ឬដើម្បីរក្សាឋានៈជាអ្នកផ្គត់ផ្គង់របស់ពួកគេបន្ត។
អាជ្ញាធរបានបញ្ជាក់ថា ថវិកាខុសច្បាប់ទាំងនោះត្រូវបានលាងតាមរយៈបណ្ដាញរបស់លោក Mindich ដែលលោកត្រូវបានចោទប្រកាន់ថាបានគ្រប់គ្រងដោយប្រើប្រាស់ឥទ្ធិពលនយោបាយរបស់លោក។ យោងតាម SAPO លោក Mindich «បានគ្រប់គ្រងលើការប្រមូល ការចែកចាយ និងការធ្វើឲ្យស្របច្បាប់នូវមូលនិធិដែលបានមកពីបទឧក្រិដ្ឋក្នុងវិស័យថាមពល»។ បច្ចុប្បន្ននេះ គេជឿថាលោកបានរត់គេចចេញពីប្រទេសអ៊ុយក្រែនបាត់ទៅហើយ។ 
សម្រាប់លោក Halushchenko វិញ ដែលធ្លាប់កាន់តំណែងជារដ្ឋមន្ត្រីក្រសួងថាមពល មុនពេលក្លាយជារដ្ឋមន្ត្រីក្រសួងយុត្តិធម៌ ត្រូវបានអាជ្ញាធរឆែកឆេរផ្ទះ និងការិយាល័យ។ បន្ទាប់មក លោកស្រីនាយករដ្ឋមន្ត្រី Yulia Svyrydenko បានសម្រេចព្យួរតំណែងរបស់លោកជាបណ្ដោះអាសន្ន ដើម្បីរង់ចាំលទ្ធផលនៃការស៊ើបអង្កេត។
អ្នកវិភាគ លោក Volodymyr Fesenko បានព្រមានតាមរយៈបទសម្ភាសន៍ជាមួយសារព័ត៌មាន Liga.net ថា ករណីនេះប្រៀបដូចជា «គ្រាប់បែកពេលវេលា» សម្រាប់លោក Zelenskyy។ រឿងអាស្រូវនេះបានវាយប្រហារចំភាពជឿជាក់លើការសន្យាប្រឆាំងអំពើពុករលួយ និងការរួបរួមគ្នាក្នុងសម័យសង្គ្រាមរបស់រដ្ឋាភិបាលលោក។
បណ្ដាសម្ព័ន្ធមិត្តលោកខាងលិច ក៏កំពុងចាប់អារម្មណ៍យ៉ាងខ្លាំងផងដែរ។ ទាំងទីក្រុងព្រុចសែល និងវ៉ាស៊ីនតោន កំពុងតាមដានករណីនេះយ៉ាងយកចិត្តទុកដាក់។ មន្ត្រីសហភាពអឺរ៉ុបបានភ្ជាប់វឌ្ឍនភាពក្នុងការប្រយុទ្ធប្រឆាំងអំពើពុករលួយរបស់អ៊ុយក្រែន ទៅនឹងការខិតខំប្រឹងប្រែងដើម្បីចូលជាសមាជិកសហភាពអឺរ៉ុប ក៏ដូចជាជំនួយហិរញ្ញវត្ថុបន្តបន្ទាប់ផងដែរ។
ករណីនេះកាន់តែមានភាពរសើបថែមទៀត ដោយសារវាផ្តោតលើវិស័យថាមពលរបស់អ៊ុយក្រែន ដែលជាសមរភូមិដ៏សំខាន់ក្នុងសង្គ្រាមជាមួយរុស្ស៊ី ហើយក៏ជាគោលដៅវាយប្រហារញឹកញាប់របស់ទីក្រុងម៉ូស្គូផងដែរ។
កាលពីមុន សភាអ៊ុយក្រែនបានស្ដារអំណាចពេញលេញដល់ NABU និង SAPO ឡើងវិញ បន្ទាប់ពីមានការតវ៉ាជាសាធារណៈប្រឆាំងនឹងកិច្ចខិតខំប្រឹងប្រែងដើម្បីដាក់ស្ថាប័នទាំងនោះក្រោមការគ្រប់គ្រងរបស់រដ្ឋាភិបាល។ ជំហាននោះបានបង្កឲ្យមានការព្រួយបារម្ភក្នុងចំណោមដៃគូលោកខាងលិច។
មន្ត្រីនៅទីក្រុងកៀវបានលើកឡើងថា ការស៊ើបអង្កេតចុងក្រោយនេះបានបង្ហាញពីការប្ដេជ្ញាចិត្តរបស់អ៊ុយក្រែនចំពោះតម្លាភាព ទោះបីជាស្ថិតក្នុងសម័យសង្គ្រាមក៏ដោយ។ ប៉ុន្តែអ្នកវិភាគបានព្រមានថា សញ្ញានៃការជ្រៀតជ្រែកនយោបាយ ឬការបន្ធូរបន្ថយណាមួយ អាចបំផ្លាញទំនុកចិត្តពីលោកខាងលិច ខណៈដែលអ៊ុយក្រែនកំពុងស្វែងរកការរក្សាការគាំទ្រផ្នែកយោធា និងសេដ្ឋកិច្ចជាបន្ត។
