By ជុំវិញសង្គ្រាមនៅអ៊ុយក្រែន ក្រុមប្រទេសឧស្សាហកម្មធំៗ G7 បានបង្ហាញជំហរផ្លាស់ប្ដូរថ្មី ដោយវាយតម្លៃថា «បទឈប់បាញ់គ្នាគឺចាំបាច់ជាបន្ទាន់បំផុត» បន្ទាប់ពីជម្លោះអូសបន្លាយជាង ៣ ឆ្នាំ។ ការប្ដូរជំហរនេះកើតឡើងខណៈដែលរដ្ឋមន្ត្រីការបរទេសអ៊ុយក្រែនបានស្នើសុំជំនួយជាបន្ទាន់ពី G7 ដើម្បីទប់ទល់នឹងការវាយប្រហារតាមអាកាសរបស់រុស្ស៊ី ដែលបណ្ដាលឲ្យប្រទេសអ៊ុយក្រែនដាច់ភ្លើងទូទាំងប្រទេស នៅពេលរដូវរងាចូលមកដល់។
ក្នុងសេចក្ដីថ្លែងការណ៍ចុងក្រោយបន្ទាប់ពីកិច្ចប្រជុំរយៈពេលពីរថ្ងៃនៅតំបន់ទឹកធ្លាក់ Niagara ប្រទេសកាណាដា កាលពីថ្ងៃទី ១១ ខែវិច្ឆិកា រដ្ឋមន្ត្រីការបរទេសនៃបណ្ដាប្រទេសG7 រួមមាន អាមេរិក បារាំង កាណាដា អាល្លឺម៉ង់ អ៊ីតាលី និងជប៉ុន បានបញ្ជាក់ជាថ្មីថា «បទឈប់បាញ់គ្នាគឺចាំបាច់បន្ទាន់បំផុត»។ ពួកគេបានសង្កត់ធ្ងន់ថា ព្រំដែនអន្តរជាតិមិនត្រូវបានកែប្រែដោយកម្លាំងនោះឡើយ ហើយបានសន្យាបន្តគាំទ្រយ៉ាងដាច់អហង្ការដល់អ៊ុយក្រែន និងអធិបតេយ្យភាពរបស់ខ្លួន។
ក្នុងឱកាសនោះ លោក Andriy Yermak រដ្ឋមន្ត្រីការបរទេសអ៊ុយក្រែន ដែលបានចូលរួមដែរនោះ បានថ្លែងថា អ៊ុយក្រែនចង់បញ្ចប់សង្គ្រាមឲ្យបានឆាប់តាមដែលអាចធ្វើទៅបាន។ លោកបានអំពាវនាវដល់ G7 ឲ្យបន្តវិនិយោគលើការផលិតមីស៊ីល និងដ្រូន ព្រមទាំងជួយការពារដែនអាកាសអ៊ុយក្រែន។ លោកបានបន្ថែមថា អ៊ុយក្រែនត្រូវជម្នះរដូវរងាដ៏លំបាក និងតឹងតែងបំផុត ដូច្នេះហើយទើបពួកគេត្រូវការជំនួយទ្រទ្រង់ពីសំណាក់បណ្ដាដៃគូរបស់ខ្លួន។ ជាក់ស្តែង កាលពីថ្ងៃទី ១២ ខែវិច្ឆិកា កាណាដាបានប្រកាសដាក់ទណ្ឌកម្មថ្មីប្រឆាំងរុស្ស៊ី ហើយមួយថ្ងៃមុននោះ ចក្រភពអង់គ្លេសក៏បានសន្យាផ្ដល់ហិរញ្ញវត្ថុជួយដល់ហេដ្ឋារចនាសម្ព័ន្ធថាមពលរបស់អ៊ុយក្រែនផងដែរ។ លោករដ្ឋមន្ត្រីបានលើកឡើងថា ប្រធានាធិបតីរុស្ស៊ី លោក Vladimir Putin តែងតែស្រមៃថានឹងអាចឈ្នះសង្គ្រាមជានិច្ច។ ចំណែករដ្ឋមន្ត្រីការបរទេសអាមេរិក លោក Marco Rubio វិញ មិនទាន់បានប្រកាសពីគំនិតផ្ដួចផ្ដើមថ្មីរបស់អាមេរិកនៅឡើយទេ ប៉ុន្តែលោកបានថ្លែងតាមរយៈបណ្ដាញសង្គមថា កិច្ចប្រជុំលើកនេះអាចនឹងពិនិត្យមើលមធ្យោបាយនានាដើម្បីពង្រឹងកិច្ចការពាររបស់អ៊ុយក្រែន និងបញ្ចប់ជម្លោះបង្ហូរឈាមនេះ។ លោកបានបន្តថា សហរដ្ឋអាមេរិកនៅតែប្ដេជ្ញាចិត្តធ្វើការជាមួយបណ្ដាដៃគូ ដើម្បីលើកទឹកចិត្តរុស្ស៊ីឲ្យបន្តការខិតខំប្រឹងប្រែងខាងការទូត និងចូលរួមដោះស្រាយជម្លោះជាមួយអ៊ុយក្រែនដើម្បីសន្តិភាពដ៏ស្ថិតស្ថេរមួយ។
G7 ប្តូរជំហរ៖ «បទឈប់បាញ់បន្ទាន់បំផុត» ក្រោយអ៊ុយក្រែនស្នើសុំជំនួយទប់ទល់រុស្ស៊ី
