By ក្រសួងសុខាភិបាលវៀតណាម បានប្រកាសអនុម័តជាផ្លូវការនូវថ្នាំព្យាបាលជំងឺមហារីកថ្មីមួយឈ្មោះ «Pembroria» ដែលផលិតដោយប្រទេសរុស្ស៊ី។ ថ្នាំនេះផ្ទុកនូវសារធាតុសកម្ម Pembrolizumab ដែលនឹងក្លាយជាជម្រើសព្យាបាលដ៏សំខាន់មួយទៀតសម្រាប់អ្នកជំងឺមហារីកក្នុងប្រទេសវៀតណាម។ ព័ត៌មាននេះត្រូវបានចុះផ្សាយដោយសារព័ត៌មាន VnExpress កាលពីថ្ងៃទី១២ ខែវិច្ឆិកា ឆ្នាំ២០២៥។
យោងតាមរដ្ឋបាលឱសថចំណុះក្រសួងសុខាភិបាលវៀតណាម ថ្នាំ Pembroria គឺជាវ៉ាក់សាំង និងផលិតផលជីវសាស្ត្រមួយក្នុងចំណោម១៤មុខ ដែលទទួលបានអាជ្ញាបណ្ណចរាចរណ៍នៅចុងខែតុលាកន្លងទៅ។ ថ្នាំ Pembroria ត្រូវបានផលិតដោយក្រុមហ៊ុន PK-137 របស់រុស្ស៊ី និងចុះបញ្ជីដោយរោងចក្រមួយនៅអារ៉ាប់រួម។ វាមានផ្ទុកសារធាតុសកម្ម Pembrolizumab ចំនួន ១០០ មីលីក្រាម ក្នុងចំណុះ ៤ មីលីលីត្រ សម្រាប់ចាក់តាមសរសៃឈាមវ៉ែន និងមានអាយុកាលប្រើប្រាស់ ២៤ ខែ។
Pembroria មានប្រសិទ្ធភាពខ្ពស់ក្នុងការប្រយុទ្ធប្រឆាំងនឹងជំងឺមហារីកជាច្រើនប្រភេទ រួមមាន មហារីកសួត មហារីកស្បែក មហារីកពោះវៀនធំ មហារីកមាត់ស្បូន មហារីកតម្រងនោម និងមហារីកសុដន់។ ការអនុម័តថ្នាំនេះបង្ហាញពីការប្តេជ្ញាចិត្តរបស់អាជ្ញាធរសុខាភិបាលវៀតណាម ក្នុងការផ្តល់ការព្យាបាលប្រព័ន្ធភាពស៊ាំទំនើបៗជូនដល់ប្រជាពលរដ្ឋរបស់ខ្លួន។ ថ្នាំនេះគឺជាអង់ទីគ័រម៉ូណូក្លូណាល់ (Monoclonal) ដែលត្រូវបានបង្កើតឡើងដោយផ្អែកលើថ្នាំដើមរបស់ក្រុមហ៊ុនឱសថអាមេរិក MSD (Merck & Co.) ដែលបានផ្តល់អាជ្ញាបណ្ណទូទាំងពិភពលោកតាំងពីឆ្នាំ២០១៧។
លោកសាស្ត្រាចារ្យ Le Van Quang នាយកមន្ទីរពេទ្យ K ដែលជាមជ្ឈមណ្ឌលព្យាបាលជំងឺមហារីកឈានមុខគេនៅទីក្រុងហាណូយ បានបញ្ជាក់ថា មន្ទីរពេទ្យរបស់លោកនឹងចាប់ផ្តើមប្រើប្រាស់ថ្នាំ Pembroria ឆាប់ៗនេះ។ ទោះជាយ៉ាងណា ថ្នាំនេះមិនទាន់ត្រូវបានបញ្ចូលក្នុងប្រព័ន្ធធានារ៉ាប់រងសុខភាពនៅឡើយទេ។ ដបថ្នាំនីមួយៗមានតម្លៃប្រហែល ១៨ លានដុង (ប្រហែល ៧០០ ដុល្លារអាមេរិក) ហើយអ្នកជំងឺជាធម្មតាត្រូវចាក់ ២ ដបក្នុងមួយដំណាក់កាលនៃការព្យាបាល។
បច្ចុប្បន្ន វៀតណាមមានថ្នាំព្យាបាលជំងឺមហារីកសរុប ៩៩ ប្រភេទកំពុងដាក់ឱ្យប្រើប្រាស់។ ការអនុម័តថ្មីៗនេះក៏រួមបញ្ចូលទាំងវ៉ាក់សាំង និងផលិតផលជីវសាស្ត្រសម្រាប់ជំងឺផ្សេងៗទៀតដូចជា ជំងឺដាច់សរសៃឈាមខួរក្បាល ជំងឺលុយពុស (Lupus) ជំងឺពុកឆ្អឹង ជំងឺស្បែក ជំងឺរលាកសន្លាក់រ៉ាំរ៉ៃ ជំងឺរលាកសន្លាក់ឆ្អឹង ជំងឺពាក់ព័ន្ធនឹងឈាម និងជំងឺក្រិនសរសៃឈាម។ ការអនុម័តនេះធ្វើឡើងបន្ទាប់ពីកិច្ចប្រជុំសុខភាព «វៀតណាម-រុស្ស៊ី» កាលពីខែកញ្ញា ដែលភាគីទាំងពីរបានពិភាក្សាអំពីការពង្រីកកិច្ចសហប្រតិបត្តិការស្រាវជ្រាវវ៉ាក់សាំងមហារីក និងការផ្ទេរបច្ចេកវិទ្យា។
