By ភ្នំពេញ៖ ស្ថានការណ៍តាមបណ្តោយព្រំដែនជម្លោះកម្ពុជា–ថៃ កំពុងឡើងកម្ដៅសាជាថ្មី បន្ទាប់ពីមានករណីផ្ទុះគ្រាប់មីនមួយបានធ្វើឲ្យទាហានថៃម្នាក់រងរបួសធ្ងន់កាលពីថ្ងៃទី១០ ខែវិច្ឆិកា កន្លងទៅ។ ជុំវិញឧបទ្ទវហេតុនេះ ប្រទេសថៃបានប្រកាសថា ក្រុមអ្នកសង្កេតការណ៍អាស៊ាននឹងចុះស៊ើបអង្កេតនៅនឹងកន្លែងកើតហេតុនៅថ្ងៃទី១៤ ខែវិច្ឆិកា ឆ្នាំ២០២៥។ ហេតុការណ៍នេះកំពុងគំរាមកំហែងយ៉ាងធ្ងន់ធ្ងរដល់កិច្ចព្រមព្រៀងឈប់បាញ់ដែលសម្របសម្រួលដោយសហរដ្ឋអាមេរិក។
ក្រោយការផ្ទុះមីននេះ ថៃបានព្យួរកិច្ចព្រមព្រៀងឈប់បាញ់ ហើយបានទាមទារឲ្យកម្ពុជាសុំទោស ដោយចោទប្រកាន់ថា កម្ពុជាបានដាក់គ្រាប់មីនប្រភេទ PMN-2 ថ្មីនៅតំបន់ទល់មុខខេត្តព្រះវិហាររបស់កម្ពុជា។ យ៉ាងណា កម្ពុជាបានបដិសេធដាច់អហង្ការចំពោះការចោទប្រកាន់នេះ និងបានទទូចឲ្យភាគីថៃប្រកាន់ខ្ជាប់នូវកិច្ចព្រមព្រៀងឈប់បាញ់ដែលបានចុះហត្ថលេខានៅប្រទេសម៉ាឡេស៊ីកាលពីចុងខែតុលា។ ក្រោមកិច្ចព្រមព្រៀងនោះ អាស៊ានបានបង្កើតក្រុមអ្នកសង្កេតការណ៍យោធា ដើម្បីតាមដានភាគីទាំងពីរ និងជួយកាត់បន្ថយភាពតានតឹង។
ទាក់ទងនឹងបញ្ហានេះ កាលពីថ្ងៃទី១៣ ខែវិច្ឆិកា រដ្ឋមន្ត្រីការបរទេសម៉ាឡេស៊ី លោក Mohamad Hasan បានមានប្រសាសន៍តាមរយៈទូរសព្ទជាមួយរដ្ឋមន្ត្រីការបរទេសថៃថា៖ «ក្តីសង្ឃឹមរបស់ខ្ញុំគឺចង់ឲ្យភាគីទាំងពីរស្ងប់ស្ងាត់ និងបន្តកិច្ចចរចាសន្តិភាព»។
យោងតាមការចុះផ្សាយរបស់ទីភ្នាក់ងារព័ត៌មាន Reuters ក្រុមអ្នកសង្កេតការណ៍មួយក្រុមទៀត ក៏ត្រូវបានគ្រោងនឹងចុះទៅតំបន់ជម្លោះដែលមានការបាញ់ប្រហារផ្ទុះឡើងកាលពីថ្ងៃទី១១ ខែវិច្ឆិកាផងដែរ។ ក្នុងហេតុការណ៍នោះ យ៉ាងហោចណាស់ជនជាតិខ្មែរម្នាក់ត្រូវបានសម្លាប់ និង៣នាក់ផ្សេងទៀតរងរបួស។
គួររំលឹកផងដែរថា ភាពតានតឹងរវាងប្រទេសជិតខាងទាំងពីរនេះ បានឈានដល់ការប្រយុទ្ធគ្នារយៈពេល ៥ថ្ងៃកាលពីខែកក្កដា ដែលបណ្តាលឲ្យមនុស្សយ៉ាងហោចណាស់ ៤៨នាក់ស្លាប់ និងបង្ខំឲ្យមនុស្សប្រហែល ៣០០ ០០០នាក់ភៀសខ្លួន មុនពេលឈានដល់កិច្ចព្រមព្រៀងឈប់បាញ់តាមរយៈកិច្ចចរចាដែលដឹកនាំដោយប្រធានាធិបតីអាមេរិក លោក ដូណាល់ ត្រាំ និងនាយករដ្ឋមន្ត្រីម៉ាឡេស៊ី លោក Anwar Ibrahim។
ករណីផ្ទុះគ្រាប់មីនបានក្លាយជាកត្តាបង្កដ៏សំខាន់មួយនៃជម្លោះនាពេលថ្មីៗនេះ។ ចាប់តាំងពីថ្ងៃទី១៦ ខែកក្កដា មក ទាហានថៃយ៉ាងហោចណាស់ ៧នាក់បានរងរបួសធ្ងន់ដោយសារគ្រាប់មីនតាមព្រំដែន។ កម្ពុជា និងថៃ មានបញ្ហាព្រំដែនដីគោកប្រវែង ៨១៧គីឡូម៉ែត្រអស់រយៈពេលជាងមួយសតវត្សរ៍មកហើយ ដែលព្រំដែននេះត្រូវបានគូសដំបូងដោយប្រទេសបារាំងក្នុងឆ្នាំ១៩០៧ នៅពេលដែលកម្ពុជាស្ថិតនៅក្រោមអាណានិគម។
