វៀតណាម៖ មន្ត្រី២រូបជាប់គុកជាង ៣ឆ្នាំ រឿងល្បែងស៊ីសងជាង ១០០លានដុល្លារ!

វៀតណាម៖ តុលាការវៀតណាមបានសម្រេចផ្តន្ទាទោសមន្ត្រីមូលដ្ឋានចំនួន ២រូប ឱ្យជាប់ពន្ធនាគារជាង ៣ឆ្នាំ ពាក់ព័ន្ធករណីលេងល្បែងស៊ីសងខុសច្បាប់ ដែលមានទឹកប្រាក់ទំហំសរុបរហូតដល់ ១០៦លានដុល្លារឯណោះ។ នេះបើយោងតាមការចុះផ្សាយរបស់បណ្តាញសារព័ត៌មាន The Strait Times កាលពីថ្ងៃទី១៣ ខែវិច្ឆិកា។

នៅក្នុងសំណុំរឿងភ្នាល់ល្បែងស៊ីសងដ៏ធំមួយនេះ ក៏មានជាប់ពាក់ព័ន្ធជាមួយក្រុមអ្នកជំនួញ អតីតមន្ត្រីវៀតណាម និងក្រុមអ្នកលេងល្បែងកម្សាន្តជាច្រើននាក់ផ្សេងទៀតផងដែរ ដែលមានចំនួនសរុប ១៤០នាក់។

គួររំលឹកផងដែរថា ការលេងល្បែងស៊ីសងក្នុងប្រទេសវៀតណាមគឺជាអំពើខុសច្បាប់ ប៉ុន្តែអាជ្ញាធរវៀតណាមបានអនុញ្ញាតឱ្យមានកាស៊ីណូស្របច្បាប់មួយនៅក្នុងសណ្ឋាគារលំដាប់ផ្កាយ៥ ឈ្មោះ Pullman ដែលកាស៊ីណូនេះអនុញ្ញាតឱ្យតែជនបរទេសចូលលេងកម្សាន្តតែប៉ុណ្ណោះ។ យ៉ាងណាមិញ មន្ត្រីមូលដ្ឋានវៀតណាមទាំងពីររូបក្នុងសំណុំរឿងខាងលើ បានបន្លំប្រើប្រាស់កាតសមាជិកក្លែងក្លាយក្នុងនាមជាជនបរទេស ដើម្បីអាចចូលទៅលេងល្បែងស៊ីសងនៅក្នុងកាស៊ីណូខាងលើនេះ។

ប្រភពខាងលើបានបន្តទៀតថា មន្ត្រីមូលដ្ឋានវៀតណាមទាំង ២រូបនោះ រួមមាន លោក Ho Dai Dung ដែលបានភ្នាល់ល្បែងចំនួន ៩៥ដៃ មានទឹកប្រាក់ភ្នាល់សរុបជាង ៧លានដុល្លារ និងត្រូវបានកាត់ទោសឱ្យជាប់ពន្ធនាគាររយៈពេល ៣ឆ្នាំកន្លះ។ ចំណែកឯមន្ត្រីម្នាក់ទៀតឈ្មោះ Ngo Ngoc Duc បានភ្នាល់ល្បែងក្នុងទំហំទឹកប្រាក់ ៤,២លានដុល្លារ និងត្រូវកាត់ទោសឱ្យជាប់ពន្ធនាគាររយៈពេល ៣ឆ្នាំ៕

អត្ថបទ៖ ភក្តី
ប្រភព៖ The Strait Times