By រាជធានីភ្នំពេញ ៖ អាជ្ញាធររាជធានីភ្នំពេញបានសម្តែងការកោតសរសើរចំពោះកិច្ចខិតខំប្រឹងប្រែងរបស់អាជ្ញាធរ និងកម្លាំងមានសមត្ថកិច្ចក្នុងការកាត់បន្ថយបទល្មើសផ្សេងៗ។ ទន្ទឹមនឹងនេះ អាជ្ញាធរក៏បានអំពាវនាវដល់បងប្អូនប្រជាពលរដ្ឋទាំងអស់ឲ្យបង្កើនការប្រុងប្រយ័ត្នខ្ពស់ចំពោះគ្រោះថ្នាក់អគ្គិភ័យ ដែលបានកើនឡើងគួរឲ្យកត់សម្គាល់នាពេលថ្មីៗនេះ ជាពិសេសក្នុងខែតុលាកន្លងទៅ។
ការកោតសរសើរ និងការអំពាវនាវនេះបានធ្វើឡើងក្នុងកិច្ចប្រជុំសាមញ្ញលើកទី១៨ របស់ក្រុមប្រឹក្សារាជធានីភ្នំពេញ អាណត្តិទី៤ កាលពីព្រឹកថ្ងៃទី១២ ខែវិច្ឆិកា ឆ្នាំ២០២៥ នៅសាលារាជធានីភ្នំពេញ ក្រោមអធិបតីភាពឯកឧត្ដម ជួប ខុន សមាជិកក្រុមប្រឹក្សា និងលោក ហួត ហៃ អភិបាលរងរាជធានីភ្នំពេញ។ ការអំពាវនាវឲ្យប្រជាពលរដ្ឋមានការប្រុងប្រយ័ត្នពីអគ្គិភ័យនេះ គឺដោយសារតែករណីអគ្គិភ័យបានកើតឡើងជាបន្តបន្ទាប់ និងបានបណ្ដាលឲ្យមានសោកនាដកម្មបាត់បង់អាយុជីវិតទៀតផង។
ជាក់ស្ដែង គេនៅចាំបានពីសោកនាដកម្មថ្មីៗបំផុតដែលផ្ទះចំនួន៣ល្វែងនៅសង្កាត់ទឹកល្អក់ទី៣ ខណ្ឌទួលគោក ត្រូវអគ្គិភ័យឆាបឆេះបណ្ដាលឲ្យម្ដាយនិងកូនស្រីម្នាក់បានបាត់បង់ជីវិត និងមន្ត្រីពន្លត់អគ្គិភ័យចំនួន៣នាក់បានរងរបួសផងដែរ។ ហេតុការណ៍ដ៏រន្ធត់នេះបានកើតឡើងកាលពីវេលាម៉ោងប្រមាណ១១យប់ថ្ងៃទី២៥ ខែតុលា ឆ្នាំ២០២៥ នៅផ្ទះលេខ៩៣A ផ្លូវលេខ២៤៧ ភូមិ១ សង្កាត់ទឹកល្អក់ទី៣ ខណ្ឌទួលគោក។
នគរបាលការិយាល័យបង្ការ ពន្លត់អគ្គិភ័យ និងសង្គ្រោះរាជធានីភ្នំពេញ បានឲ្យដឹងថា ម្ចាស់ផ្ទះដែលរងគ្រោះឈ្មោះ គឹម សៀវឡុង ភេទប្រុស អាយុ៥៤ឆ្នាំ មុខរបរទិញអេតចាយ ហើយផ្ទះជាប្រភេទសំណង់បេតុងមានទំហំ៤ម៉ែត្រគុណ១៤ម៉ែត្រ។ អគ្គិភ័យនេះបានបំផ្លាញផ្ទះថ្មទំហំ៤ម៉ែត្រx១៤ម៉ែត្រចំនួន៣ល្វែង ម៉ូតូចំនួន៤គ្រឿង និងគ្រឿងសម្ភារៈអេតចាយជាច្រើនត្រូវភ្លើងឆេះអស់ទាំងស្រុង។ ក្នុងប្រតិបត្តិការអន្តរាគមន៍ពន្លត់អគ្គិភ័យនេះ សមត្ថកិច្ចបានប្រើប្រាស់រថយន្តពន្លត់អគ្គិភ័យរបស់ការិយាល័យចំនួន១៨គ្រឿង ប្រើប្រាស់ទឹកអស់ចំនួន៣៦រថយន្ត រថយន្តជំនួយទីក្រុងជ្រោយចង្វាចំនួន៣គ្រឿង ប្រើប្រាស់ទឹកអស់២រថយន្ត និងរថយន្តពន្លត់អគ្គិភ័យរបស់បុរីប៉េង ហួត ចំនួន២គ្រឿង ប្រើប្រាស់ទឹកអស់១រថយន្ត។ ភ្លើងបានរលត់ទៅវិញនៅវេលាម៉ោងប្រមាណ១រំលងអធ្រាត្រឈានចូលថ្ងៃទី២៦ ខែតុលា។
ក្នុងករណីដាច់ដោយឡែកមួយទៀត បន្ទប់ដាក់ម៉ូតូនៅផ្ទះសំណាក់មួយកន្លែងបានត្រូវភ្លើងឆេះបណ្ដាលឲ្យស្ត្រីម្នាក់នៅជាន់ទី៣ ភិតភ័យក៏លោតចុះមកក្រោមស្លាប់ ហើយប្តីរបួសធ្ងន់។ មុននេះដែរ ផ្ទះជួសជុលម៉ាស៊ីនត្រជាក់មួយកន្លែងក៏បានត្រូវអគ្គិភ័យឆាបឆេះសន្ធោសន្ធៅ បណ្ដាលឲ្យស្លាប់មួយគ្រួសារដែលមានសមាជិក៤នាក់ផងដែរ។ សោកនាដកម្មនេះបានកើតឡើងនៅវេលាម៉ោងប្រមាណ៥និង៥នាទីព្រឹកព្រលឹមថ្ងៃទី១៣ ខែមិថុនា ឆ្នាំ២០២៥ នៅផ្លូវបេតុង ភូមិជ្រៃកោង សង្កាត់ចោមចៅទី២ ខណ្ឌពោធិ៍សែនជ័យ។
លោកវរសេនីយ៍ឯក ព្រហ្ម យ៉ន នាយការិយាល័យនគរបាលបង្ការ ពន្លត់អគ្គិភ័យ និងសង្គ្រោះរាជធានីភ្នំពេញ បានឲ្យដឹងថា ក្នុងប្រតិបត្តិការអន្តរាគមន៍ កម្លាំងសមត្ថកិច្ចបានប្រើប្រាស់រថយន្តពន្លត់អគ្គិភ័យចំនួន១១គ្រឿង ក្នុងនោះរថយន្តរបស់ការិយាល័យចំនួន៥គ្រឿង ប្រើប្រាស់ទឹកអស់៤រថយន្ត និងរថយន្តជំនួយមកពីកងពលតូចលេខ៧០ ចំនួន៦គ្រឿង ប្រើប្រាស់ទឹកអស់១រថយន្ត។ ចំពោះប្រភេទសំណង់ខាងលើនេះ ដែលជាប្រភេទថ្មក្រោម និងខាងលើស័ង្កសី ទំហំ៥ម៉ែត្រx២០ម៉ែត្រ ត្រូវឆេះខូចខាតអស់ទាំងស្រុង តែពុំបណ្តាលឲ្យឆេះរាលដាលដល់ផ្ទះក្បែរខាងឡើយ។ យោងតាមការស្រាវជ្រាវរកឃើញថា មូលហេតុបណ្ដាលមកពីឆ្លងចរន្តអគ្គិសនីបង្ករជាអគ្គិភ័យ។
លោកឧត្តមសេនីយ៍ទោ សឿ រិទ្ធី អនុប្រធាន និងជាអ្នកនាំពាក្យនៃនាយកដ្ឋាននគរបាលបង្ការ ពន្លត់អគ្គិភ័យ និងសង្គ្រោះនៃអគ្គស្នងការដ្ឋាននគរបាលជាតិ បានសម្តែងការបារម្ភយ៉ាងខ្លាំងពីការកើនឡើងករណីអគ្គិភ័យនៅដើមឆ្នាំ២០២៥នេះ។ ត្រឹមតែរយៈពេល១ខែ១០ថ្ងៃ អគ្គិភ័យបានកើតឡើងច្រើនលើសលប់ បើធៀបនឹងរយៈពេលដូចគ្នាក្នុងឆ្នាំ២០២៤ ដែលបណ្ដាលឲ្យបាត់បង់ជីវិតមនុស្ស៩នាក់ និងបំផ្លិចបំផ្លាញទ្រព្យសម្បត្តិប្រជាពលរដ្ឋអស់ជាច្រើន។
លោកឧត្តមសេនីយ៍ឯក នេត វន្ថា ប្រធាននាយកដ្ឋាននគរបាលបង្ការ ពន្លត់អគ្គិភ័យ និងសង្គ្រោះនៃអគ្គស្នងការដ្ឋាននគរបាលជាតិ ក៏បានថ្លែងដែរថា អគ្គិភ័យនៅដើមឆ្នាំ២០២៥ កើតមានច្រើនលើរោងចក្រ និងក្លិបកម្សាន្តដែលពុំមានប្រព័ន្ធបង្ការអគ្គិភ័យឲ្យបានត្រឹមត្រូវ។ ក្នុងឆមាសទី១ ឆ្នាំ២០២៥ អគ្គិភ័យបានកើតឡើងចំនួន២៦៦លើក ពោលគឺថយចុះចំនួន៣១លើក បើធៀបនឹងរយៈពេលដូចគ្នាក្នុងឆ្នាំ២០២៤ ប៉ុន្តែចំនួនអ្នកស្លាប់ដោយសារអគ្គិភ័យមានចំនួន១៤នាក់ ពោលគឺកើនឡើងចំនួន៧នាក់។ រីឯចំនួនផ្ទះនិងតូបដែលបានឆេះមានការថយចុះច្រើន។
