By ទីក្រុងហូជីមិញ វៀតណាម៖ នៅថ្ងៃទី១៥ ខែវិច្ឆិកា ឆ្នាំ២០២៥ ខាងមុខនេះ គណៈប្រតិភូជាន់ខ្ពស់នៃក្រសួងមហាផ្ទៃកម្ពុជា ដឹកនាំដោយលោកបណ្ឌិត ទូច វិសាលសុខ រដ្ឋលេខាធិការក្រសួង បានអញ្ជើញចូលរួមពិធីដ៏មហោឡារិកប្រារព្ធខួបលើកទី៧០ នៃការបង្កើតសាកលវិទ្យាល័យ ណងឡាំ (Nong Lam University) ដ៏ល្បីល្បាញ ស្ថិតនៅទីក្រុងហូជីមិញ សាធារណរដ្ឋសង្គមនិយមវៀតណាម។ 
ក្នុងឱកាសដ៏សំខាន់នេះដែរ គណៈប្រតិភូកម្ពុជា ក៏បានឆ្លៀតជួបពិភាក្សាការងារយ៉ាងស៊ីជម្រៅ អំពីការពង្រឹងកិច្ចសហប្រតិបត្តិការដ៏រឹងមាំ រវាងក្រសួងមហាផ្ទៃ នៃព្រះរាជាណាចក្រកម្ពុជា ជាមួយសាកលវិទ្យាល័យ ណងឡាំ និងវិទ្យាស្ថានថ្នាក់ក្រោមជាតិសម្រាប់កិច្ចការរដ្ឋបាល និងគ្រប់គ្រងសាធារណៈ (Sub-National Institute for Administration and Public Management) របស់វៀតណាម។ 
គោលបំណងចម្បងនៃជំនួបនេះ គឺផ្តោតលើការបណ្តុះបណ្តាល និងពង្រឹងសមត្ថភាពមន្ត្រីក្រសួងមហាផ្ទៃកម្ពុជា ក៏ដូចជាការរៀបចំសិក្ខាសាលារួមគ្នា ដើម្បីផ្លាស់ប្តូរបទពិសោធល្អៗលើកំណែទម្រង់ស្ថាប័នទាំងថ្នាក់ជាតិ និងថ្នាក់ក្រោមជាតិ ដែលសាធារណរដ្ឋសង្គមនិយមវៀតណាម បានអនុវត្តដោយជោគជ័យនាពេលកន្លងមក។ 
ជំនួបពិភាក្សានេះ រំពឹងថានឹងរួមចំណែកយ៉ាងសំខាន់ ក្នុងការលើកកម្ពស់គុណភាពធនធានមនុស្ស និងប្រសិទ្ធភាពនៃការគ្រប់គ្រងរដ្ឋបាលសាធារណៈនៅកម្ពុជា ឲ្យកាន់តែរីកចម្រើនស្របតាមការវិវត្តន៍តំបន់ និងសកលលោក។ ដោយ ៖ សិលា
