By ខេត្តកោះកុង ៖ កិច្ចខិតខំប្រឹងប្រែងពង្រឹងយុត្តិធម៌នៅមូលដ្ឋានបានបន្តធ្វើឡើងយ៉ាងសកម្ម! កាលពីរសៀលថ្ងៃទី១៤ ខែវិច្ឆិកា ឆ្នាំ២០២៥ ឯកឧត្តម ឯម ច័ន្ទមករា រដ្ឋលេខាធិការក្រសួងយុត្តិធម៌ និងជាសមាជិកនៃអាជ្ញាធរជាតិដោះស្រាយវិវាទក្រៅប្រព័ន្ធតុលាការ (អ.ដ.ក.) បានអញ្ជើញជាអធិបតីក្នុងសិក្ខាសាលាដ៏សំខាន់មួយ នៅខេត្តកោះកុង ដើម្បីផ្សព្វផ្សាយពីបេសកកម្មដ៏មានតម្លៃរបស់ អ.ដ.ក. ជូនដល់មន្ត្រីនៃមន្ទីរ-អង្គភាពពាក់ព័ន្ធជុំវិញខេត្ត។
ពិធីដ៏ឧឡារិកនេះ ក៏មានការចូលរួមពីសំណាក់ថ្នាក់ដឹកនាំសំខាន់ៗជាច្រើនរូប រួមមាន ឯកឧត្តម យ៉ម ផារ៉ូត ប្រតិភូរាជរដ្ឋាភិបាល និងអគ្គលេខាធិការនៃ អ.ដ.ក., ឯកឧត្តម ថុង ណារុង ប្រធានក្រុមប្រឹក្សាខេត្តកោះកុង, លោក ហាក់ ឡេង អភិបាលរងខេត្ត តំណាងលោកស្រីអភិបាលខេត្តកោះកុង, លោកប្រធានសាលាដំបូង, លោកស្រីព្រះរាជអាជ្ញានៃអយ្យការអមសាលាដំបូង ព្រមទាំងថ្នាក់ដឹកនាំអគ្គលេខាធិការដ្ឋាននៃ អ.ដ.ក. និងសមាជិកក្រុមប្រឹក្សាខេត្តផងដែរ។
សរុបមានមន្ត្រីពាក់ព័ន្ធចំនួន ២០០ រូប មកពីបណ្ដាស្ថាប័ននានា រួមមាន តំណាងស្នងការដ្ឋាននគរបាលខេត្ត, ប្រធានមន្ទីរពាក់ព័ន្ធ, ប្រធានក្រុមប្រឹក្សាក្រុង-ស្រុក, អភិបាលក្រុង-ស្រុក, ប្រធានការិយាល័យប្រជាពលរដ្ឋខេត្ត, ប្រធានការិយាល័យនីតិកម្មនិងសម្រុះសម្រួលវិវាទមូលដ្ឋានក្រុង-ស្រុក, និងមេឃុំ ចៅសង្កាត់ ទូទាំងខេត្តកោះកុង បានអញ្ជើញចូលរួមយ៉ាងយកចិត្តទុកដាក់។
សិក្ខាសាលានេះ មានគោលបំណងសំខាន់បំផុត គឺដើម្បីផ្សព្វផ្សាយ និងបញ្ជ្រាបការយល់ដឹងយ៉ាងទូលំទូលាយអំពីបេសកកម្ម និងសារៈសំខាន់នៃ អ.ដ.ក. ដែលជាស្ថាប័នថ្មីមួយរបស់រាជរដ្ឋាភិបាល។ អ.ដ.ក. ដើរតួនាទីយ៉ាងសំខាន់ក្នុងការផ្តល់សេវាដោះស្រាយវិវាទដោយផ្ទាល់ជូនប្រជាពលរដ្ឋនៅមូលដ្ឋាន ព្រមទាំងជាយន្តការបន្ថែមដ៏មានប្រសិទ្ធភាពសម្រាប់ប្រព័ន្ធដោះស្រាយវិវាទបច្ចុប្បន្ននៅកម្ពុជា។
ការបង្កើត អ.ដ.ក. គឺដើម្បីរួមចំណែកអភិវឌ្ឍន៍ប្រព័ន្ធយុត្តិធម៌ និងលើកកម្ពស់សិទ្ធិទទួលបានយុត្តិធម៌ សម្រាប់បុគ្គលគ្រប់រូបនៅមូលដ្ឋាន និងសហគមន៍ទូទាំងព្រះរាជាណាចក្រកម្ពុជា ឱ្យកាន់តែប្រសើរឡើង។ តាមរយៈការដោះស្រាយវិវាទក្នុងមូលដ្ឋានស្របតាមតម្រូវការជាក់ស្តែងរបស់ប្រជាពលរដ្ឋ និងការបញ្ចប់វិវាទដែលកើតមាននៅមូលដ្ឋាន អ.ដ.ក. សំដៅចូលរួមកាត់បន្ថយនូវសំណុំរឿងនៅតាមសាលាជម្រះក្តី ដែលជាការរួមចំណែកដ៏ធំធេងដល់ការរក្សាសុខដុមរមនាក្នុងសង្គម។
ក្នុងឱកាសនេះផងដែរ អាជ្ញាធរជាតិដោះស្រាយវិវាទក្រៅប្រព័ន្ធតុលាការ ក៏បានជួបពិភាក្សាការងារជាមួយរដ្ឋបាលខេត្តកោះកុង អំពីលទ្ធភាពនៃការចុះអនុស្សរណៈនៃការយោគយល់គ្នា (MOU) លើកិច្ចសហប្រតិបត្តិការសម្រុះសម្រួលផ្សះផ្សាវិវាទ។
ភាគីទាំងពីរបានគូសបញ្ជាក់អំពីសារសំខាន់នៃការដោះស្រាយវិវាទក្រៅប្រព័ន្ធតុលាការ ដើម្បីធានាសុខដុមរមនាក្នុងសង្គមជាតិ និងបានឯកភាពគ្នាពីភាពចាំបាច់នៃកិច្ចសហប្រតិបត្តិការរវាងស្ថាប័នទាំងពីរ ក្នុងការលើកកម្ពស់ និងពង្រឹងប្រសិទ្ធភាពនៃការដោះស្រាយវិវាទជូនប្រជាពលរដ្ឋ ជាពិសេសសម្រាប់ជាប្រយោជន៍របស់ប្រជាពលរដ្ឋខេត្តកោះកុងផ្ទាល់តែម្តង។
ប្រភព ៖ សិលា
ពង្រឹងយុត្តិធម៌មូលដ្ឋាន! អ.ដ.ក. ជួបមន្ត្រីខេត្តកោះកុង ផ្សព្វផ្សាយដំណោះស្រាយវិវាទក្រៅប្រព័ន្ធតុលាការ
