By លោក ស៊ីហាសាក់ ភួងកេតកែវ (Sihasak Phuangketkeow) រដ្ឋមន្ត្រីការបរទេសថៃ បានគូសបញ្ជាក់នៅក្នុងបទសម្ភាសន៍ជាមួយទូរទស្សន៍ Thai PBS កាលពីថ្ងៃព្រហស្បតិ៍ ទី១៣ ខែវិច្ឆិកា ឆ្នាំ២០២៥ ថា ជម្លោះព្រំដែនរវាងកម្ពុជា និងថៃ គឺនៅតែអាចដោះស្រាយបានតាមរយៈយន្តការការទូត។
លោក ស៊ីហាសាក់ ភួងកេតកែវ រដ្ឋមន្ត្រីការបរទេសថៃ (រូបថត៖ Thai PBS)។
បទសម្ភាសន៍នេះបានធ្វើឡើងចំពេលដែលភាពតានតឹងរវាងប្រទេសជិតខាងទាំងពីរបានផ្ទុះឡើងសារជាថ្មី បន្ទាប់ពីភាគីថៃបានអះអាងថា ទាហានរបស់ខ្លួនបានដើរជាន់មីនរហូតដល់បាត់បង់ជើង ហើយបានទម្លាក់កំហុសមកលើកម្ពុជា រហូតឈានដល់ការប្រកាសផ្អាកកិច្ចព្រមព្រៀងសន្តិភាព។ ទោះជាយ៉ាងណា ករណីនេះត្រូវបានគេមើលឃើញថា គ្រាន់តែជាលេសរបស់ថៃប៉ុណ្ណោះ ដើម្បីបង្កហេតុធ្វើសង្គ្រាម។
លោក ស៊ីហាសាក់ បានថ្លែងថា៖ «មនុស្សជាច្រើនប្រហែលជាលែងមានជំនឿចិត្តលើផ្នែកការទូតហើយ ដោយសារតែស្ថានការណ៍បច្ចុប្បន្ន។ ប៉ុន្តែការទូតនៅតែជាឧបករណ៍ដ៏សំខាន់បំផុតក្នុងការដោះស្រាយជម្លោះ។ ការប្រើប្រាស់កម្លាំងយោធានឹងនាំមកនូវអំពើហិង្សា និងការបាត់បង់ជីវិតទ្រព្យសម្បត្តិដ៏ច្រើនសន្ធឹកសន្ធាប់។ ដូច្នេះ ការទូតគឺជាជម្រើសដ៏ល្អបំផុតដើម្បីសម្រេចបាននូវបំណងប្រាថ្នារបស់យើង»។
លោកបានបន្ថែមថា៖ «ក្នុងនាមជាអ្នកការទូត ខ្ញុំនៅតែជឿជាក់ថាសន្តិភាពអាចសម្រេចទៅបាន ទោះបីជាពេលនេះមានឧបសគ្គលំបាកយ៉ាងណាក៏ដោយ»។
គួររំលឹកផងដែរ លោក អនុទីន (Anutin) បានប្រកាសផ្អាកកិច្ចព្រមព្រៀងសន្តិភាពជាមួយកម្ពុជាដោយឯកតោភាគី ដែលកិច្ចព្រមព្រៀងនេះមានវត្តមានលោក ដូណាល់ ត្រាំ (Donald Trump) ប្រធានាធិបតីអាមេរិក និងលោក អាន់វ៉ា អ៊ីប្រាហ៊ីម (Anwar Ibrahim) នាយករដ្ឋមន្ត្រីម៉ាឡេស៊ី ក្នុងនាមជាប្រធានអាស៊ានឆ្នាំ២០២៥ ជាសាក្សី។
បន្ទាប់ពីការប្រកាសផ្អាកកិច្ចព្រមព្រៀងនេះ លោក អនុទីន ក៏បានថ្លែងប្រាប់លោក ត្រាំ យ៉ាងដាច់អហង្ការថា ប្រសិនបើសហរដ្ឋអាមេរិកហ៊ានចាត់វិធានការដំឡើងពន្ធដើម្បីដាក់សម្ពាធនោះ ថៃនឹងស្វែងរកទីផ្សារថ្មីជំនួសអាមេរិកវិញ។ សម្ដីនេះបានបង្កឱ្យមានការរិះគន់ និងថ្កោលទោសយ៉ាងខ្លាំងក្លានៅក្នុងប្រទេសថៃផ្ទាល់។
អត្ថបទដោយ៖ សុខ សុវណ្ណ
សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត
