By ខេត្តកំពង់ស្ពឺ ៖ ករណីហិង្សាមួយបានកើតឡើងបង្កការភ្ញាក់ផ្អើល បន្ទាប់ពីបុរសម្នាក់បានផ្ទុះកំហឹងទ្រាំលែងបាន ខណៈដែលទារប្រាក់ពីជនរងគ្រោះដែលជំពាក់ខ្លួនអស់រយៈពេល ៣ ខែមកហើយនៅតែមិនបាន ក៏បានទាញប៉ែលសំពងក្បាលបណ្ដាលឱ្យរងរបួសយ៉ាងធ្ងន់ធ្ងរ។ ហេតុការណ៍នេះនាំឱ្យជនរងគ្រោះប្ដឹងសមត្ថកិច្ច ហើយកម្លាំងកងរាជអាវុធហត្ថស្រុកគងពិសីបានចុះអន្តរាគមន៍ឃាត់ខ្លួនជនដៃដល់ភ្លាមៗ។ នេះបើតាមការបញ្ជាក់ពីមន្ត្រីកងរាជអាវុធហត្ថនៅថ្ងៃទី ១៥ ខែវិច្ឆិកា ឆ្នាំ ២០២៥ នេះ។
មន្ត្រីអាវុធហត្ថស្រុកគងពិសីបានឱ្យដឹងថា ជនដៃដល់ដែលត្រូវបានឃាត់ខ្លួនមានឈ្មោះ ង៉ែត ថន ភេទប្រុស អាយុ៣២ឆ្នាំ បច្ចុប្បន្នស្នាក់នៅផ្ទះជួលក្នុងភូមិស្រង់ ឃុំស្រង់ ស្រុកគងពិសី ខេត្តកំពង់ស្ពឺ។ ចំណែកជនរងគ្រោះមានឈ្មោះ វុធ ថៃ ភេទប្រុស អាយុ២៧ឆ្នាំ មុខរបរកម្មករសំណង់ មានទីលំនៅបច្ចុប្បន្នស្នាក់នៅភូមិស្នួល ឃុំស្នំក្រពើ ស្រុកគងពិសី ខេត្តកំពង់ស្ពឺ។
ប្រភពដដែលបានបន្តទៀតថា មុនពេលកើតហេតុ កាលពីវេលាម៉ោង៨និង៤០នាទីយប់ ថ្ងៃទី១២ ខែវិច្ឆិកា ឆ្នាំ២០២៥ ជនសង្ស័យឈ្មោះ ង៉ែត ថន ហៅ យុ បានទៅទារប្រាក់ចំនួន១១០.០០០រៀល (ដប់មួយម៉ឺនរៀល) ពីជនរងគ្រោះដែលបានជំពាក់អស់រយៈពេលបីខែមកហើយ។ ជនសង្ស័យបានហៅជនរងគ្រោះចេញពីបន្ទប់ ហើយសួរថា «មានលុយសងអញអត់?» ជនរងគ្រោះក៏បានឆ្លើយថា «អញអត់មានទេ បើទៅខ្ចីលុយអុំក៏យប់ហើយដែរ»។
ភ្លាមៗនោះ ជនដៃដល់បានដើរទៅយកប៉ែលដែលដាក់ក្បែរខ្លួន ហើយសួរជនរងគ្រោះម្ដងទៀតថា «មានសងលុយអញអត់?» ពេលជនរងគ្រោះឆ្លើយថា «អញអត់មានទេ» ស្រាប់តែជនដៃដល់ក៏បានយកប៉ែលវាយទៅលើជនរងគ្រោះយ៉ាងសាហាវចំនួន០៥ប៉ែលចំក្បាលពីខាងក្រោយ ចំស្នងដៃឆ្វេង ចំស្នងដៃស្តាំ ខ្នងប្រអប់ដៃឆ្វេង និងស្មាខាងឆ្វេងពីខាងក្រោយ បណ្ដាលឱ្យរបួសធ្ងន់ធ្ងរ។ មិនតែប៉ុណ្ណោះ ជនដៃដល់ថែមទាំងបានយកទូរស័ព្ទរបស់ជនរងគ្រោះបោកចោល ហើយយកប៉ែលវាយកម្ទេចបន្ថែមទៀតបណ្ដាលឱ្យខូចខាត។ ក្រោយពីធ្វើសកម្មភាពរួច ជនដៃដល់ក៏បានជិះម៉ូតូគេចខ្លួនបាត់។
ក្រោយកើតហេតុ ជនរងគ្រោះក៏បានដាក់ពាក្យបណ្តឹងទៅកម្លាំងកងរាជអាវុធហត្ថស្រុកគងពិសីដើម្បីសុំជួយរកយុត្តិធម៌។ មន្ត្រីកងរាជអាវុធហត្ថស្រុកគងពិសីបានបន្តថា លុះរហូតដល់វេលាម៉ោង៦ល្ងាច ថ្ងៃទី១៣ ខែវិច្ឆិកា ឆ្នាំ២០២៥ កម្លាំងមូលដ្ឋានកងរាជអាវុធហត្ថស្រុកគងពិសីបានចុះឃាត់ខ្លួនជនសង្ស័យឈ្មោះ ង៉ែត ថន ភេទប្រុស អាយុ៣២ឆ្នាំ នៅផ្ទះជួលភូមិស្រង់ ឃុំស្រង់ ស្រុកគងពិសី ខេត្តកំពង់ស្ពឺ។ ក្រោយឃាត់ខ្លួន សមត្ថកិច្ចបានដកហូតវត្ថុតាងមួយចំនួនរួមមាន៖ ម៉ូតូ០១គ្រឿង ម៉ាកBeat ពណ៌ខៀវ ស៊េរីឆ្នាំ២០២៥ ពាក់ស្លាកលេខភ្នំពេញ 1W-0487 ទូរស័ព្ទដៃ០១គ្រឿង ម៉ាកRedmi កាតបុគ្គលិកចំនួន០១ និងអត្តសញ្ញាណប័ណ្ណសញ្ជាតិខ្មែរ០១សន្លឹក។
បច្ចុប្បន្ន ជនសង្ស័យដៃដល់រួមជាមួយវត្ថុតាងទាំងអស់ត្រូវបានបញ្ជូនទៅបញ្ជាការដ្ឋានកងរាជអាវុធហត្ថខេត្តកំពង់ស្ពឺ ដើម្បីបន្តនីតិវិធីតាមផ្លូវច្បាប់៕
