💥បង្ក្រាបធំ! អាវុធហត្ថក្រុងច្បារមន បោសសម្អាត៤ទីតាំងជួញដូរគ្រឿងញៀន នៅកំពង់ស្ពឺ ឃាត់ខ្លួនមេក្លោងជាច្រើននាក់!

ខេត្តកំពង់ស្ពឺ៖ មន្ត្រីកងរាជអាវុធហត្ថក្រុងច្បារមនបានប្រាប់ឱ្យដឹងនៅថ្ងៃទី១៥ ខែវិច្ឆិកា ឆ្នាំ២០២៥ នេះថា ដោយមានការអនុញ្ញាតពីលោកឧត្តមសេនីយ៍ត្រី ម៉េង ស្រ៊ុន មេបញ្ជាការកងរាជអាវុធហត្ថខេត្តកំពង់ស្ពឺ និងដឹកនាំបញ្ជាកម្លាំងផ្ទាល់ដោយលោកវរសេនីយ៍ត្រី ធី ឆៃ មេបញ្ជាការកងរាជអាវុធហត្ថក្រុងច្បារមន បានចុះបង្ក្រាបករណីគ្រឿងញៀនចំនួន៤ទីតាំងផ្សេងគ្នា។

ទីតាំងទី១៖ នៅវេលាម៉ោង០៩និង៤៥នាទីព្រឹក ថ្ងៃទី១០ ខែវិច្ឆិកា ឆ្នាំ២០២៥ កម្លាំងមូលដ្ឋានកងរាជអាវុធហត្ថក្រុងច្បារមន ដឹកនាំដោយលោកវរសេនីយ៍ត្រី ធី ឆៃ បានបង្រ្កាបករណីគ្រឿងញៀននៅចំណុចផ្លូវបេតុង ក្នុងភូមិត្រពាំងលើក សង្កាត់រកាធំ ក្រុងច្បារមន ខេត្តកំពង់ស្ពឺ ដោយឃាត់ខ្លួនជនសង្ស័យចំនួន០១នាក់ដែលជាប់ពាក់ព័ន្ធ។ ជនសង្ស័យនោះមានឈ្មោះ ជុន សៀប ភេទប្រុស អាយុ២៥ឆ្នាំ មុខរបរកម្មកររោងចក្រ មានទីលំនៅបច្ចុប្បន្នភូមិឡ ឃុំព្រៃក្រសាំង ស្រុកសាមគ្គីមុនីជ័យ ខេត្តកំពង់ស្ពឺ។

ទីតាំងទី២៖ តាមការឆ្លើយបំភ្លឺពីជនសង្ស័យឈ្មោះ ជុន សៀប ថាខ្លួនបានទទួលគ្រឿងញៀនពីឈ្មោះ ជួន លក្ខិណា។ ភ្លាមៗនោះ នៅវេលាម៉ោង០៩និង៥៧នាទីព្រឹក (ថ្ងៃ.ខែ.ឆ្នាំដដែល) កម្លាំងមូលដ្ឋានកងរាជអាវុធហត្ថក្រុងច្បារមន បានបន្តទៅឃាត់ខ្លួនជនសង្ស័យម្នាក់ទៀតនៅក្នុងបន្ទប់ជួលមួយកន្លែង ស្ថិតនៅភូមិត្រពាំងលើក សង្កាត់រកាធំ ក្រុងច្បារមន ខេត្តកំពង់ស្ពឺ។ ជនសង្ស័យមានឈ្មោះ ជួន លក្ខិណា ភេទស្រី អាយុ២៩ឆ្នាំ មុខរបរពុំពិតប្រាកដ មានទីលំនៅបច្ចុប្បន្នភូមិត្រពាំងលើក សង្កាត់រកាធំ ក្រុងច្បារមន ខេត្តកំពង់ស្ពឺ។

ទីតាំងទី៣៖ តាមការឆ្លើយបំភ្លឺពីជនសង្ស័យឈ្មោះ ជុន សៀប ថាបានទិញគ្រឿងញៀនពីឈ្មោះ មាន សុភាព ភេទស្រី។ ហេតុនេះ នៅវេលាម៉ោង១៣និង១៧នាទីរសៀល (ថ្ងៃ.ខែ.ឆ្នាំដដែល) កម្លាំងមូលដ្ឋានកងរាជអាវុធហត្ថក្រុងច្បារមន ដឹកនាំដោយលោកវរសេនីយ៍ត្រី ធី ឆៃ បានសហការជាមួយមន្ទីរស្រាវជ្រាវបង្ក្រាបបទល្មើស ដឹកនាំដោយលោកវរសេនីយ៍ត្រី ទឹម ស៊ី បានបន្តឃាត់ខ្លួនជនសង្ស័យម្នាក់ទៀត ស្ថិតនៅភូមិឡ ឃុំព្រៃក្រសាំង ស្រុកសាមគ្គីមុនីជ័យ ខេត្តកំពង់ស្ពឺ។ ជនសង្ស័យមានឈ្មោះ មាន សុភាព ភេទស្រី អាយុ៣៩ឆ្នាំ មុខរបរពុំពិតប្រាកដ មានទីលំនៅបច្ចុប្បន្នភូមិឡ ឃុំព្រៃក្រសាំង ស្រុកសាមគ្គីមុនីជ័យ ខេត្តកំពង់ស្ពឺ។

ទីតាំងទី៤៖ តាមការឆ្លើយបំភ្លឺពីជនសង្ស័យឈ្មោះ ជួន លក្ខិណា ថាគ្រឿងញៀនកន្លងមករូបគេធ្លាប់ទិញពីឈ្មោះ ព្រះ ស៊ីធូរ ភេទប្រុស។ ទើបនៅវេលាម៉ោង១៧និង៣៥នាទីល្ងាច (ថ្ងៃ.ខែ.ឆ្នាំដដែល) កម្លាំងមូលដ្ឋានកងរាជអាវុធហត្ថក្រុងច្បារមន បានសហការជាមួយមន្ទីរស្រាវជ្រាវបង្ក្រាបបទល្មើស ដឹកនាំដោយលោកវរសេនីយ៍ត្រី ទឹម ស៊ី និងកម្លាំងមូលដ្ឋានកងរាជអាវុធហត្ថស្រុកគងពិសី បានបន្តឃាត់ខ្លួនជនសង្ស័យចំនួន០២នាក់ ស្ថិតនៅភូមិស្រង់ ឃុំស្រង់ ស្រុកគងពិសី ខេត្តកំពង់ស្ពឺ។

ជនសង្ស័យទាំងពីរនាក់នេះរួមមាន៖ ឈ្មោះ ព្រះ ស៊ីធូរ ភេទប្រុស អាយុ៤២ឆ្នាំ មុខរបរជាងសំណង់ មានទីលំនៅបច្ចុប្បន្នភូមិត្របែកទូង ឃុំទឹកល្អក់ ស្រុកគងពិសី ខេត្តកំពង់ស្ពឺ និងឈ្មោះ ប៊ុត បណ្ឌិត ភេទប្រុស អាយុ៤២ឆ្នាំ មុខរបរបើកបរ មានទីលំនៅបច្ចុប្បន្នភូមិឈ្នួល ឃុំស្នំក្រពើ ស្រុកគងពិសី ខេត្តកំពង់ស្ពឺ។

បច្ចុប្បន្ននៅថ្ងៃទី១៥ ខែវិច្ឆិកា ឆ្នាំ២០២៥ ជនសង្ស័យទាំង៥នាក់ រួមទាំងវត្ថុតាង ត្រូវបានបញ្ជូនទៅបញ្ជាការដ្ឋានកងរាជអាវុធហត្ថខេត្តកំពង់ស្ពឺ ដើម្បីបន្តនីតិវិធីតាមច្បាប់។