By ក្រុមហ៊ុនអាកាសចរណ៍ខ្នាតយក្សរបស់សហរដ្ឋអាមេរិក កំពុងដាក់សម្ពាធលើរដ្ឋបាលអាកាសចរណ៍សហព័ន្ធ (FAA) ឲ្យលុបចោលការកាត់បន្ថយជើងហោះហើរក្នុងស្រុកចំនួន ៦% ដែលបានដាក់កំហិតនៅអាកាសយានដ្ឋានសំខាន់ៗចំនួន ៤០។ ការកាត់បន្ថយនេះ គឺដើម្បីដោះស្រាយបញ្ហាសុវត្ថិភាពចរាចរណ៍ផ្លូវអាកាស បន្ទាប់ពីការបិទរដ្ឋាភិបាលជាប្រវត្តិសាស្ត្របានបញ្ចប់។
ក្រុមហ៊ុនអាកាសចរណ៍ភាគច្រើនហាក់មិនបានអនុវត្តតាមបទប្បញ្ញត្តិរបស់ FAA ដែលបានតម្រូវឲ្យមានការកាត់បន្ថយជើងហោះហើរយ៉ាងតឹងរ៉ឹងនោះទេ។ ទីភ្នាក់ងារព័ត៌មាន Reuters បានដកស្រង់ទិន្នន័យពីក្រុមហ៊ុន Cirium ដែលជាក្រុមហ៊ុនវិភាគផ្នែកអាកាសចរណ៍ បានឲ្យដឹងថា ក្រុមហ៊ុនអាកាសចរណ៍បានលុបចោលត្រឹមតែ ២% នៃជើងហោះហើរសរុបកាលពីថ្ងៃសុក្រ ទី១៤ ខែវិច្ឆិកា ដែលជាការធ្លាក់ចុះពី ៣,៥% កាលពីថ្ងៃពុធ ទី១២ និងថ្ងៃព្រហស្បតិ៍ ទី១៣ ខែវិច្ឆិកា។
កាលពីថ្ងៃសុក្រ FAA និងមន្ត្រីសហជីពបានបញ្ជាក់ថា អ្នកត្រួតពិនិត្យចរាចរណ៍ផ្លូវអាកាស និងបុគ្គលិក FAA ផ្សេងទៀត បានចាប់ផ្ដើមទទួលបានប្រាក់សំណងប្រមាណ ៧០% នៃទឹកប្រាក់ដែលរដ្ឋជំពាក់ពួកគេ ដោយមិនរាប់បញ្ចូលម៉ោងធ្វើការបន្ថែមនោះទេ។ ទីភ្នាក់ងារ Reuters ក៏បានសម្ភាសន៍មន្ត្រីអាកាសចរណ៍មួយចំនួន ដែលបានអះអាងថា ក្រុមហ៊ុនអាកាសចរណ៍បានដាក់សំណើជាលក្ខណៈឯកជនទៅកាន់ FAA ដោយស្នើឲ្យបញ្ចប់ការកាត់បន្ថយនេះ។ ក្រុមហ៊ុនខ្លះទៀតបានលើកឡើងថា ពួកគេមានគម្រោងកាត់បន្ថយជើងហោះហើរតិចតួច ឬគ្មានទាល់តែសោះនៅថ្ងៃសៅរ៍ ទី១៥ ខែវិច្ឆិកា។
FAA ដែលមិនបានធ្វើអត្ថាធិប្បាយភ្លាមៗនៅថ្ងៃសុក្រ បានសម្រេចកាលពីថ្ងៃពុធថា នឹងបន្ធូរបន្ថយការលុបចោលជើងហោះហើរដែលចាំបាច់ បន្ទាប់ពីបញ្ហារំខានដោយសារកង្វះអ្នកគ្រប់គ្រងចរាចរណ៍ផ្លូវអាកាសបានថយចុះយ៉ាងខ្លាំងក្រោយសភាបោះឆ្នោតបើកដំណើរការរដ្ឋាភិបាលឡើងវិញ បន្ទាប់ពីការបិទអស់ ៤៣ ថ្ងៃ។ FAA បានរក្សាការកាត់បន្ថយនៅ ៦% ជំនួសឲ្យការបង្កើនដល់ ៨% នៅថ្ងៃព្រហស្បតិ៍ និង ១០% នៅថ្ងៃសុក្រ ដូចដែលបានប្រកាសពីមុន។
ក្រុមហ៊ុនអាកាសចរណ៍ United Airlines បានប្រកាសថា ខ្លួនបានលុបចោលជើងហោះហើរ ១៣៤ ជើងនៅថ្ងៃសុក្រ ឬជិត ៣% នៃជើងហោះហើរសរុបរបស់ខ្លួន បន្ទាប់ពីបានលុបចោល ២២២ ជើងកាលពីថ្ងៃព្រហស្បតិ៍។ បច្ចុប្បន្ន FAA មានអ្នកត្រួតពិនិត្យចរាចរណ៍ផ្លូវអាកាសប្រហែល ៣៥០០ នាក់តិចជាងចំនួនបុគ្គលិកដែលបានកំណត់។ បុគ្គលិកជាច្រើនត្រូវបានបង្ខំឲ្យធ្វើការថែមម៉ោងជាកាតព្វកិច្ច និងរយៈពេលរហូតដល់ប្រាំមួយសប្តាហ៍ សូម្បីតែមុនពេលមានការបិទរដ្ឋាភិបាលសហព័ន្ធក៏ដោយ ដែលបណ្តាលឲ្យពួកគេធ្វើការដោយគ្មានប្រាក់ឈ្នួល។
កង្វះបុគ្គលិកគ្រប់គ្រងចរាចរណ៍ផ្លូវអាកាសនេះ បាននាំឲ្យមានការលុបចោលជើងហោះហើររាប់ម៉ឺនជើង និងការពន្យារពេលជាច្រើនចាប់តាំងពីថ្ងៃទី ១ ខែតុលា ដែលជាពេលចាប់ផ្តើមនៃការបិទរដ្ឋាភិបាលរយៈពេល ៤៣ ថ្ងៃ។ យោងតាមលោកប្រធានាធិបតី ដូណាល់ ត្រាំ បានឲ្យដឹងថា ដោយសារកង្វះអ្នកបញ្ជាការគ្រប់គ្រងការហោះហើរ ការបិទរដ្ឋាភិបាលក្នុងអំឡុងពេលនេះ បានធ្វើឲ្យជើងហោះហើរជាង ២ ម៉ឺនជើងត្រូវបានផ្អាក ឬពន្យារពេល។
