By កាស្មៀរក្តៅដូចភ្លើង! មនុស្សយ៉ាងតិច ៩នាក់បានបាត់បង់ជីវិត ហើយជាង ៣០នាក់ទៀតរងរបួសធ្ងន់ស្រាល ក្នុងហេតុការណ៍ផ្ទុះឃ្លាំងស្តុកគ្រឿងផ្ទុះដ៏សន្ធឹកសន្ធាប់នៅស្ថានីយ៍ប៉ូលិសមួយក្នុងទីក្រុង Srinagar តំបន់កាស្មៀរដែលស្ថិតក្រោមការគ្រប់គ្រងរបស់ឥណ្ឌា។ នេះបើតាមការចុះផ្សាយរបស់សារព័ត៌មាន Al Jazeera កាលពីថ្ងៃទី១៥ ខែវិច្ឆិកា។
(សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត)
ហេតុការណ៍រន្ធត់នេះបានកើតឡើងកាលពីយប់ថ្ងៃសុក្រ ខណៈដែលមន្ត្រីប៉ូលិស និងក្រុមកោសល្យវិច័យកំពុងត្រួតពិនិត្យ និងស៊ើបអង្កេតលើគ្រឿងផ្ទុះដែលបានរឹបអូសបាន។ កម្លាំងផ្ទុះគឺខ្លាំងក្លាជាទីបំផុត រហូតបណ្ដាលឲ្យសាកសពខ្លះឆេះខ្មៅស្ទើររកទម្រង់មិនឃើញ ហើយបំណែករាងកាយខ្លះត្រូវខ្ទាតទៅឆ្ងាយដល់ទៅ ២០០ម៉ែត្រឯណោះ។
ស្ថានីយ៍ប៉ូលិសដែលរងគ្រោះនេះកំពុងស៊ើបអង្កេតការគំរាមកំហែងពីក្រុមសកម្មប្រយុទ្ធ Jaish-e-Muhammad (JeM)។ ក្នុងពេលស៊ើបអង្កេត ប៉ូលិសបានរកឃើញក្រុមនិស្សិតជ្រុលនិយម និងអ្នកជំនាញមួយក្រុមដែលដឹកនាំដោយជននៅក្រៅប្រទេស។ លើសពីនេះ គ្រឿងផ្ទុះជិត ៣,០០០ គីឡូក្រាមក៏ត្រូវបានរកឃើញក្នុងពេលដោះស្រាយករណីនេះដែរ។
យ៉ាងណាមិញ ប៉ូលិសបានបញ្ជាក់ថា នេះគ្រាន់តែជាគ្រោះថ្នាក់ចៃដន្យប៉ុណ្ណោះ មិនមែនជាអំពើវាយប្រហារភេរវកម្មនោះទេ។ ដោយសារអ្នករងរបួសជាច្រើននៅតែស្ថិតក្នុងស្ថានភាពធ្ងន់ធ្ងរ ដូច្នេះចំនួនអ្នកស្លាប់អាចនឹងកើនឡើងទៀត។
គួររំលឹកថា ឧប្បត្តិហេតុដ៏រន្ធត់នេះកើតឡើងប៉ុន្មានថ្ងៃប៉ុណ្ណោះ ក្រោយហេតុការណ៍ផ្ទុះគ្រាប់បែកក្នុងរថយន្តយ៉ាងសាហាវមួយនៅទីក្រុងញូវដេលី ដែលបានឆក់យកជីវិតមនុស្សយ៉ាងតិច ១២នាក់។ ប៉ូលិសបានឲ្យដឹងថា ការវាយប្រហារនោះមានជាប់ពាក់ព័ន្ធនឹងក្រុមសកម្មប្រយុទ្ធ JeM ដែលមានមូលដ្ឋាននៅប្រទេសប៉ាគីស្ថាន។ ក្រោយការផ្ទុះនៅញូវដេលី មនុស្សជាង ៦៥០នាក់ត្រូវបានឃុំខ្លួនក្នុងតំបន់កាស្មៀរ។
តំបន់កាស្មៀរនៅតែជាចំណុចក្តៅមួយ ដែលប្រទេសឥណ្ឌា និងប៉ាគីស្ថានបានទាមទារតាំងពីឆ្នាំ ១៩៤៧ មកម្ល៉េះ ហើយតែងតែរងការប៉ះពាល់ដោយជម្លោះរវាងប្រទេសទាំងពីរ។
អត្ថបទ៖ ប៊ុន សុភាព
