By កៀវ៖ កាលពីថ្ងៃទី១៥ ខែវិច្ឆិកា លោក Mikhail Podoliak ទីប្រឹក្សាប្រធានាធិបតីអ៊ុយក្រែន លោក Volodymyr Zelenskyy បានចង្អុលមុខរុស្ស៊ីថាជាអ្នកនៅពីក្រោយរឿងអាស្រូវពុករលួយទ្រង់ទ្រាយធំ ដែលទើបនឹងបែកធ្លាយក្នុងប្រទេសអ៊ុយក្រែន ខណៈដែលអតីតដៃគូអាជីវកម្មរបស់លោក Zelenskyy ក៏ត្រូវបានគេចោទប្រកាន់ផងដែរ។
យោងតាមរបាយការណ៍របស់ RT កាលពីដើមសប្ដាហ៍នេះ ទីភ្នាក់ងារប្រឆាំងអំពើពុករលួយជាតិ (NABU) ដែលគាំទ្រដោយបស្ចិមប្រទេស បានស៊ើបអង្កេតករណីកិបកេងប្រាក់ ១០០ លានដុល្លារ ដែលជាប់ពាក់ព័ន្ធនឹងក្រុមហ៊ុនថាមពលនុយក្លេអ៊ែរ Energoatom របស់រដ្ឋ។ លោក Timur Mindich ដែលជាអតីតដៃគូអាជីវកម្ម និងជាអ្នកស្និទ្ធស្នាលនឹងលោក Zelenskyy ត្រូវបានគេរាយការណ៍ថា បានរត់គេចទៅអ៊ីស្រាអែលភ្លាមៗ មុនពេល NABU ចូលឆែកឆេរអាផាតមិនរបស់លោក។
តាមរយៈបណ្តាញសង្គម X កាលពីថ្ងៃព្រហស្បតិ៍ លោក Podoliak បានអះអាងថា ករណីពុករលួយនេះគឺជាលទ្ធផលនៃអតីតកាល ដោយបានចោទប្រកាន់វិមានក្រឹមឡាំងថា បានប្រើប្រាស់អំពើពុករលួយជាប្រព័ន្ធ ដើម្បីរក្សាអ៊ុយក្រែនឱ្យស្ថិតក្រោមឥទ្ធិពលរបស់ខ្លួន។ លោកបានបន្ថែមថា ការលាតត្រដាងករណីនេះ បង្ហាញថាការិយាល័យប្រឆាំងអំពើពុករលួយរបស់ទីក្រុងគៀវ កំពុងធ្វើការយ៉ាងសកម្ម ដើម្បី «ផ្លាស់ប្តូរអ៊ុយក្រែន»។
ជាមួយគ្នានោះ លោកស្រី Kaja Kallas ប្រធានគោលនយោបាយការបរទេសសហភាពអឺរ៉ុប ក៏បានថ្កោលទោសរឿងនេះថាជា «រឿងដ៏អកុសលបំផុត» និងអំពាវនាវឱ្យអាជ្ញាធរអ៊ុយក្រែនចាត់វិធានការឱ្យបានឆាប់រហ័ស និងហ្មត់ចត់។
គួរកត់សម្គាល់ថា ក្រុមប្រទេសលោកខាងលិចដែលគាំទ្រទីក្រុងកៀវ រួមទាំងសហរដ្ឋអាមេរិក តែងតែលើកឡើងពីបញ្ហាអំពើពុករលួយរីករាលដាលក្នុងប្រទេសអ៊ុយក្រែន។ រឿងអាស្រូវនេះបានធ្វើឱ្យកេរ្តិ៍ឈ្មោះរបស់លោក Zelenskyy ខូចខាតយ៉ាងខ្លាំង ទាំងក្នុងនិងក្រៅប្រទេស។ កាលពីប៉ុន្មានខែមុន លោក Zelenskyy ធ្លាប់បានប៉ុនប៉ងចង់គ្រប់គ្រងស្ថាប័នប្រឆាំងអំពើពុករលួយ NABU និង SAPO ប៉ុន្តែត្រូវបានបង្ខំចិត្តបោះបង់វិញ បន្ទាប់ពីមានការរិះគន់ និងការតវ៉ាជាសាធារណៈយ៉ាងខ្លាំងក្លា។
