💥ផ្ទៃដីជិត៧ពាន់ហិកតា! បន្ទាយមានជ័យ-ឧត្តរមានជ័យ បើកប្រជុំក្តៅរឿងកំណត់ព្រំប្រទល់ខេត្ត!

បន្ទាយមានជ័យ៖ រឿងព្រំប្រទល់រដ្ឋបាលរវាងខេត្តបន្ទាយមានជ័យ និងឧត្តរមានជ័យ កាន់តែច្បាស់ការហើយ! នៅថ្ងៃទី១៤ ខែវិច្ឆិកា ឆ្នាំ២០២៥ ខាងមុខនេះ រដ្ឋបាលខេត្តទាំងពីរបានបើកកិច្ចប្រជុំពិភាក្សាដ៏សំខាន់មួយ ដើម្បីផ្ទៀងផ្ទាត់ផែនទី និងបង្ហាញស្ថានភាពព្រំប្រទល់ឱ្យកាន់តែច្បាស់លាស់ ក្រោយពីក្រុមការងារបច្ចេកទេសនៃមន្ទីររៀបចំដែនដី នគររូបនីយកម្ម សំណង់ និងសុរិយោដីខេត្តទាំងពីរ បានបញ្ចប់ការវាស់វែង និងប្រមូលឯកសារពាក់ព័ន្ធរួចរាល់។ កិច្ចប្រជុំនេះមានគោលបំណងបង្កើតមូលដ្ឋានគ្រឹះដ៏រឹងមាំ ដើម្បីដាក់ជូនថ្នាក់ដឹកនាំពិនិត្យ និងសម្រេចជាស្ថាពរលើការកំណត់ព្រំប្រទល់រវាងស្រុកបន្ទាយអំពិល (ឧត្តរមានជ័យ) និងស្រុកភ្នំស្រុក ស្រុកថ្មពួក (បន្ទាយមានជ័យ)។

កិច្ចប្រជុំដ៏កម្រនេះ ត្រូវបានដឹកនាំដោយផ្ទាល់ពីគណៈអភិបាលខេត្តទាំងពីរគឺ ឯកឧត្តម អ៊ុំ រាត្រី អភិបាលខេត្តបន្ទាយមានជ័យ និងឯកឧត្តម មាន ចាន់យ៉ាដា អភិបាលខេត្តឧត្តរមានជ័យ។ វត្តមានរបស់ថ្នាក់ដឹកនាំសំខាន់ៗជាច្រើនរូបទៀត រួមមាននាយរដ្ឋបាលខេត្ត ថ្នាក់ដឹកនាំមន្ទីរ អង្គភាព ស្រុក និងឃុំជាប់ព្រំប្រទល់ ក៏បានចូលរួមយ៉ាងផុសផុលផងដែរ។ ពិធីដ៏មានសារៈសំខាន់នេះ បានប្រារព្ធធ្វើឡើងនៅសាលប្រជុំ ក នៃសាលាខេត្តបន្ទាយមានជ័យ។

យោងតាមរបាយការណ៍ស្តីពីលទ្ធផលនៃការពិនិត្យផ្ទៀងផ្ទាត់ និងគាំទ្រផ្នែកបច្ចេកទេសលើបញ្ហាព្រំប្រទល់នេះ ក្រុមការងារបានដំឡើងផែនទីដែលបានវាស់វែងរួចរាល់ រួមជាមួយតារាងប្រៀបធៀបទំហំ ទីតាំងដី និងភូមិដែលបានវាស់វែង។ លទ្ធផលបង្ហាញថា មានចំណុចមួយចំនួនដែលខ្សែបន្ទាត់ព្រំប្រទល់បានចេញចូលគ្នាធៀបនឹងទិន្នន័យពីក្រសួងមហាផ្ទៃ។ ជាក់ស្ដែង ក្នុងភូមិសាស្ត្រស្រុកភ្នំស្រុក និងស្រុកថ្មពួក នៃខេត្តបន្ទាយមានជ័យ ត្រូវបានវាស់វែងចូលទៅក្នុងខេត្តឧត្តរមានជ័យ នូវផ្ទៃដីសរុបប្រមាណ ២,៧៨១ ហិកតា។ រីឯខេត្តឧត្តរមានជ័យវិញ បានវាស់វែងចូលមកក្នុងខេត្តបន្ទាយមានជ័យ នូវផ្ទៃដីសរុប ៤,៦១៦ ហិកតា ដែលស្ថិតនៅក្នុងភូមិសាស្ត្រស្រុកបន្ទាយអំពិល។

You can share this post!