By រាជធានីភ្នំពេញ ៖ ខណៈប្រជាពលរដ្ឋកំពុងលង់លក់ក្នុងដំណេកយ៉ាងស្ងប់ស្ងាត់ ស្រាប់តែត្រូវបានដាស់ភ្ញាក់ពីដំណេកដោយសំឡេងស្រែកឆោឡោថាមានអគ្គិភ័យឆាបឆេះផ្ទះយ៉ាងសន្ធោសន្ធៅ។ ភ្លាមៗនោះ ពួកគាត់ក៏បានរត់ចេញមកក្រៅដើម្បីមើលស្ថានការណ៍ជាក់ស្ដែង ហើយក៏បានប្រញាប់ប្រញាល់ទូរស័ព្ទទៅអាជ្ញាធរមូលដ្ឋានដើម្បីសុំអន្តរាគមន៍ពីរថយន្តពន្លត់អគ្គិភ័យ។
ហេតុការណ៍ដ៏គួរឲ្យរន្ធត់នេះបានកើតឡើងកាលពីវេលាម៉ោង៣និង១៥នាទីទៀបភ្លឺ ឈានចូលថ្ងៃទី១៦ ខែវិច្ឆិកា ឆ្នាំ២០២៥ នៅចំណុចក្បែរអង់តែនទួលគោក តាមបណ្ដោយផ្លូវលំ ក្រុម២ ស្ថិតក្នុងភូមិទួលគោក សង្កាត់ទួលសង្កែទី១ ខណ្ឌឫស្សីកែវ រាជធានីភ្នំពេញ។
ប្រជាពលរដ្ឋដែលរស់នៅក្បែរកន្លែងកើតហេតុបានរៀបរាប់ថា ពួកគាត់ភ្ញាក់ផ្អើលដោយសារតែមានផ្សែងខ្មួលខ្មាញ់ហុយចេញពីផ្ទះឈើប្រក់សង្កសី និងផ្ទះថ្មប្រក់ដំបូលសង្កសីមួយចំនួន រួមទាំងបន្ទប់ជួលដែលបានឆាបឆេះបន្តបន្ទាប់គ្នាយ៉ាងលឿនបំផុត។ ដោយឃើញស្ថានការណ៍អាក្រក់ដូច្នេះ ពួកគាត់មិនបង្អែកយូរឡើយ ក៏បាននាំគ្នារាយការណ៍ទៅអាជ្ញាធរដើម្បីឲ្យជួយអន្តរាគមន៍ភ្លាមៗ។
លោក ហ៊ាង ថារ៉េត អធិការខណ្ឌឫស្សីកែវ បានមានប្រសាសន៍បញ្ជាក់ថា លោកបានដឹកនាំកម្លាំងប៉ុស្តិ៍នគរបាល រួមជាមួយនឹងកម្លាំងសណ្ដាប់ធ្នាប់ចរាចរណ៍ខណ្ឌ ដើម្បីសម្រួលដល់ការចេញចូលរបស់រថយន្តពន្លត់អគ្គិភ័យជាច្រើនគ្រឿង។ ប៉ុន្តែដោយសារផ្លូវចូលទៅកាន់ទីតាំងកើតហេតុមានសភាពតូចចង្អៀត រថយន្តពន្លត់អគ្គិភ័យមួយចំនួនត្រូវចតនៅខាងក្រៅបណ្ដាលឲ្យកកស្ទះចរាចរណ៍។ ដូច្នេះកម្លាំងអាជ្ញាធរបានដាក់ឲ្យបញ្ជាចរាចរណ៍វាងផ្លូវចាន់ពីគល់អង់តែនទួលគោក។
លោកអធិការបន្តថា ម្ចាស់ផ្ទះដែលរងគ្រោះដោយអគ្គិភ័យនេះមានឈ្មោះ យឹម ផល្លា ភេទស្រី អាយុ ៦៧ឆ្នាំ មុខរបរនៅផ្ទះ។ ផ្ទះរបស់គាត់ជាសំណង់ថ្មក្រោមឈើលើ មានទំហំ ៤ម៉ែត្រ x ៦ម៉ែត្រ ហើយត្រូវបានឆេះទាំងស្រុង រួមទាំងបានឆេះរាលដាលដល់ផ្ទះអ្នកជិតខាងអស់ចំនួន៣ខ្នងបន្ថែមទៀត ព្រមទាំងសម្ភារៈប្រើប្រាស់ប្រចាំថ្ងៃអស់ទាំងស្រុង។ យ៉ាងណាមិញ ក្នុងហេតុការណ៍នេះមិនបានបណ្ដាលឲ្យមនុស្សណាម្នាក់រងគ្រោះថ្នាក់ដល់អាយុជីវិតនោះទេ។ ចំពោះមូលហេតុពិតប្រាកដនៃការឆាបឆេះ អាជ្ញាធរកំពុងតែធ្វើការស្រាវជ្រាវបន្ថែម។
កម្លាំងសមត្ថកិច្ចបានប្រើប្រាស់រថយន្តពន្លត់អគ្គិភ័យចំនួន១៧គ្រឿង និងប្រើប្រាស់ទឹកអស់ចំនួន១៧ឡាន ស្មើនឹង ៧៥ម៉ែត្រគូប ដើម្បីបាញ់ពន្លត់អណ្ដាតភ្លើងដែលឆេះយ៉ាងសន្ធោសន្ធៅនោះ។ ទីបំផុត ភ្លើងត្រូវបានពន្លត់រលត់ទាំងស្រុងនៅវេលាម៉ោង ៤និង១៥នាទីទៀបភ្លឺនៅថ្ងៃខែឆ្នាំដដែល។
