By រាជធានីភ្នំពេញ ៖ ក្រុមជនសង្ស័យជាក្មេងទំនើងចំនួន២០នាក់ ដែលបានប្រព្រឹត្តបទល្មើសហិង្សា និងកាប់ប្លន់ ត្រូវបានកម្លាំងនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញ បង្ហាញមុខជាសាធារណៈនៅព្រឹកថ្ងៃទី១៧ ខែវិច្ឆិកា ឆ្នាំ២០២៥ បន្ទាប់ពីប្រតិបត្តិការស្រាវជ្រាវនិងឃាត់ខ្លួនជាបន្តបន្ទាប់ក្នុងរយៈពេល៤ថ្ងៃ។ ក្នុងនោះ ក៏មានវត្ថុតាងមួយចំនួនដូចជាកាំបិតប៉័ងតោ ដាវ និងដុំថ្មផងដែរ។
លោកវរសេនីយ៍ឯក ម៉ម សាវន នាយការិយាល័យនគរបាលព្រហ្មទណ្ឌកម្រិតស្រាលនៃស្នងការនគរបាលរាជធានីភ្នំពេញ បានឲ្យដឹងថា ការងារនេះបានអនុវត្តតាមអនុសាសន៍ដឹកនាំដ៏ខ្ពង់ខ្ពស់របស់នាយឧត្តមសេនីយ៍ ស ថេត អគ្គស្នងការនគរបាលជាតិ និងបទបញ្ជាផ្ទាល់ពីលោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ រួមទាំងការដឹកនាំបញ្ជាផ្ទាល់ពីលោកឧត្តមសេនីយ៍ត្រី ប៊ុន សត្យា អនុប្រធានផែនការងារព្រហ្មទណ្ឌ។
កម្លាំងនគរបាលការិយាល័យព្រហ្មទណ្ឌកម្រិតស្រាល បានសហការជាមួយបណ្ដាខណ្ឌនានាធ្វើការស្រាវជ្រាវ ហើយបង្ក្រាបបានក្រុមក្មេងទំនើងជាបន្តបន្ទាប់ចាប់ពីថ្ងៃទី១៣ ដល់ថ្ងៃទី១៦ ខែវិច្ឆិកា ឆ្នាំ២០២៥ ដោយឃាត់ខ្លួនជនសង្ស័យសរុប២០នាក់ ក្នុងនោះមានស្ត្រីម្នាក់។
លោកវរសេនីយ៍ឯក ម៉ម សាវន បន្តថា ជនសង្ស័យទាំងនេះបានប្រព្រឹត្តបទល្មើស៣ករណីផ្សេងគ្នា៖
**ករណីទី១**៖ បង្កហិង្សាដោយចេតនានៅចំណុចបន្ទប់ទឹកមាត់ទន្លេ កោះពេជ្រ ផ្លូវផ្សាររាត្រី សង្កាត់ទន្លេបាសាក់ ខណ្ឌចំការមន កាលពីថ្ងៃទី០៨ ខែវិច្ឆិកា ឆ្នាំ២០២៥ វេលាម៉ោង០១ និង៣០នាទី (ក្រុមក្មេងទំនើងឈ្មោះបឹងត្របែក (BTB)) ។
**ករណីទី២**៖ ហិង្សាដោយចេតនាមានស្ថានទម្ងន់ទោស និងកាន់កាប់ ឬដឹកជញ្ជូនអាវុធដោយគ្មានការអនុញ្ញាត ដោយប្រើដុំថ្ម កាំបិតប៉័ងតោ ព្រួតគ្នាវាយ ដេញគប់ និងកាប់លើជនរងគ្រោះ នៅចំណុចមុខផ្សារ K-MALL មហាវិថីចោមចៅ (វេងស្រេង) សង្កាត់ចោមចៅ១ ខណ្ឌពោធិ៍សែនជ័យ កាលពីថ្ងៃទី១៣ ខែវិច្ឆិកា ឆ្នាំ២០២៥ វេលាម៉ោង០១ និង៣០នាទី។
ជនសង្ស័យ១៦នាក់ត្រូវបានចាប់ខ្លួនពាក់ព័ន្ធនឹង២ករណីខាងលើនេះ រួមមាន៖ ជា អូ (២១ឆ្នាំ), អឹម ចាន់វិបុល (១៩ឆ្នាំ), ហត រ៉ូសា (១៨ឆ្នាំ), ខេង សុភ័ស្ស (១៩ឆ្នាំ), ផល សំនិត (១៨ឆ្នាំ), លាក់ ស៊ីមី (កើតឆ្នាំ២០០៧), យ៉ន សុខជា (១៩ឆ្នាំ), យ៉េប រ៉ូហ្សាណូ (១៨ឆ្នាំ), ប្រាក់ មុន្នីពេជ្យ (ស្រី កើតឆ្នាំ២០០៧), កន មេត្តា (កើតឆ្នាំ២០០៧), ហង្ស រតនះ (១៨ឆ្នាំ), អាត រស្មី (១៨ឆ្នាំ), ពៅ ពិសី (១៨ឆ្នាំ), យុទ្ធ វិច្ឆិកា (១៨ឆ្នាំ), លី គីមឡេង (១៨ឆ្នាំ), និងអី កុម ភកក្ត្រា (កើតឆ្នាំ២០០៦)។ វត្ថុតាងរួមមានកាំបិតប៉័ងតោ១ដើម និងដុំថ្ម៣ដុំ។
**ករណីទី៣**៖ អំពើលួចមានស្ថានទម្ងន់ទោសដោយប្រព្រឹត្តអំពើហិង្សា (កាប់ប្លន់ម៉ូតូ) នៅចំណុចផ្លូវបេតុង សង្កាត់បឹងទំពន់ទី១ ខណ្ឌមានជ័យ វេលាម៉ោងប្រហែល ៣និង៤៣នាទីយប់ទៀបភ្លឺ ថ្ងៃទី១៥ ខែវិច្ឆិកា ឆ្នាំ២០២៥។ ជនសង្ស័យ៤នាក់ត្រូវបានឃាត់ខ្លួនក្នុងនោះមានអ្នកទទួលផលចោរកម្ម២នាក់។ ជនសង្ស័យរួមមាន៖ នួន ធាន (២៧ឆ្នាំ), វិន ចាន់ខា (២៦ឆ្នាំ), មិន ចាន់ឬទ្ធី (៣៩ឆ្នាំ), និងមាច ថាវរុន (៣៤ឆ្នាំ)។
ជនសង្ស័យទាំង២០នាក់ខាងលើនេះត្រូវបានកម្លាំងនគរបាលព្រហ្មទណ្ឌកម្រិតស្រាលនៃស្នងការនគរបាលរាជធានីភ្នំពេញ កសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ដើម្បីចាត់ការតាមនីតិវិធីច្បាប់។
