By រាជធានីភ្នំពេញ ៖ លោក ឈាង រ៉ា រដ្ឋមន្ត្រីក្រសួងសុខាភិបាល បានសង្កត់ធ្ងន់ទៅលើសារៈសំខាន់នៃការវះកាត់ក្នុងការព្យាបាលជំងឺមហារីក ដោយចាត់ទុកថាជាស្នូលនៃការសង្គ្រោះជីវិតអ្នកជំងឺឱ្យជាសះស្បើយប្រកបដោយប្រសិទ្ធភាពខ្ពស់។ ការថ្លែងនេះធ្វើឡើងក្នុងពិធីបើកសន្និសីទសល្យសាស្ត្រកម្ពុជាប្រចាំឆ្នាំលើកទី៣០ កាលពីថ្ងៃទី១៥ ខែវិច្ឆិកា ឆ្នាំ២០២៥ ក្រោមប្រធានបទ «ភាពប្រឈមនៃការវះកាត់ជំងឺមហារីក»។
លោករដ្ឋមន្ត្រីបានបញ្ជាក់យ៉ាងមុតមាំថា រាជរដ្ឋាភិបាលប្ដេជ្ញាចិត្តខ្ពស់ក្នុងការប្រយុទ្ធប្រឆាំងនឹងជំងឺមហារីក។ លោកបានជំរុញឱ្យវេជ្ជបណ្ឌិត និងក្រុមគ្រូពេទ្យទាំងអស់បន្តយកចិត្តទុកដាក់ខ្ពស់លើសេវាព្យាបាលមហារីកប្រកបដោយឧត្ដមគតិ សមធម៌ និងក្រមសីលធម៌វិជ្ជាជីវៈ។
ទន្ទឹមនឹងនោះ លោកក៏បានណែនាំឱ្យពង្រឹងហេដ្ឋារចនាសម្ព័ន្ធ បច្ចេកវិទ្យា ឧបករណ៍សម្ភារទំនើបៗ ការបញ្ជូនអ្នកជំងឺទៅព្យាបាលឱ្យចំគោលដៅ និងទាន់ពេលវេលា រួមទាំងការធ្វើរោគវិនិច្ឆ័យ និងព្យាបាលឱ្យបានត្រឹមត្រូវតាមស្ដង់ដារគុណភាព និងសុវត្ថិភាព។ លោក ឈាង រ៉ា ក៏បានជំរុញឱ្យពង្រីកការព្យាបាលទៅដល់មន្ទីរពេទ្យគ្រប់កម្រិត និងពង្រឹងការបណ្ដុះបណ្ដាលបន្តបន្ទាប់ជាមួយប្រព័ន្ធកត់ត្រាព័ត៌មានច្បាស់លាស់។
ជាពិសេស លោករដ្ឋមន្ត្រីបានអំពាវនាវដល់គ្រូពេទ្យវះកាត់ទាំងអស់ឱ្យខិតខំរៀនសូត្រ ហ្វឹកហាត់ការងារជាប្រចាំ រក្សាសាមគ្គីភាព និងសហការគ្នាឱ្យបានល្អ។ លោកបានគូសបញ្ជាក់ថា «ជោគជ័យនៃការវះកាត់ គឺស្ថិតនៅលើលទ្ធផលចុងក្រោយដែលអ្នកជំងឺជាសះស្បើយទាន់ពេលវេលា ជាមួយសុវត្ថិភាព និងគុណភាពជីវិតល្អប្រសើរ។ ដូច្នេះត្រូវគិតគូរឱ្យបានសព្វគ្រប់ទាំងមុនពេល ពេលកំពុង និងក្រោយពេលវះកាត់»។
លោកបានបន្ថែមថា ការវះកាត់ដែលមានសុវត្ថិភាពខ្ពស់ និងតម្លៃសមរម្យ គឺជាគោលនយោបាយគន្លឹះមួយរបស់អង្គការសុខភាពពិភពលោក (WHO) ក្រសួងសុខាភិបាល និងរាជរដ្ឋាភិបាល។ ការធានានូវសុវត្ថិភាព និងតម្លៃសមរម្យដោយមិនបង្កការលំបាកផ្នែកហិរញ្ញវត្ថុ គឺជាកត្តាសំខាន់ក្នុងការសម្រេចបាននូវផែនទីបង្ហាញផ្លូវឆ្ពោះទៅកាន់ការគ្របដណ្ដប់សុខភាពជាសកល។
