By ទីក្រុងវ៉ាស៊ីនតោន៖ ថ្មីៗនេះ សហរដ្ឋអាមេរិកបានបើកប្រតិបត្តិការវាយប្រហារម្ដងទៀតទៅលើកប៉ាល់ល្បឿនលឿនដែលសង្ស័យថាជារបស់ក្រុមជួញដូរគ្រឿងញៀននៅដែនសមុទ្រប៉ាស៊ីហ្វិកខាងកើត បណ្ដាលឲ្យមនុស្សយ៉ាងហោចណាស់ ៣នាក់បានបាត់បង់ជីវិត។ នេះបើយោងតាមសេចក្ដីប្រកាសព័ត៌មានរបស់មន្ទីរបញ្ចកោណ។
បញ្ជាការដ្ឋានយោធាអាមេរិកប្រចាំតំបន់ភាគខាងត្បូងបានឲ្យដឹងនៅលើបណ្ដាញសង្គមថា ភ្នាក់ងារសម្ងាត់របស់ខ្លួនបានទទួលព័ត៌មានថា កប៉ាល់នោះកំពុងដឹកជញ្ជូនគ្រឿងញៀនឆ្លងកាត់ច្រកសមុទ្រដែលក្រុមឈ្មួញខុសច្បាប់តែងតែប្រើប្រាស់ជាប្រចាំ។
សេចក្ដីប្រកាសដដែលបានអះអាងថា កប៉ាល់នោះកំពុងធ្វើដំណើរក្នុងដែនសមុទ្រអន្តរជាតិ មុននឹងត្រូវបានកងកម្លាំងចម្រុះនៃ «ក្រុមបេសកកម្មលំពែងភាគខាងត្បូង» បាញ់ប្រហារដោយមីស៊ីល។ ប្រតិបត្តិការនេះបានធ្វើឲ្យចំនួនករណីវាយប្រហារទូកគ្រឿងញៀនដែលសហរដ្ឋអាមេរិកបានអនុវត្តកើនដល់ ២១ករណីហើយ ចាប់តាំងពីដើមខែកញ្ញាមក។ អាមេរិកបានចាត់ទុកការវាយប្រហារទាំងនេះថាជាទង្វើត្រឹមត្រូវតាមច្បាប់ ដើម្បីទប់ស្កាត់ការហូរចូលគ្រឿងញៀនមកកាន់ប្រទេសខ្លួន។ សរុបទាំងមុន និងក្រោយ ការវាយប្រហារទាំងនេះបានបណ្ដាលឲ្យមនុស្សជាង ៨០នាក់បាត់បង់ជីវិត។ នេះបើយោងតាមទិន្នន័យពីមន្ទីរបញ្ចកោណ។
ទោះជាយ៉ាងណា ក្រុមអ្នកតំណាងរាស្ត្រអាមេរិក ក្រុមសិទ្ធិមនុស្ស និងក្រុមប្រទេសសម្ព័ន្ធមិត្តរបស់អាមេរិកបានលើកឡើងជាសំណួរថា តើវិធានការបាញ់ប្រហារនេះពិតជាស្របច្បាប់ដែរឬទេ? រដ្ឋបាលលោកត្រាំបានអះអាងថា ខ្លួនមានដែនសមត្ថកិច្ចផ្នែកច្បាប់ពេញលេញដើម្បីធ្វើការវាយប្រហារទាំងនេះ។ ក្រសួងយុត្តិធម៌អាមេរិកក៏បានបញ្ចេញយោបល់ស្របគ្នាថា នេះជាទង្វើស្របច្បាប់ផងដែរ ដោយថែមទាំងបញ្ជាក់ថា បុគ្គលិកយោធាអាមេរិកដែលពាក់ព័ន្ធនឹងការបាញ់ប្រហារនេះមានអភ័យឯកសិទ្ធិពិសេស អាចរួចផុតពីទោសកំហុសគ្រប់យ៉ាង។
ក្នុងព្រឹត្តិការណ៍មួយទៀត រដ្ឋមន្ត្រីការបរទេសអាមេរិក លោកម៉ៃក៍ប៉ុមប៉េអូ បានថ្លែងថា ក្រសួងរបស់លោកនឹងដាក់បញ្ចូលក្រុមជួញដូរគ្រឿងញៀនឈ្មោះ Cartel de los Soles ទៅជាអង្គការភេរវកម្មគ្រឿងញៀន។ នេះមានន័យថា ចាប់ពីពេលនេះតទៅ បុគ្គលណាម្នាក់នៅសហរដ្ឋអាមេរិកដែលផ្ដល់ការគាំទ្រដល់ក្រុមនេះ នឹងត្រូវចាត់ទុកថាជាទង្វើខុសច្បាប់។ អាមេរិកចោទប្រកាន់ថា ក្រុមកាថែលនេះបានសហការជាមួយក្រុមឧក្រិដ្ឋកម្មមួយទៀត ដើម្បីនាំចូលគ្រឿងញៀនមកកាន់សហរដ្ឋអាមេរិក។ រដ្ឋបាលលោកត្រាំបានចោទប្រកាន់ថា ប្រធានាធិបតីវេណេហ្ស៊ូអេឡា លោក ម៉ាឌូរ៉ូ គឺជាប្រធានក្រុម Cartel de Los Soles នេះ។ នេះបើតាមប្រភពពីទីភ្នាក់ងារព័ត៌មានរ៉យទ័រ និងប្រភពដទៃទៀត។
