By ខេត្តក្រចេះ ៖ ជាការឆ្លើយតបទៅនឹងភាពខ្វះខាតកម្លាំងពលកម្មរបស់ប្រជាពលរដ្ឋក្នុងការប្រមូលផលស្រូវ កងកម្លាំងកងពលតូចអន្តរាគមន៍លេខ១២៨ បានចុះអនុវត្តសកម្មភាពមនុស្សធម៌យ៉ាងសកម្មនៅមូលដ្ឋានឃុំអូរកណ្តៀរសែនជ័យ ស្រុកអូរគ្រៀងសែនជ័យ ខេត្តក្រចេះ។
នេះបើយោងតាមផេកផ្លូវការរបស់កងទ័ពជើងគោកនៃកងយោធពលខេមរភូមិន្ទ ដែលបានប្រកាសនាព្រឹកថ្ងៃទី១៨ ខែវិច្ឆិកា ឆ្នាំ២០២៥ ថា កម្លាំងវរសេនាតូចអន្តរាគមន៍២៨២ នៃកងពលតូចអន្តរាគមន៍លេខ១២៨ បានចុះជួយច្រូតស្រូវប្រជាពលរដ្ឋនៅឃុំអូរកណ្តៀរសែនជ័យ ស្រុកអូរគ្រៀងសែនជ័យ ខេត្តក្រចេះ។
កងទ័ពជើងគោកនៃកងយោធពលខេមរភូមិន្ទបានបញ្ជាក់បន្ថែមថា កាលពីថ្ងៃទី១៧ ខែវិច្ឆិកា ឆ្នាំ២០២៥ កន្លងទៅនេះ ក្រោមផែនការរបស់លោកឧត្តមសេនីយ៍ទោ មៀច សាមុត មេបញ្ជាការកងពលតូចអន្តរាគមន៍លេខ១២៨ លោកវរសេនីយ៍ឯក អ៊ុក សំអុន ដែលជាមេបញ្ជាការវរសេនាតូចអន្តរាគមន៍២៨២ បានចាត់តាំងកម្លាំងសរុបចំនួន១៥នាក់ ចុះជួយច្រូតស្រូវប្រជាពលរដ្ឋដែលខ្វះខាតកម្លាំងពលកម្មក្នុងការប្រមូលផលស្រូវនៅឃុំអូរកណ្តៀរសែនជ័យ ស្រុកអូរគ្រៀងសែនជ័យ ខេត្តក្រចេះ ដោយសម្រេចបានលទ្ធផលសរុបចំនួន២ហិកតា។
សកម្មភាពដ៏ប្រពៃនេះ បានបង្ហាញយ៉ាងច្បាស់ពីស្មារតីលះបង់ និងការយកចិត្តទុកដាក់ខ្ពស់របស់កងកម្លាំងចំពោះជីវភាពរស់នៅរបស់ប្រជាពលរដ្ឋ ដែលជាចំណែកមួយយ៉ាងសំខាន់ក្នុងការរក្សាទំនាក់ទំនងរវាងកងទ័ព និងប្រជាជនឱ្យកាន់តែរឹងមាំ និងមានភាពស្និទ្ធស្នាលជាលក្ខណៈគ្រួសារ។
