By ព្យុងយ៉ាងបានបង្ហាញប្រតិកម្មយ៉ាងខ្លាំងក្លាចំពោះកិច្ចព្រមព្រៀងសន្តិសុខថ្មីមួយ រវាងកូរ៉េខាងត្បូង និងសហរដ្ឋអាមេរិក ដែលក្នុងនោះមានផែនការដ៏រសើប សម្រាប់ទីក្រុងវ៉ាស៊ីនតោនជួយទីក្រុងសេអ៊ូលក្នុងការអភិវឌ្ឍនាវាមុជទឹកដើរដោយថាមពលនុយក្លេអ៊ែរ។
យោងតាមការចុះផ្សាយរបស់ទីភ្នាក់ងារព័ត៌មានរដ្ឋ KCNA កាលពីថ្ងៃអង្គារទី ១៨ ខែវិច្ឆិកា ឆ្នាំ ២០២៥ កូរ៉េខាងជើងបានចាត់ទុកទង្វើនេះថាជាការប្រឈមមុខដាក់គ្នាដ៏ប្រកបដោយគ្រោះថ្នាក់ ដែលនឹងនាំមកនូវអស្ថិរភាពដល់តំបន់អាស៊ី-ប៉ាស៊ីហ្វិកទាំងមូល។ ទីក្រុងព្យុងយ៉ាងបានព្រមានយ៉ាងដាច់អហង្ការថា ចលនានេះនឹងបង្កឲ្យមាន «ផលប៉ះពាល់នៃទ្រឹស្តីដូមីណូនុយក្លេអ៊ែរ» ដែលអាចជំរុញឲ្យប្រទេសដទៃទៀតក្នុងតំបន់ចាប់ផ្តើមស្វែងរកអាវុធនុយក្លេអ៊ែរដូចគ្នា បង្កជាការប្រណាំងប្រជែងអាវុធទ្រង់ទ្រាយធំ។
ទ្រឹស្តីដូមីណូនុយក្លេអ៊ែរសំដៅលើការសន្មត់ថា ប្រសិនបើប្រទេសណាមួយទទួលបានអាវុធនុយក្លេអ៊ែរ នោះវានឹងបង្កឲ្យមានប្រតិកម្មបន្តបន្ទាប់គ្នា ដោយរដ្ឋជិតខាង ឬរដ្ឋគូប្រជែងផ្សេងទៀតនឹងចាប់ផ្តើមស្វែងរកកម្មវិធីអាវុធនុយក្លេអ៊ែររបស់ខ្លួនដើម្បីធានាសន្តិសុខ ឬរក្សាតុល្យភាពអំណាច។
ការរិះគន់ពីទីក្រុងព្យុងយ៉ាងនេះ កើតឡើងក្រោយពេលប្រធានាធិបតីកូរ៉េខាងត្បូងថ្មីៗនេះ លោក Lee Jae Myung បានផ្តល់សំណើដ៏សំខាន់មួយដើម្បីបើកការចរចាយោធាឡើងវិញជាមួយកូរ៉េខាងជើង ក្នុងគោលបំណងកាត់បន្ថយភាពតានតឹង ដែលនេះជាសំណើលើកដំបូងក្នុងរយៈពេល ៧ ឆ្នាំចុងក្រោយ។ ទោះជាយ៉ាងណា មកទល់ពេលនេះ កូរ៉េខាងជើងនៅតែមិនបានឆ្លើយតបនឹងកិច្ចចរចាសន្តិភាពនោះទេ ហើយបែរជាជ្រើសរើសផ្តោតលើការថ្កោលទោសជាសាធារណៈចំពោះកិច្ចព្រមព្រៀងនាវាមុជទឹកនុយក្លេអ៊ែរទៅវិញ។
