By ភ្នំពេញ៖ ដើម្បីត្រៀមរៀបចំពិធីសម្ពោធដាក់ឱ្យដំណើរការជាផ្លូវការនូវច្រកទ្វារព្រំដែនអន្តរជាតិម៉ឺនជ័យ(ខេត្តព្រៃវែង)-តិនណាម(ខេត្តតៃនិញ) ឲ្យបានរលូន និងជោគជ័យ ក្រសួងមហាផ្ទៃ បានបើកកិច្ចប្រជុំពិភាក្សាយ៉ាងផុសផុល កាលពីថ្ងៃទី១៨ ខែវិច្ឆិកា ឆ្នាំ២០២៥។ កិច្ចប្រជុំដ៏សំខាន់នេះ ត្រូវបានដឹកនាំដោយលោកសន្តិបណ្ឌិត ម៉ៅ ច័ន្ទតារា រដ្ឋលេខាធិការប្រចាំការក្រសួងមហាផ្ទៃ ដោយមានការចូលរួមពីមន្ត្រីជាន់ខ្ពស់ជាច្រើនរូប រួមមាន៖ រដ្ឋលេខាធិការ អនុរដ្ឋលេខាធិការ អគ្គលេខាធិការ អគ្គនាយក អគ្គនាយករង អភិបាលខេត្តព្រៃវែង ព្រមទាំងមន្ត្រីពាក់ព័ន្ធយ៉ាងច្រើនកុះករ។
ក្នុងនាមជាអគ្គនាយកនៃអគ្គនាយកដ្ឋានរដ្ឋបាល ក្រសួងមហាផ្ទៃ លោក សួស ប្រាថ្នា ក៏បានអញ្ជើញចូលរួមកិច្ចប្រជុំនេះផងដែរ ដើម្បីពិភាក្សា និងផ្តល់យោបល់ល្អៗ។
កិច្ចប្រជុំនេះធ្វើឡើងនៅបន្ទប់ប្រជុំខេត្តសៀមរាប ទីស្ដីការក្រសួងមហាផ្ទៃ ដែលរៀបចំឡើងដោយអគ្គនាយកដ្ឋានរដ្ឋបាល ក្រសួងមហាផ្ទៃផ្ទាល់។ គោលបំណងចម្បងគឺដើម្បីតម្រង់ទិសដល់សមាជិក សមាជិកាគណៈកម្មការ និងអនុគណៈកម្មការ ឱ្យយល់ច្បាស់ពីតួនាទីភារកិច្ចរៀងៗខ្លួន ក្នុងការរៀបចំពិធីដ៏មហោឡារិកនេះ ព្រមទាំងត្រៀមកិច្ចការចាំបាច់នានាដើម្បីធានាបាននូវដំណើរការប្រកបដោយភាពរលូន។
គួរជម្រាបជូនថា ពិធីសម្ពោធដាក់ឱ្យដំណើរការជាផ្លូវការច្រកទ្វារព្រំដែនអន្តរជាតិម៉ឺនជ័យ(ខេត្តព្រៃវែង)-តិនណាម(ខេត្តតៃនិញ) នឹងប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងឯកឧត្តម ផាម មិញជិញ នាយករដ្ឋមន្ត្រីនៃសាធារណរដ្ឋសង្គមនិយមវៀតណាម។
ព្រឹត្តិការណ៍ជាប្រវត្តិសាស្ត្រនេះ គ្រោងនឹងធ្វើឡើងនៅដើមខែធ្នូ ឆ្នាំ២០២៥ ខាងមុខនេះ ដែលនឹងក្លាយជាសមិទ្ធផលថ្មីមួយទៀត ក្នុងការពង្រឹងទំនាក់ទំនង កិច្ចសហប្រតិបត្តិការ និងការសម្រួលដល់ការធ្វើដំណើរ រួមទាំងពាណិជ្ជកម្មរវាងប្រទេសទាំងពីរ កម្ពុជា-វៀតណាម។
ការបើកច្រកទ្វារព្រំដែនអន្តរជាតិនេះ រំពឹងថានឹងនាំមកនូវផលប្រយោជន៍សេដ្ឋកិច្ច និងទេសចរណ៍យ៉ាងច្រើន ដល់ប្រជាពលរដ្ឋនៃប្រទេសទាំងពីរ ក៏ដូចជាជំរុញកំណើន និងការអភិវឌ្ឍន៍រួមគ្នា។
ក្រសួងមហាផ្ទៃប្តេជ្ញាធានាថា ពិធីសម្ពោធនេះនឹងប្រព្រឹត្តទៅដោយរលូន និងជោគជ័យ ដើម្បីជាចំណងដៃមួយបង្ហាញពីចំណងមិត្តភាព និងភាពជាអ្នកជិតខាងល្អរវាងកម្ពុជា និងវៀតណាម។
You can share this post!
