គ្រីស្ទាណូ រ៉ូណាល់ដូ សម្រេចបំណងជួប លោក ដូណាល់ ត្រាំ ផ្ទាល់នៅសេតវិមាន ក្នុងជំនួបដ៏កម្រមួយ!

សហរដ្ឋអាមេរិក ៖ កីឡាករបាល់ទាត់ឆ្នើមលំដាប់ពិភពលោក Cristiano Ronaldo បានសម្រេចបំណងរបស់ខ្លួនហើយ ដោយបានចូលរួមក្នុងពិធីលៀងសាយភោជន៍ដ៏ពិសេសមួយជាមួយអតីតប្រធានាធិបតីសហរដ្ឋអាមេរិក លោក Donald Trump និងព្រះអង្គម្ចាស់ Mohammed bin Salman រាជទាយាទនៃប្រទេសអារ៉ាប៊ីសាអូឌីត។ ជំនួបដ៏កម្រនេះបានកើតឡើងនៅឯសេតវិមាន ទីក្រុងវ៉ាស៊ីនតោន កាលពីថ្ងៃទី១៨ ខែវិច្ឆិកា ឆ្នាំ២០២៥ (ម៉ោងក្នុងស្រុក)។ ដំណឹងនេះត្រូវបានប្រភពពីទីភ្នាក់ងារសារព័ត៌មាន Reuters ចុះផ្សាយនៅថ្ងៃទី១៩ ខែវិច្ឆិកា ឆ្នាំ២០២៥។

ជំនួបដ៏គួរឲ្យចាប់អារម្មណ៍នេះបានកើតឡើងក្នុងអំឡុងពេលព្រះអង្គម្ចាស់ Mohammed bin Salman យាងបំពេញទស្សនកិច្ចផ្លូវការទៅកាន់សហរដ្ឋអាមេរិក។ អ្វីដែលកាន់តែពិសេសនោះ គឺនេះជាការសម្រេចបំណងរបស់ Ronaldo ដែលកាលពីដើមខែវិច្ឆិកា រូបគេបានប្រកាសជាសាធារណៈថា ចង់ជួបផ្ទាល់ជាមួយលោក Donald Trump ដើម្បីពិភាក្សាអំពីសន្តិភាពពិភពលោក។

នៅក្នុងពិធីដ៏ឱឡារិកនោះ លោក Trump បានថ្លែងសុន្ទរកថាអរគុណដល់ភ្ញៀវកិត្តិយសទាំងអស់ រួមទាំង Ronaldo ផងដែរ។ មិនតែប៉ុណ្ណោះ លោកថែមទាំងបានណែនាំកូនប្រុសពៅរបស់លោក Barron Trump ឲ្យស្គាល់កំពូលកីឡាកររូបនេះ ដោយបន្ថែមថា កូនប្រុសរបស់លោកមានការចាប់អារម្មណ៍យ៉ាងខ្លាំងចំពោះជំនួបនេះ។

ទោះបីជាមន្ត្រីសេតវិមានមិនបានបញ្ជាក់ថា Ronaldo ជាផ្នែកមួយនៃគណៈប្រតិភូផ្លូវការរបស់ព្រះអង្គម្ចាស់ Mohammed bin Salman ក៏ដោយ ក៏វត្តមានរបស់គេត្រូវបានគេមើលឃើញថា កើតចេញពីតួនាទីដ៏លេចធ្លោរបស់ខ្សែប្រយុទ្ធព័រទុយហ្គាល់វ័យ ៤០ ឆ្នាំរូបនេះ នៅក្នុងលីគបាល់ទាត់កំពូលអារ៉ាប៊ីសាអូឌីត (SPL)។ នេះបានធ្វើឲ្យ Ronaldo ក្លាយជាមុខមាត់ដ៏សំខាន់មួយក្នុងការជំរុញទំនើបកម្មរបស់ប្រទេសអារ៉ាប៊ីសាអូឌីត ក្រោមការដឹកនាំរបស់ព្រះអង្គម្ចាស់ Mohammed bin Salman ដែលមានបំណងកាត់បន្ថយការពឹងផ្អែកខ្លាំងលើប្រាក់ចំណូលប្រេង ដោយធ្វើពិពិធកម្មវិស័យផ្សេងទៀត រួមទាំងកីឡា និងទេសចរណ៍។

ជាក់ស្តែង ក្លិបនានានៅ SPL បានវិនិយោគទឹកប្រាក់ជាង ៣ ពាន់លានដុល្លារអាមេរិក ដើម្បីចុះហត្ថលេខានាំយកកីឡាករល្អបំផុតមួយចំនួននៅលើពិភពលោក មកជំរុញលីគក្នុងស្រុកឲ្យកាន់តែមានភាពលេចធ្លោ។ ក្នុងចំណោមកីឡាករល្បីៗទាំងនោះ Ronaldo បានចុះកុងត្រារយៈពេល ២ ឆ្នាំកន្លះ ក្នុងតម្លៃ ៥៣៦.៣ លានដុល្លារ ដើម្បីចូលរួមជាមួយក្រុម Al Nassr មិនយូរប៉ុន្មានបន្ទាប់ពីបញ្ចប់ការប្រកួត World Cup ឆ្នាំ ២០២២ នៅកាតា។ អតីតខ្សែប្រយុទ្ធឆ្នើមរបស់ Sporting Lisbon, Manchester United, Real Madrid និង Juventus រូបនេះ ក៏បានចុះបន្តកុងត្រារយៈពេល ២ ឆ្នាំទៀត កាលពីរដូវក្តៅនេះ ក្នុងតម្លៃ ៧១០ លានដុល្លារ ដើម្បីបន្តអាជីពជាមួយ Al Nassr យ៉ាងហោចណាស់ដល់រដូវកាល ២០២៦-២៧។ ក្លិប Al Nassr គឺជាក្លិបមួយក្នុងចំណោម ៤ ក្លិបនៅលីគកំពូលអារ៉ាប៊ីសាអូឌីត ដែលស្ថិតក្រោមការគ្រប់គ្រងដោយមូលនិធិវិនិយោគសាធារណៈអារ៉ាប៊ីសាអូឌីត (PIF) ដែលជាមូលនិធិវិនិយោគសាធារណៈធំជាងគេបំផុតមួយនៅលើពិភពលោក ជាមួយទ្រព្យសកម្មសរុបប្រមាណ ៩៤១ ពាន់លានដុល្លារអាមេរិក។

សូមជម្រាបថា Cristiano Ronaldo នឹងបង្ហាញវត្តមានសម្រាប់ព្រឹត្តិការណ៍បាល់ទាត់ពិភពលោក FIFA World Cup ជាលើកទី ៦ បន្ទាប់ពីព័រទុយហ្គាល់បានកក់កៅអីនៅព្រឹត្តិការណ៍ឆ្នាំក្រោយ ដែលសហរដ្ឋអាមេរិក កាណាដា និងម៉ិកស៊ិក ធ្វើជាសហម្ចាស់ផ្ទះ។ ការប្រកួតនឹងប្រព្រឹត្តទៅចាប់ពីថ្ងៃទី ១១ ខែមិថុនា ដល់ថ្ងៃទី ១៩ ខែកក្កដា ឆ្នាំ ២០២៦ ហើយគេរំពឹងថា នឹងក្លាយជាការបង្ហាញខ្លួនចុងក្រោយរបស់គេសម្រាប់ពានរង្វាន់កំពូលមួយនេះ មុននឹងចូលនិវត្តន៍ពីអាជីពបាល់ទាត់ដ៏អស្ចារ្យរបស់ខ្លួន។