ជប៉ុនងាកមករកតៃវ៉ាន់៖ តើមានអ្វីនៅពីក្រោយការគាំទ្រចំពេលចិន-ជប៉ុនកំពុងឡើងកម្ដៅ?

ព័ត៌មានចុងក្រោយពី Reuters, Time Magazine និង The Guardian បានបង្ហាញថា ការគាំទ្រកាន់តែខ្លាំងឡើងរបស់ជប៉ុនចំពោះតៃវ៉ាន់ គឺផ្តើមចេញពីកង្វល់យ៉ាងជ្រាលជ្រៅចំពោះសន្តិសុខជាតិរបស់ខ្លួន។ ថ្មីៗនេះ ភាពតានតឹងរវាងទីក្រុងតូក្យូ និងទីក្រុងប៉េកាំងបានឡើងកម្ដៅខ្លាំង បន្ទាប់ពីនាយករដ្ឋមន្ត្រីជប៉ុនបានថ្លែងជាសាធារណៈថា ប្រទេសជប៉ុនអាចនឹងបញ្ជូនកងទ័ពរបស់ខ្លួន ប្រសិនបើសង្គ្រាមផ្ទុះឡើងនៅច្រកសមុទ្រតៃវ៉ាន់។

(រូបភាព៖ Shutterstock)សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

**ហេតុអ្វីបានជាជប៉ុនឈរជើងគាំទ្រតៃវ៉ាន់ ទាំងភាពតានតឹងជាមួយចិននៅតែបន្តកើនឡើងបែបនេះ?**

សម្រាប់ទីក្រុងតូក្យូ ជម្លោះណាមួយនៅក្នុងច្រកសមុទ្រតៃវ៉ាន់ ត្រូវបានចាត់ទុកថាជាការគំរាមកំហែងដោយផ្ទាល់។ កោះជាច្រើនរបស់ជប៉ុនស្ថិតនៅចម្ងាយប្រហែលត្រឹមតែ ១២០ គីឡូម៉ែត្រពីតៃវ៉ាន់ ដែលមានន័យថាការវាយប្រហាររបស់ចិនអាចជះឥទ្ធិពលយ៉ាងឆាប់រហ័សដល់ទឹកដីជប៉ុន និងរំខានដល់ផ្លូវដឹកជញ្ជូនដ៏សំខាន់សម្រាប់សេដ្ឋកិច្ចរបស់ជប៉ុន។ ឯកសារសន្តិសុខជាតិចុងក្រោយបង្អស់របស់ជប៉ុន ក៏បានចាត់ទុកវិបត្តិតៃវ៉ាន់ថាជាហានិភ័យយុទ្ធសាស្ត្រដ៏ធ្ងន់ធ្ងរបំផុតមួយរបស់ប្រទេសផងដែរ。

ជប៉ុនក៏ត្រូវបានជះឥទ្ធិពលយ៉ាងខ្លាំងដោយភាពជាដៃគូសន្តិសុខរបស់ខ្លួនជាមួយសហរដ្ឋអាមេរិក ដែលជាអ្នកគាំទ្រដ៏រឹងមាំបំផុតរបស់តៃវ៉ាន់។ អ្នកវិភាគបានប្រាប់ទីភ្នាក់ងារសារព័ត៌មាន Reuters ថា ប្រសិនបើសហរដ្ឋអាមេរិកចូលរួមក្នុងជម្លោះតៃវ៉ាន់ ជប៉ុនអាចនឹងចូលរួមផងដែរ ទោះមិនចាំបាច់ជាមួយកងទ័ពប្រយុទ្ធក៏ដោយ ក៏តាមរយៈការចែករំលែកព័ត៌មានស៊ើបការណ៍សម្ងាត់ ការគាំទ្រផ្នែកភស្តុភារ និងការអនុញ្ញាតឱ្យកងកម្លាំងអាមេរិកធ្វើប្រតិបត្តិការពីមូលដ្ឋានទ័ពរបស់ជប៉ុន។

ក្រុមកោះដែលមានជម្លោះនៅសមុទ្រចិនខាងកើតត្រូវបានគេស្គាល់ថាជាកោះSenkakuនៅប្រទេសជប៉ុន និងកោះDiaoyuនៅប្រទេសចិន។ (រូបភាព៖ Reuters)

ទីក្រុងតូក្យូថ្មីៗនេះបានពង្រឹងការបញ្ចេញមតិរបស់ខ្លួន ខណៈដែលភាពតានតឹងកាន់តែកើនឡើង។ បន្ទាប់ពីនាយករដ្ឋមន្ត្រីជប៉ុន លោកស្រី Sanae Takaichi បានលើកឡើងថា ជប៉ុនអាចនឹងដាក់ពង្រាយយោធារបស់ខ្លួន ប្រសិនបើសង្គ្រាមផ្ទុះឡើងនៅច្រកសមុទ្រតៃវ៉ាន់ ប្រទេសចិនបានថ្កោលទោសទីក្រុងតូក្យូយ៉ាងខ្លាំង ដោយព្រមានថា ជប៉ុនអាច «ប្រែក្លាយប្រទេសទាំងមូលទៅជាសមរភូមិ» ប្រសិនបើខ្លួនធ្វើអន្តរាគមន៍។ កាសែត The Guardian បានលើកឡើងថា ប្រទេសជប៉ុនកំពុងព្យាយាមកាត់បន្ថយជម្លោះជាមួយប្រទេសចិន ប៉ុន្តែក្នុងពេលជាមួយគ្នានេះ ខ្លួនក៏កំពុងត្រៀមខ្លួនសម្រាប់គ្រាអាសន្នដែលអាចកើតមានផងដែរ។ នេះរួមបញ្ចូលទាំងការធ្វើផែនការជម្លៀសពលរដ្ឋជប៉ុនដែលរស់នៅក្បែរតៃវ៉ាន់ ប្រសិនបើមានវិបត្តិកើតឡើង។

យោងតាម Time Magazine ការគាំទ្ររបស់ជប៉ុនចំពោះតៃវ៉ាន់ ក៏ជាផ្នែកមួយនៃយុទ្ធសាស្ត្រទូលំទូលាយជាងមុន ដើម្បីទប់ទល់នឹងឥទ្ធិពលយោធាដែលកំពុងកើនឡើងរបស់ចិននៅក្នុងតំបន់។ ជប៉ុនជួយតៃវ៉ាន់ឱ្យកាន់តែរឹងមាំ ទាំងផ្នែកនយោបាយ សេដ្ឋកិច្ច និងការពារជាតិ ពីព្រោះតៃវ៉ាន់ដែលមានស្ថិរភាព នឹងជួយរក្សាតំបន់ឱ្យមានសុវត្ថិភាព។

សរុបមក ជប៉ុនគាំទ្រតៃវ៉ាន់មិនត្រឹមតែដោយសារតែវាឱ្យតម្លៃដល់លទ្ធិប្រជាធិបតេយ្យប៉ុណ្ណោះទេ ប៉ុន្តែក៏ដោយសារតែវាការពារសន្តិសុខរបស់ជប៉ុន រក្សាតំបន់ឱ្យមានស្ថិរភាព និងស្របទៅនឹងភាពជាដៃគូរបស់ជប៉ុនជាមួយសហរដ្ឋអាមេរិក។

ប្រធានាធិបតីចិនលោក ស៊ីជីនពីង និងនាយករដ្ឋមន្រ្តីជប៉ុនលោកស្រី Sanae Takaichi (រូបភាព៖ Kyodo)

អត្ថបទ៖ ប៊ុន សុភាព