By កំពូលកីឡាករបាល់ទាត់លំដាប់ពិភពលោក Cristiano Ronaldo បានបង្កភាពភ្ញាក់ផ្អើលយ៉ាងខ្លាំង បន្ទាប់ពីរូបលោកបានបង្ហាញខ្លួនក្នុងអាហារពេលល្ងាចដ៏ប្រណីតមួយនៅសេតវិមាន ដែលរៀបចំឡើងដោយអតីតប្រធានាធិបតីអាមេរិក លោក Donald Trump។ ក្នុងព្រឹត្តិការណ៍នោះ លោក Ronaldo បានជួប និងថតរូប Selfie យ៉ាងជិតស្និទ្ធជាមួយមហាសេដ្ឋីបច្ចេកវិទ្យា Elon Musk រួមទាំងឥស្សរជនសំខាន់ៗជាច្រើនទៀតពីជុំវិញពិភពលោក។
កីឡាករព័រទុយហ្គាល់វ័យ ៤០ ឆ្នាំរូបនេះ បានអញ្ជើញចូលរួមជាមួយគូដណ្តឹងដ៏ស្រស់ស្អាតរបស់លោក Georgina Rodriguez ដើម្បីចូលរួមក្នុងពិធីទទួលស្វាគមន៍ព្រះអង្គម្ចាស់រាជទាយាទអារ៉ាប៊ីសាអូឌីត Mohammed bin Salman មកកាន់ទីក្រុង Washington DC។
ក្នុងឱកាសនោះ លោក Donald Trump ក៏បានថ្លែងការកោតសរសើរដល់ Cristiano Ronaldo ក្នុងសុន្ទរកថារបស់លោកផងដែរ។ អាហារពេលល្ងាចនេះពិតជាមានភាពអធិកអធមខ្លាំង ដោយមានការចូលរួមពីតារាល្បីៗ មហាសេដ្ឋី និងឥស្សរជនសំខាន់ៗបំផុតនៅលើពិភពលោកជាច្រើនរូប។
នៅយប់ថ្ងៃអង្គារ បន្ទាប់ពីកម្មវិធី លោក David Sacks ដែលជាស្ថាបនិកបច្ចេកវិទ្យា និងអ្នកវិនិយោគដ៏ល្បី បានបង្ហោះរូប Selfie ពីក្នុងព្រឹត្តិការណ៍នេះ។ ក្នុងរូបភាពនោះ រួមមាន Ronaldo, Sacks, Musk, ប្រធាន FIFA លោក Gianni Infantino, Rodriguez និងរដ្ឋលេខាធិការពាណិជ្ជកម្មអាមេរិក លោក Howard Lutnick។
បច្ចុប្បន្ន Ronaldo កំពុងលេងឱ្យក្លឹប Al-Nassr ក្នុងលីគ Saudi Pro League ហើយលោកបានចូលរួមជាផ្នែកមួយនៃគណៈប្រតិភូដែលមកទស្សនកិច្ច ដោយស្លៀកអាវយឺតខ្មៅ និងអង្គុយជាមួយមហាសេដ្ឋី Elon Musk និងអនុប្រធានាធិបតី JD Vance។ ក្នុងចំណោមអ្នកចូលរួមល្បីៗផ្សេងទៀត ក៏មានលោក Donald Trump Jr., រដ្ឋមន្ត្រីការបរទេស Marco Rubio, ប្រធានសភា Mike Johnson និងនាយកប្រតិបត្តិក្រុមហ៊ុន Apple លោក Tim Cook ផងដែរ។
