By ពិព័រណ៍យន្តហោះលំដាប់ពិភពលោក DUBAI AIRSHOW 2025 ដ៏អធិកអធមបានចាប់ផ្ដើមហើយនៅទីក្រុងឌូបៃ ដោយមានការចូលរួមពីក្រុមហ៊ុនផលិតយន្តហោះជាង ១៥០០ មកពី ១១៥ ប្រទេស និងនាំយន្តហោះជាង ២០០ គ្រឿងមកដាក់តាំងបង្ហាញយ៉ាងត្រចះត្រចង់។
ក្នុងឱកាសដ៏សំខាន់នេះ រុស្ស៊ីបានឆក់យកចំណាប់អារម្មណ៍ពិភពលោក ដោយលើកយកយន្តហោះប្រយុទ្ធបំបាំងកាយជំនាន់ទី ៥ ដ៏ទំនើបចុងក្រោយរបស់ខ្លួន គឺធុន SU-57 ដែលផលិតដោយក្រុមហ៊ុន UNITED AIRCRAFT CORPORATION មកបង្ហាញជាសាធារណៈជាលើកដំបូង។ អ្វីដែលកាន់តែពិសេស គឺរុស្ស៊ីបានបង្ហាញនូវបណ្ដាឧបករណ៍សម្ងាត់ដែលខ្លួនបានលាក់បាំងអស់ជាច្រើនឆ្នាំ ក៏ត្រូវបានទម្លាយក្នុងពេលនេះផងដែរ រួមមានមីស៊ីលអាកាសទៅអាកាស និងមីស៊ីលអាកាសទៅដីជាច្រើនប្រភេទ។
យន្តហោះ SU-57E ត្រូវបានគេដឹងថាជាម៉ូដែលដែលកែច្នៃឡើងសម្រាប់ការនាំចេញ។ វីដេអូ និងរូបភាពដែលបានចេញផ្សាយរួចមកហើយនៃយន្តហោះប្រដេញនេះ បានធ្វើឲ្យទស្សនាវដ្ដីយោធា MILITARY WATCH មានការចាប់អារម្មណ៍យ៉ាងខ្លាំង ជាពិសេសលើប្រព័ន្ធអាវុធរបស់វា ដែលរួមមានមីស៊ីលថ្មី KH-58USHKE សម្រាប់ទប់ទល់នឹងប្រព័ន្ធការពារអាកាសរបស់សត្រូវ។ មិនតែប៉ុណ្ណោះ យន្តហោះប្រយុទ្ធបំបាំងកាយ F-35 របស់អាមេរិកក៏មានវត្តមានក្នុងការហោះហើរសម្ដែងឫទ្ធិក្នុងពិព័រណ៍នេះដែរ។ បច្ចុប្បន្ន F-35 បានដាក់លក់លើទីផ្សារគ្រឿងសព្វាវុធរួចហើយ ក្នុងតម្លៃប្រមាណ ១០០ លានដុល្លារក្នុងមួយគ្រឿង។ រីឯ SU-57E របស់រុស្ស៊ីនៅមិនទាន់បានដាក់លក់នៅឡើយ ហើយតម្លៃរបស់វាក៏មិនទាន់ត្រូវបានប្រកាសជាសាធារណៈដែរ។
