By នៅខេត្តស្វាយរៀង កម្លាំងសមត្ថកិច្ចបានបើកប្រតិបត្តិការដ៏ក្ដៅគគុកមួយ ដោយចុះបង្ក្រាបទីតាំងសង្ស័យចំនួន២កន្លែងនៅក្រុងបាវិត និងឈានដល់ការចាប់ខ្លួនជនជាតិវៀតណាមចំនួន៣០នាក់ ដែលជាប់ពាក់ព័ន្ធនឹងបទល្មើសឆបោកតាមប្រព័ន្ធបច្ចេកវិទ្យាអនឡាញ (Online Scam)។ ទីតាំងដែលត្រូវបានឆែកឆេររួមមាន ផ្ទះល្វែងលេខ F23 ក្នុងបុរី លី ចូវ និងកាស៊ីណូហេងៗ២ ស្ថិតក្នុងសង្កាត់បាវិត ក្រុងបាវិត។ ការចុះបង្ក្រាបនេះ គឺធ្វើឡើងក្រោមការសង្ស័យថា មានការលួចលាក់ប្រព្រឹត្តអំពើឆបោកតាមប្រព័ន្ធអនឡាញយ៉ាងគគ្រឹកគគ្រេង។
ក្នុងប្រតិបត្តិការដ៏សស្រាក់សស្រាំនេះ សមត្ថកិច្ចបានដកហូតវត្ថុតាងជាច្រើនសន្ធឹកសន្ធាប់ រួមមាន កុំព្យូទ័រលើតុ (All in one) ចំនួន ១១៥គ្រឿង, កុំព្យូទ័រយួរដៃចំនួន ២គ្រឿង, ធុងPC ចំនួន ១០គ្រឿង, ទូរសព្ទចំនួន ៧គ្រឿង, Monitor ចំនួន ១៥គ្រឿង, ទូទូរសព្ទ (Call Center) ចំនួន ១៦ទូ និងលិខិតឆ្លងដែនចំនួន ៦ក្បាល ។
ប្រភពពីសមត្ថកិច្ចបានឲ្យដឹងថា ប្រតិបត្តិការនេះត្រូវបានដឹកនាំធ្វើឡើងនៅថ្ងៃទី១៧ ខែវិច្ឆិកា ឆ្នាំ២០២៥ ក្រោមការសម្របសម្រួលពីលេខាធិការដ្ឋាននៃគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប.)។ ក៏មានការចូលរួមយ៉ាងសកម្មពីអគ្គស្នងការដ្ឋាននគរបាលជាតិ គណៈបញ្ជាការឯកភាពខេត្តស្វាយរៀង និងអាជ្ញាធរពាក់ព័ន្ធក្នុងខេត្ត ដែលបានចុះត្រួតពិនិត្យនៅទីតាំងសង្ស័យទាំងពីរ រហូតឈានដល់ការឃាត់ខ្លួនជនសង្ស័យដែលជាប់ពាក់ព័ន្ធនឹងការប្រព្រឹត្តបទល្មើសឆបោកខាងលើនេះ។
ក្នុងចំណោមជនសង្ស័យទាំង ៣០នាក់ មាន ២១នាក់ជាមុខសញ្ញាចាស់ ដែលធ្លាប់ធ្វើសកម្មភាពឆបោកតាមរយៈរូបភាពបោកបញ្ឆោតជនរងគ្រោះឲ្យដាក់ទុនវិនិយោគលើគម្រោងក្លែងក្លាយ និងលួងលោមឲ្យដំឡើងកម្មវិធីផ្សេងៗ ដើម្បីចូលគ្រប់គ្រងព័ត៌មានអត្តសញ្ញាណ និងគណនីធនាគាររបស់ជនរងគ្រោះ។ ក្រោយការបង្ក្រាបដ៏ជោគជ័យនេះ សមត្ថកិច្ចជំនាញកំពុងសហការជាមួយភាគីពាក់ព័ន្ធ ដើម្បីបន្តស្រាវជ្រាវឲ្យស៊ីជម្រៅបន្ថែមទៀត ឈានទៅចាត់វិធានការផ្លូវច្បាប់ចំពោះមេខ្លោងធំៗនៃការឆបោកតាមប្រព័ន្ធបច្ចេកវិទ្យានេះ។ បច្ចុប្បន្ន ជនសង្ស័យ និងវត្ថុតាងទាំងអស់ត្រូវបានប្រគល់ជូនស្នងការដ្ឋាននគរបាលខេត្តស្វាយរៀង និងសមត្ថកិច្ចពាក់ព័ន្ធ ដើម្បីអនុវត្តតាមនីតិវិធីច្បាប់ ចំណែកឯទីតាំងដែលបានប្រព្រឹត្តបទល្មើសត្រូវបានបិទជាបណ្ដោះអាសន្ន។
ជាការបញ្ជាក់បន្ថែម ក្នុងក្របខណ្ឌយុទ្ធនាការបោសសម្អាតការឆបោកតាមប្រព័ន្ធបច្ចេកវិទ្យានេះ សមត្ថកិច្ចចម្រុះទូទាំងប្រទេសនឹងបន្តចាត់វិធានការតាមផ្លូវច្បាប់យ៉ាងម៉ឺងម៉ាត់ និងតឹងរ៉ឹងបំផុតចំពោះមេខ្លោងទាំងឡាយណាដែលជាប់ពាក់ព័ន្ធនឹងអំពើឆបោកតាមប្រព័ន្ធបច្ចេកវិទ្យានេះ ដោយពុំមានការលើកលែងឡើយ ដើម្បីធានានូវសន្តិសុខសង្គម និងការពារប្រជាពលរដ្ឋពីក្រុមទុច្ចរិត។
