វេណេស៊ុយអេឡាប្រមូលផ្តុំរាប់ពាន់នាក់ តវ៉ាប្រឆាំងការគំរាមកំហែងពីសហរដ្ឋអាមេរិក

ប្រជាជនវេណេស៊ុយអេឡារាប់ពាន់នាក់បានដង្ហែក្បួនទូទាំងប្រទេស ដើម្បីតវ៉ាប្រឆាំងនឹងការគំរាមកំហែងកាន់តែខ្លាំងឡើងរបស់សហរដ្ឋអាមេរិក និងបង្ហាញការគាំទ្រដល់ប្រធានាធិបតី Nicolas Maduro។

ហ្វូងមនុស្សជាច្រើនបានប្រមូលផ្ដុំគ្នានៅទីក្រុងការ៉ាកាស ដោយកាន់ទង់ជាតិវេណេស៊ុយអេឡាធំៗ និងថ្កោលទោសការវាយប្រហារថ្មីៗពីយោធាសហរដ្ឋអាមេរិកនៅក្នុងតំបន់ការ៉ាបៀន។ អ្នកគាំទ្ររដ្ឋាភិបាល ប៉ូលិស ទាហាន បានចូលរួមក្នុងការដង្ហែក្បួននេះ ដើម្បីបង្ហាញថា ប្រជាជនវេណេស៊ុយអេឡារួបរួមគ្នាប្រឆាំងនឹងការជ្រៀតជ្រែកពីបរទេស។

ជាការឆ្លើយតប ប្រធានាធិបតី Maduro បានកោះហៅកងទ័ពនិងកងកម្លាំងសន្តិសុខចំនួន ៤.៥ លាននាក់ ហើយបាននិយាយថា ប្រទេសវេណេស៊ុយអេឡាបានត្រៀមខ្លួនរួចជាស្រេចដើម្បីការពារខ្លួនពី «ការវាយប្រហារណាមួយ»។