ហ្សេលេនស្គីបញ្ជាក់ផែនការសន្តិភាពត្រាំមិនមាន២៨ចំណុចទៀត ត្រូវកាត់ចោលលក្ខខណ្ឌខ្លះ

ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី បានបញ្ជាក់ថា ផែនការសន្តិភាព២៨ចំណុចដើមរបស់លោក ដូណាល់ ត្រាំ ត្រូវបានកែសម្រួលយ៉ាងខ្លាំង ដោយលក្ខខណ្ឌមួយចំនួនត្រូវបានដកចេញពីសេចក្តីព្រាងចុងក្រោយ។

លោកហ្សេលេនស្គីបានលើកឡើងថា ឯកសារនេះឥឡូវ«មិនមាន»២៨ចំណុចទៀតទេ ហើយបានឆ្លុះបញ្ចាំងពី«ចំណុចត្រឹមត្រូវជាច្រើន»។ ទោះបីជាយ៉ាងណាក៏ដោយ លោកបានទទួលស្គាល់ថា អ្នកចរចានៅតែប្រឈមមុខនឹងការងារ«ដ៏លំបាកខ្លាំង»។

«អ៊ុយក្រែននឹងមិនក្លាយជាឧបសគ្គដល់សន្តិភាពឡើយ» លោកហ្សេលេនស្គីបានបញ្ជាក់ ដោយបន្ថែមថា ទីក្រុងកៀវត្រៀមខ្លួនរួចជាស្រេចក្នុងការធ្វើការ«ឲ្យបានលឿនបំផុតតាមដែលអាចធ្វើទៅបាន»។

បញ្ហាដ៏ចម្រូងចម្រាសបំផុត រួមទាំងការទាមទារឲ្យអ៊ុយក្រែនកាត់ទឹកដី និងបោះបង់ចោលបំណងចូលជាសមាជិកណាតូ ត្រូវបានទុកសម្រាប់កិច្ចពិភាក្សាផ្ទាល់រវាងលោកហ្សេលេនស្គី និងលោកត្រាំ។

រុស្ស៊ីបានច្រានចោលសំណើកែប្រែរបស់អឺរ៉ុប ដោយចាត់ទុកថា«គ្មានលក្ខណៈស្ថាបនាសោះឡើយ» ខណៈអាមេរិកបានជំរុញឲ្យអ៊ុយក្រែនទទួលយកសំណើរបស់ខ្លួន។