By (ភ្នំពេញ)៖ មន្ទីរពេទ្យមិត្តភាពខ្មែរ-សូវៀត បានសម្ពោធដាក់ឱ្យដំណើរការម៉ាស៊ីនឆ្លុះទងសួតទំនើបចុងក្រោយបង្អស់ (Bronchoscope Olympus EVIS X1) នៅថ្ងៃទី២៥ ខែវិច្ឆិកា ឆ្នាំ២០២៥។
ពិធីសម្ពោធដាក់ឱ្យប្រើប្រាស់ជាផ្លូវការនេះ បានធ្វើឡើងក្រោមអធិបតីភាពលោកសាស្ត្រចារ្យ ចាន់ វិចិត្រ នាយករងមន្ទីរពេទ្យ។ លោកបានថ្លែងថា ម៉ាស៊ីនថ្មីនេះនឹងជួយក្រុមគ្រូពេទ្យឯកទេសជំងឺសួត ក្នុងការធ្វើរោគវិនិច្ឆ័យបានច្បាស់លាស់ និងទាន់ពេលវេលា។
លោកសាស្ត្រចារ្យ ចាន់ វិចិត្រ បានគូសបញ្ជាក់ថា៖ «ម៉ាស៊ីនឆ្លុះទងសួតដ៏ទំនើបនេះ នឹងជួយធ្វើឱ្យមជ្ឈមណ្ឌលឯកទេសជំងឺសួត ក្លាយទៅជាមជ្ឈមណ្ឌលឯកទេសព្យាបាលជំងឺសួតឈានមុខនៅកម្ពុជា»។
លោកវេជ្ជបណ្ឌិតឯកទេស វ៉ា ម៉េង នាយកមជ្ឈមណ្ឌលឯកទេសជំងឺសួត ក៏បានថ្លែងអំណរគុណដល់រាជរដ្ឋាភិបាលកម្ពុជា និងក្រសួងសុខាភិបាល ដែលបានផ្តល់ការឧបត្ថម្ភយ៉ាងពេញលេញ។
ក្រុមគ្រូពេទ្យ និងបុគ្គលិកទាំងអស់បានត្រៀមលក្ខណៈរួចរាល់ជាស្រេច សម្រាប់ការបណ្តុះបណ្តាលបច្ចេកទេសទាំងក្នុង និងក្រៅប្រទេស ដើម្បីប្រើប្រាស់បច្ចេកទេសវិទ្យានេះប្រកបទៅដោយក្រមសីលធម៌ និងវិជ្ជាជីវៈខ្ពស់។
ការសម្ពោធដាក់ឱ្យដំណើរការម៉ាស៊ីនឆ្លុះទងសួតទំនើបនេះ ត្រូវបានរំពឹងថានឹងបង្កើនប្រសិទ្ធភាពក្នុងការព្យាបាលជំងឺសួត និងជួយបម្រើសេវាសុខាភិបាលជូនប្រជាជនកម្ពុជាកាន់តែមានគុណភាពខ្ពស់។
