ក្រសួងការងារដឹកនាំកិច្ចប្រជុំវាយតម្លៃគម្រោងរោងចក្រកាន់តែប្រសើរ ក្នុងគោលបំណងលើកកម្ពស់ស្តង់ដារការងារ

ភ្នំពេញ៖ លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានដឹកនាំកិច្ចប្រជុំលើកទី៣ នៃភាគីហត្ថលេខីអនុស្សរណៈនៃការយោគយល់គ្នាស្ដីពីគម្រោងរោងចក្រកាន់តែប្រសើរនៅកម្ពុជា ឆ្នាំ២០២៣-២០២៧ នៅព្រឹកថ្ងៃទី២៦ ខែវិច្ឆិកា ឆ្នាំ២០២៥។

កិច្ចប្រជុំនេះមានការចូលរួមពីតំណាងក្រសួងពាណិជ្ជកម្ម សមាគមវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា (TAFTAC) និងតំណាងអង្គការអន្តរជាតិខាងការងារ (ILO)។

តាមរយៈកិច្ចប្រជុំ ភាគីហត្ថលេខីបានផ្តល់ការគាំទ្រនូវទិសដៅអាទិភាពសម្រាប់ឆ្នាំ២០២៦ ដោយផ្ដោតលើការងារសំខាន់ៗរួមមាន ការលើកកម្ពស់សុវត្ថិភាពនិងសុខភាពការងារ កិច្ចសន្ទនាសង្គម សមភាពនិងបរិយាបន្នយេនឌ័រ និងការជំរុញការទូទាត់ប្រាក់ឈ្នួលតាមប្រព័ន្ធឌីជីថល។

លោករដ្ឋមន្ត្រីបានវាយតម្លៃខ្ពស់ចំពោះការខិតខំចូលរួមរបស់ក្រុមការងារគម្រោងរោងចក្រកាន់តែប្រសើរ (ILO-BFC) ដោយក្រសួងពាណិជ្ជកម្មនិងសមាគម TAFTAC សម្រាប់កិច្ចសហការ ការគាំទ្រ និងការចូលរួមអនុវត្តអនុស្សរណៈនៃការយោគយល់គ្នានាពេលកន្លងមកទទួលបានលទ្ធផលល្អ។

លោករដ្ឋមន្ត្រីក៏បានបញ្ជាក់អំពីតួនាទីសំខាន់របស់សមាគមនិយោជក និងសហជីព ក្នុងការលើកកម្ពស់ភាពទាក់ទាញរបស់វិស័យវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូប ក៏ដូចជាវិស័យពាក់ព័ន្ធនានានៅកម្ពុជា។

កិច្ចប្រជុំនេះមានគោលបំណងពិនិត្យលើវឌ្ឍនភាព បញ្ហាប្រឈម និងទិសដៅការងាររបស់គម្រោងរោងចក្រកាន់តែប្រសើរនៅកម្ពុជា ព្រមទាំងបន្តពង្រឹងកិច្ចសហការរវាងភាគីហត្ថលេខីនៃអនុស្សរណៈនៃការយោគយល់គ្នា។

តាមរយៈការជំរុញការគោរពលក្ខខណ្ឌការងារ និងបង្កើនភាពទាក់ទាញ គម្រោងនេះកំពុងលើកកម្ពស់កិត្យានុភាពរបស់កម្ពុជា ជាប្រភពផ្គត់ផ្គង់ប្រកបដោយទំនុកចិត្តសម្រាប់ម្ចាស់ម៉ាក និងអ្នកបញ្ជាទិញ។

កិច្ចសហការនេះក៏រួមមានការធានាសុខដុមនីយកម្មនៃទំនាក់ទំនងវិជ្ជាជីវៈ តាមរយៈការបណ្ដុះបណ្ដាលសមត្ថភាពរដ្ឋបាលសហគ្រាស ក្រុមហ៊ុន រោងចក្រ ថ្នាក់ដឹកនាំសហជីព និងភាគីពាក់ព័ន្ធ។

កិច្ចប្រជុំបានបញ្ចប់ដោយជោគជ័យ ដោយមានការប្តេជ្ញាចិត្តពីភាគីទាំងអស់ក្នុងការបន្តពង្រឹងកិច្ចសហការ និងអនុវត្តអនុស្សរណៈនៃការយោគយល់គ្នាដើម្បីអភិវឌ្ឍវិស័យឧស្សាហកម្មកម្ពុជាឲ្យកាន់តែប្រសើរ។