ខេត្តព្រះសីហនុសម្របសម្រួលគម្រោងជាប់គាំងជិត២០០គម្រោង បង្កើតការងារ១.៨០០កន្លែង

រដ្ឋបាលខេត្តព្រះសីហនុបានប្រកាសជោគជ័យក្នុងការសម្របសម្រួលគម្រោងជាប់គាំងចំនួន១៨៦គម្រោង ដែលបានស្តារនិងទាក់ទាញការវិនិយោគឡើងវិញ។ កាលពីថ្ងៃទី២៥ ខែវិច្ឆិកា ឆ្នាំ២០២៥ ក្នុងកិច្ចប្រជុំក្រុមការងារ អង្គប្រជុំបានសម្រេចផ្តល់ការលើកទឹកចិត្តពិសេសជូនគម្រោងចំនួន១៩ ដែលមានទុនវិនិយោគប៉ាន់ស្មានសរុប២៧៦លានដុល្លារអាមេរិក និងអាចបង្កើតការងារប្រមាណ១.៨៤៥កន្លែង។

គម្រោងទាំងនេះរួមមានគម្រោងសណ្ឋាគារ អគារពហុមុខងារ រោងចក្រផលិតឧបករណ៍ជួសជុលរថយន្ត សិប្បកម្មផលិតក្តារបន្ទះ រោងចក្រផលិតគ្រឿងសង្ហារឹម រោងចក្រផលិតដំណាប់ផ្លែឈើ និងកែច្នៃគ្រាប់ធញ្ញជាតិ និងគម្រោងរោងចក្រផលិតទឹកស្អាត និងផ្គត់ផ្គង់អគ្គិសនី។

គិតតាំងពីឆ្នាំ២០២៤មកដល់ខែតុលា ឆ្នាំ២០២៥ ក្រុមការងារបានសម្រេចជាគោលការណ៍ផ្តល់ការលើកទឹកចិត្តពិសេសជូនគម្រោងចំនួន៣៩២ ដែលមានទុនវិនិយោគប៉ាន់ស្មានសរុប៧.៨៧១លានដុល្លារ ក្នុងនោះគម្រោងពាក់ព័ន្ធនឹងអគារកំពុងជាប់គាំងមានចំនួន១៨៦ គម្រោងថ្មីមានចំនួន១៦៦ គម្រោងពង្រីកមានចំនួន២៥ និងគម្រោងមានស្រាប់ចំនួន១៥។