អាមេរិករឹតបន្តឹងប័ណ្ណបៃតងលើ១៩ប្រទេស បន្ទាប់ពីការបាញ់សម្លាប់ឆ្មាំជាតិ

សហរដ្ឋអាមេរិកនឹងពិនិត្យឡើងវិញនូវប័ណ្ណបៃតង (Green Cards) សម្រាប់ប្រជាជនមកពីប្រទេសចំនួន ១៩ ដោយចាត់ទុកថា “ជាការព្រួយបារម្ភនិងគ្រោះថ្នាក់” បន្ទាប់ពីការបាញ់សម្លាប់សមាជិកឆ្មាំជាតិ២នាក់នៅទីក្រុងវ៉ាស៊ីនតោន។

លោក Joe Edlow នាយកសេវាកម្មពលរដ្ឋ និងអន្តោប្រវេសន៍អាមេរិក បានបញ្ជាក់ថា ការពិនិត្យឡើងវិញនេះធ្វើឡើងតាមការណែនាំរបស់ប្រធានាធិបតី ដូណាល់ ត្រាំ។ ប្រទេសទាំង ១៩ រួមមាន អាហ្វហ្គានីស្ថាន, ភូមា, ឆាដ, សាធារណរដ្ឋកុងហ្គោ, ហ្គីណេអេក្វាទ័រ, អេរីទ្រា, ហៃទី, អ៊ីរ៉ង់, លីប៊ី, សូម៉ាលី, ស៊ូដង់, យេម៉ែន, ប៊ូរុនឌី, គុយបា, ឡាវ, សៀរ៉ាឡេអូន, តូហ្គោ, តូមិននីស្ថាន និងវេណេស៊ុយអេឡា។

សកម្មភាពនេះកើតឡើងបន្ទាប់ពីអាជ្ញាធរកំណត់អត្តសញ្ញាណជនសង្ស័យក្នុងការបាញ់ប្រហារថាជា រ៉ាម៉ានូឡា ឡាកាន់វ៉ាល ដែលជាពលរដ្ឋអាហ្វហ្គានីស្ថាន។ រដ្ឋបាលលោកត្រាំបានពង្រីកការពិនិត្យឯកសារអន្តោប្រវេសន៍ និងផ្អាកឯកសារទាំងអស់ដែលទាក់ទងនឹងពលរដ្ឋអាហ្វហ្គានីស្ថាន។

ចាប់តាំងពីឆ្នាំ ២០២១ មក ជនជាតិអាហ្វហ្គានីស្ថានជាង ១៩០,០០០ នាក់បានតាំងទីលំនៅថ្មីនៅអាមេរិក។ ប្រធានាធិបតីត្រាំបានចោទប្រកាន់រដ្ឋបាលមុនថា បានដាក់ការគំរាមកំហែងសន្តិសុខជាតិនៅក្នុងប្រទេស។