ទ័ពថៃពង្រឹងកម្លាំងព្រំដែន ឆ្លើយតបការប្រយុទ្ធមីយ៉ាន់ម៉ាកំពុងក្ដៅ

ពេលនេះកងទ័ពថៃនៅឯព្រំដែនថៃ-មីយ៉ាន់ម៉ា កំពុងពង្រឹងកម្លាំងនិងប្រុងជើងការខ្ពស់បំផុត ស្របពេលការប្រយុទ្ធគ្នាក្នុងទឹកដីមីយ៉ាន់ម៉ា ឯណោះកាន់តែខ្លាំងទៅៗមិនថមថយសោះ។

តាមការផ្សាយរបស់ Amarin នៅថ្ងៃព្រហស្បតិ៍ទី២៧ខែវិច្ឆិកាឆ្នាំ២០២៥ ទាហានថៃបានចល័តតាមតំបន់ព្រំដែននិងបង្កើនវត្តមានលើសមុន ព្រោះថា សមរភូមិក្នុងប្រទេសជិតខាងមីយ៉ាន់ម៉ាឯណោះ បានឡើងកម្តៅខ្លាំងទៀតហើយ ពោលគឺកងកម្លាំងរដ្ឋាភិបាល ប្រយុទ្ធជាមួយក្រុមឧទ្ទាមកាន់តែខ្លាំងដៃ ឈានដល់ការប្រើប្រាស់អាវុធធុនធ្ងន់ រួមមានទាំងកាំភ្លើងយន្តថែមទៀតផង។

ការប្រយុទ្ធថ្មីនេះ ផ្ទុះឡើងក្នុងភូមិសាស្រ្ត Pa Sak នៃភូមិ Min La Pan ស្រុក Myawaddy ខេត្ត Myawaddy រដ្ឋការ៉ែន ដែលមានចម្ងាយមិនដល់មួយគីឡូមែត្រផងពីភូមិ Mai Mae Kon Ken ឃុំ Mahawan ស្រុក Mae Sot នៃខេត្ត Tak ប្រទេសថៃ។

ឆ្លើយតបទៅសភាពការណ៍កាន់តែមិនស្រួលនិងមានពេលខ្លះគ្រាប់កាំភ្លើង ហោះធ្លាយចូលដល់ដីថៃ ត្រូវចំផ្ទះពលរដ្ឋផងនោះ កងកម្លាំង Rajamanu ថៃ បានដាក់ពង្រាយទ័ពនិងឃ្លាំមើលសភាពការណ៍យ៉ាងជាប់លាប់ ហើយនឹងបើកឆាកប្រយុទ្ធតែម្តង ប្រសិនបើចាំបាច់។

កាលពីសប្តាហ៍មុន ទាហានមីយ៉ាន់ម៉ានិងក្រុមឧទ្ទាម បានបាញ់តដៃគ្នាយ៉ាងស្វិតស្វាញនៅក្បែរព្រំដែនថៃ ធ្វើឲ្យគ្រាប់កាំភ្លើងបាញ់ធ្លាយចូលដល់ស្រុក Mae Sot ប៉ះត្រូវសាលារៀន Ban Mae Kon Kaen បង្ខំឲ្យមានការជម្លៀសសិស្សយ៉ាងប្រញាប់ និងធ្វើឲ្យថៃក្តៅស្លឹកត្រចៀក។

ក្រោយមក កងកម្លាំង Rajamanu សហការជាមួយ Naresuan ក៏បានបញ្ជូនសព្វាវុធនិងគ្រឿងបរិក្ខាយោធា ទៅព្រំដែនព្រមទាំងបង្កើនការល្បាតទាំងថ្ងៃយប់។

សូមជម្រាបជាថ្មី សមរភូមិនៅមីយ៉ាន់ម៉ា គឺជាការប្រយុទ្ធរវាងកងទ័ពរដ្ឋាភិបាលជាមួយក្រុមឧទ្ទាម ដែលខំការពារពួកឧក្រិដ្ឋជនតាមអនឡាញ នៅតំបន់សេដ្ឋកិច្ចពិសេស KK Park។ កងទ័ពរដ្ឋាភិបាល បានប្តេជ្ញាហើយថា ពួកគេនឹងបើកប្រតិបត្តិការកម្ចាត់ Scammer នៅទីនោះឲ្យក្លាយទីជាផេះ៕