កម្មកររោងចក្របាត់ខ្លួន៤ថ្ងៃ ប្រទះឃើញដេកស្លាប់ក្នុងបន្ទប់ជួលភ្នំពេញ

ភ្នំពេញ៖ កម្មកររោងចក្រម្នាក់ដែលបាត់ខ្លួនរយៈពេល៤ថ្ងៃត្រូវបានគេរកឃើញដេកស្លាប់ក្នុងបន្ទប់ជួល បន្ទាប់ពីមិត្តរួមការងារទាក់ទងមិនឃើញគាត់ទៅធ្វើការ។

ហេតុការណ៍នេះបានកើតឡើងនៅម៉ោង២រសៀលថ្ងៃទី២៨ ខែវិច្ឆិកា ឆ្នាំ២០២៥ នៅបន្ទប់ជួលលេខ២៥ ជាន់ទី២ ភូមិចំការឪឡឹក២ សង្កាត់កាកាបទី២ ខណ្ឌពោធិ៍សែនជ័យ។

ជនរងគ្រោះឈ្មោះ ភិន សុភ័ន ហៅមួង អាយុ៣០ឆ្នាំ ជាកម្មកររោងចក្រដែលមានស្រុកកំណើតនៅខេត្តកំពង់ចាម។ លោកបានបាត់ខ្លួនតាំងពីថ្ងៃទី២៥ ខែវិច្ឆិកា ដោយមិនទៅធ្វើការ។

នៅថ្ងៃទី២៨ មិត្តរួមការងារបានទាក់ទងទៅស្រុកដើម្បីសួរនាំ ប៉ុន្តែទូរសព្ទមិនចូល។ ពួកគេបានទាក់ទងមកអ្នកស្គាល់គ្នាដែលស្នាក់នៅផ្ទះជួលជាមួយ ហើយនាំគ្នាឡើងទៅមើល។ ពេលទៅដល់ឃើញទ្វារដាក់គន្លឹះខាងក្នុង និងធុំក្លិនស្អុយ ពួកគេក៏ទៅប្រាប់ម្ចាស់ផ្ទះ និងគាស់បង្អួចមើល រួចប្រទះឃើញសពដេកស្លាប់ ហើមស្អុយទៅហើយ។

សមត្ថកិច្ចបានចុះទៅត្រួតពិនិត្យ ប៉ុន្តែមិនទាន់ដឹងមូលហេតុនៃការស្លាប់នៅឡើយ។ ការស្លាប់នេះបានបង្កឲ្យមានការភ្ញាក់ផ្អើលយ៉ាងខ្លាំងក្នុងសហគមន៍។