By (រាជធានីភ្នំពេញ)៖ ក្រសួងធនធាតុទឹក និងឧតុនិយម បានចេញព្រមានពីស្ថានភាពអាកាសធាតុដែលនឹងទទួលរងឥទ្ធិពលពីព្យុះទី២៧ ឈ្មោះ ភូតូ (Koto) T2527 ក្នុងកម្រិត ២០% ដែលនឹងធ្វើឱ្យតំបន់ខ្ពង់រាបកម្ពុជាអាចចុះត្រជាក់ដល់ ១៨°C ចាប់ពីថ្ងៃទី ២៨ ដល់ថ្ងៃទី ៣០ ខែវិច្ឆិកា ឆ្នាំ ២០២៥។
ក្រសួងបានបញ្ជាក់ថា ដោយសារសម្ពាធទាបដែលកើតនៅមហាសមុទ្រប៉ាស៊ីហ្វិកខាងលិចនិងសមុទ្រចិនខាងត្បូង បានវិវត្តទៅជាព្យុះភូតូ ហើយមានឥទ្ធិពលខ្លាំងលើរបបខ្យល់មូសុងឦសាន។ ប្រទេសកម្ពុជាដែលស្ថិតនៅក្បែរគន្លងផ្លូវដើររបស់ព្យុះនេះ ទទួលរងឥទ្ធិពលកម្រិត ២០%។
ស្ថានភាពអាកាសធាតុដែលរំពឹងទុក៖
១-តំបន់វាលទំនាប៖
សីតុណ្ហភាពមធ្យមអប្បបរមា ២០°C និងអតិបរមា ៣០°C។ ខ្យល់បក់មកពីទិសឦសាន និងទិសបូពីមានល្បឿនមធ្យម ៥ម៉ែត្រ/វិនាទី។ ខេត្តបន្ទាយមានជ័យ បាត់ដំបង ពោធិ៍សាត់ កំពង់ឆ្នាំង សៀមរាប កំពង់ធំ កំពង់ចាម ត្បូងឃ្មុំ ព្រៃវែង កណ្តាល តាកែវ ស្វាយរៀង និងភ្នំពេញ ពុំមានភ្លៀងធ្លាក់ទេ។
២-តំបន់ខ្ពង់រាប៖
សីតុណ្ហភាពមធ្យមអប្បបរមា ១៨°C និងអតិបរមា ២៨°C។ ខ្យល់បក់មកពីទិសឦសាន និងទិសឧត្តរមានល្បឿនមធ្យម ៥ម៉ែត្រ/វិនាទី។ ខេត្តកំពង់ស្ពឺ ប៉ៃលិន ឧត្តរមានជ័យ ព្រះវិហារ ក្រចេះ ស្ទឹងត្រែង រតនគិរី មណ្ឌលគិរី ជួរភ្នំដងរែក និងតំបន់ជួរភ្នំក្រវាញ ពុំមានភ្លៀងធ្លាក់ទេ។
៣-តំបន់មាត់សមុទ្រ៖
សីតុណ្ហភាពមធ្យមអប្បបរមា ២០°C និងអតិបរមា ៣០°C។ ខ្យល់បក់មកពីទិសឦសាន និងទិសអាគ្នេយ៍មានល្បឿនមធ្យម ៤ម៉ែត្រ/វិនាទី។ ខេត្តកោះកុង ព្រះសីហនុ កំពត កែប និងជួរភ្នំបូកគោ ពុំមានភ្លៀងធ្លាក់ទេ។ រលកសមុទ្រមានកម្ពស់មធ្យមអប្បបរមា ០,៥០ម៉ែត្រ និងអតិបរមា ១,៥០ម៉ែត្រ៕
ប្រភព៖ ក្រសួងធនធាតុទឹក និងឧតុនិយម
