រាជធានីភ្នំពេញ៖ តារាចម្រៀងលោក ម៉ារ៉ា ប៊ុណ្ណា បានទទួលមរណភាពហើយ ដោយសារជំងឺគាំងបេះដូង ក្នុងវ័យ៤០ឆ្នាំ នៅថ្ងៃទី២៨ ខែវិច្ឆិកា ឆ្នាំ២០២៥ នេះ។ សពរបស់លោកត្រូវបានក្រុមគ្រួសារតម្កល់ធ្វើបុណ្យតាមប្រពៃណីនៅក្នុងវត្តពោធិចិនតុង ខណ្ឌពោធិសែនជ័យ។

បើតាមការអោយដឹងពីតារាសម្តែងលោក សាវីន ហ្វីលីព បានអោយដឹងថា តារាចម្រៀង ម៉ារ៉ា ប៊ុណ្ណា បានទទួលមរណៈភាព ក្នុងវ័យជាង៤០ឆ្នាំ ដោយសារជំងឺគាំងបេះដូងនៅក្នុងរថយន្តកាលពីយប់មិញបន្ទាប់ពីចេញពីកម្មវិធីជប់លៀងមួយ។

ដំណឹងមរណភាពរបស់តារាចម្រៀងលោក ម៉ារ៉ា ប៊ុណ្ណា រូបនេះបានធ្វើអោយអ្នកសិល្បៈ និងមហាជនអ្នកគាំទ្រសម្តែងក្តីរន្ធត់យ៉ាងខ្លាំង។ មរណភាពរបស់តារាចម្រៀងរូបនេះគឺរឿងដ៏សោកសៅថ្មីមួយទៀតក្នុងពិភពសិល្បៈខ្មែរ បន្ទាប់ពីតារាចម្រៀងលោក អ៊ុន សិទ្ធា ក៏ទើបតែទទួលមរណភាពទាំងវ័យក្មេងកាលពីពេលថ្មីៗនេះដែរ ដោយសារជំងឺដូចគ្នា។

តារាចម្រៀងលោក ម៉ារ៉ា ប៊ុណ្ណា ត្រូវបានគេចាប់ជាអ្នកសិល្បៈមួយរូបដែលមានភាពល្បីល្បាញគួសមម្នាក់ផងដែរ ដោយនៅក្នុងនោះបទចម្រៀងរបស់លោកដែលមានការពេញនិយមខ្លាំងនោះគឺ «ដីថ្លៃប្រល័យស្នេហ៍»។

គេនៅចាំបានថា កាលពីអំឡុងឆ្នាំ២០១៩ តារាចម្រៀងលោក ម៉ារ៉ា ប៊ុណ្ណា បានរៀបចំធ្វើពិធីកាត់ចំណងដៃអាពាហ៍ពិពាហ៍របស់លោកជាមួយភរិយាដែលជាអតីតពិធីការិនីមួយ នៅក្នុងភោជនីយដ្ឋានមួយនារាជធានីភ្នំពេញ។

ដំណឹងមរណភាពនេះបានធ្វើអោយពិភពសិល្បៈខ្មែរបាត់បង់តារាចម្រៀងមួយរូបដែលមានសមត្ថភាព និងទទួលបានការគោរពស្រលាញ់ពីមហាជន។
