ស្នងការរាជធានីចេញបទបញ្ជាថ្មី បង្ក្រាបក្រុមក្មេងទំនើងយ៉ាងតឹងរ៉ឹង

ឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ នាថ្ងៃទី២៨ ខែវិច្ឆិកា ឆ្នាំ២០២៥ បានចេញបទបញ្ជាជាថ្មីឲ្យកម្លាំងសមត្ថកិច្ចចុះបង្ក្រាបរាល់មុខសញ្ញាក្រុមក្មេងទំនើងក្នុងរាជធានីភ្នំពេញ។

ការដាក់បញ្ជាបន្ទាន់នេះធ្វើឡើងតាមបទបញ្ជារបស់សម្តេចធិបតី ហ៊ុន ម៉ាណែត នាយករដ្ឋមន្ត្រី និងលោក ស សុខា រដ្ឋមន្ត្រីក្រសួងមហាផ្ទៃ បន្ទាប់ពីអំពើហិង្សាដែលបង្កឡើងដោយក្រុមក្មេងទំនើងបានកើតឡើងជាថ្មី។

លោកស្នងការសង្កត់ធ្ងន់ថា លោកប្រកាន់ខ្ជាប់គោលជំហរមិនលើកលែងដាច់ខាតចំពោះក្រុមក្មេងទំនើងទាំងឡាយណាដែលចេញមកបង្កសកម្មភាពអុកឡុកក្នុងសង្គមជាតិ។ លោកក៏អំពាវនាវឲ្យសាធារណជន ពិសេសយុវជន កុំយកខ្លួនបៀតចូលជាមួយបក្ខពួកក្រុមបងតូចបងធំ និងកុំចូលរួមជាមួយសកម្មភាពទំនើង។

លោកស្នងការស្នើឲ្យក្រុមយុវជន បើមិនមានការចាំបាច់នៅពេលយប់ទេសូមចូលទៅតាមលំនៅឋានរៀងៗខ្លួន ជៀសវៀងការប្រមូលផ្តុំតាមទីសាធារណៈ ព្រោះកម្លាំងសមត្ថកិច្ចនឹងចុះព័ទ្ធចាប់សួរនាំរាល់មានការប្រមូលផ្តុំទាំងអស់៕