By កម្លាំងនគរបាលខណ្ឌដង្កោ បានចាប់ខ្លួនក្រុមវាយប្លន់ម៉ូតូចំនួន២នាក់ភ្លាមៗ ក្រោយពីពួកគេវាយប្លន់ម៉ូតូពីនារីម្នាក់បានសម្រេច។ ប្រតិបត្តិការនេះធ្វើឡើងនៅម៉ោង២២:០០យប់ ថ្ងៃទី២៧ ខែវិច្ឆិកា ឆ្នាំ២០២៥ នៅផ្លូវបេតុង ភូមិខ្វា សង្កាត់ដង្កោ។
លោកវរសេនីយ៍ទោ ជាង ហុកសែ អធិការរងនគរបាលដង្កោ បានបញ្ជាក់ថា ជនសង្ស័យគឺ អ៊ុង ធារ៉ា និង ផន បញ្ញា អាយុ១៩ឆ្នាំទាំងពីរ មកពីខេត្តកំពង់ស្ពឺ។ ចំណែកជនរងគ្រោះគឺ រីម គីមហៀក អាយុ១៩ឆ្នាំ ជាកម្មការនីរោងចក្រ។
កាលពីម៉ោង២១:៣០ ថ្ងៃទី២៧ វិច្ឆិកា ក្រុមជនសង្ស័យបានវាយប្លន់ម៉ូតូពីនារីរងគ្រោះនៅចំណុចផ្លូវចូលផ្ទះសំណាក់សុខុម ដោយប្រើដំបងឈើ។ ពួកគេទុកម៉ូតូចាស់ចោល រួចជិះម៉ូតូរបស់ជនរងគ្រោះគេចខ្លួន។ កម្លាំងនគរបាលបានប្រដេញតាមរហូតដល់ចាប់បានទាំងពីរនាក់ និងដកហូតម៉ូតូជនរងគ្រោះមកវិញ។
ក្នុងប្រតិបត្តិការ កម្លាំងជំនាញបានដកហូតម៉ូតូពីរគ្រឿង រួមមានម៉ូតូហុងដាប៊ីតពណ៌សលាយខៀវ និងម៉ូតូហុងដាសេ១២៥ពណ៌ខ្មៅ។ ជនសង្ស័យត្រូវបានឃាត់ខ្លួនដើម្បីកសាងសំណុំរឿងតាមនិតិវិធីច្បាប់។
