By ខេត្តព្រះសីហនុ÷ នៅរសៀលថ្ងៃទី២៨ ខែវិច្ឆិកា ឆ្នាំ២០២៥ លោកឧត្តមសេនីយ៍ត្រី ហេង ប៊ុនទី មេបញ្ជាការកងរាជអាវុធហត្ថខេត្តព្រះសីហនុបានឲ្យដឹងថា ពាក់ព័ន្ធទៅនឹងករណីកម្លាំងកងរាជអាវុធហត្ថខេត្តព្រះសីហនុឃាត់ជនសង្ស័យពាក់ព័ន្ធគ្រឿងញៀនចំនួន១៤៣នាក់នៅក្រុងព្រះសីហនុ ក្រោយបញ្ចប់ការសាកសួរស្រាវជ្រាវតាមនីតិវិធី។
សមត្ថកិច្ចកងរាជអាវុធហត្ថខេត្តបានចាត់ចែងដូចខាងក្រោម៖
១-ជនសង្ស័យចំនួន១៣នាក់ (ជនជាតិខ្មែរ) ពាក់ព័ន្ធនឹងការជួញដូរចែកចាយគ្រឿងញៀនបានបញ្ជូនទៅសាលាដំបូងខេត្តដើម្បីផ្តន្ទាទោសតាមច្បាប់។
២-ជនសង្ស័យចំនួន១២៩នាក់(ជនជាតិខ្មែរ) ពាក់ព័ន្ធនឹងការប្រើប្រាស់ថ្នាំញៀន បញ្ជូនទៅមណ្ឌលអប់រំកែប្រែបន្សាបគ្រឿងញៀននៅកែវផុស ស្រុកស្ទឹងហាវ ខេត្តព្រះសីហនុ ដើម្បីបន្សាបនិងអប់រំបណ្តុះបណ្តាលឲ្យក្លាយជាពលរដ្ឋល្អក្នុងសង្គមជាតិវិញ។
៣-ជនសង្ស័យម្នាក់ទៀត(ជនជាតិបារាំង) ពាក់ព័ន្ធនឹងការប្រើប្រាស់ថ្នាំញៀន រៀបចំនីតិវិធីបណ្តេញចេញពីប្រទេសកម្ពុជា។
គួរបញ្ជាក់ថា ជនសង្ស័យទាំងអស់ត្រូវបានឃាត់ខ្លួនជាបន្តបន្ទាប់តាមសង្កាត់មួយចំនួនក្នុងក្រុងព្រះសីហនុចាប់ពីថ្ងៃទី២៤ដល់ថ្ងៃទី២៧ វិច្ឆិកា ២០២៥ ហើយជនសង្ស័យដែលឃាត់បានច្រើនជាងគេគឺនៅចំណុចភូមិថ្មី សង្កាត់លេខ៣ ក្រុងព្រះសីហនុ កាលពីយប់ថ្ងៃទី២៤ ខែវិច្ឆិកា ឆ្នាំ២០២៥។
លោកឧត្តមសេនីយ៍ត្រី ហេង ប៊ុនទី មេបញ្ជាការបានបញ្ជាកម្លាំងកងរាជអាវុធហត្ថខេត្ត ដឹកនាំដោយលោកវរសេនីយ៍ត្រី ឡុង គីមហួរ នាយការិយាល័យកងរាជអាវុធហត្ថទទួលផែនការងារប្រឆាំងគ្រឿងញៀន ខេត្តព្រះសីហនុ និងកម្លាំងមានសមត្ថកិច្ចពាក់ព័ន្ធដោយមានការដឹកនាំសម្របសម្រួលពីលោក ពេញ ពិសិដ្ឋ ព្រះរាជអាជ្ញារងនៃអយ្យការអមសាលាដំបូងខេត្ត ក្នុងនោះសមត្ថកិច្ចដកហូតបានថ្នាំញៀននិងវត្ថុតាងពាក់ព័ន្ធមួយចំនួនទៀត៕
