By ក្រុមអ្នកជំនាញ និងវិស័យឯកជនថៃបានព្រមានពីការខាតបង់សេដ្ឋកិច្ចដ៏ធ្ងន់ធ្ងររាប់ពាន់លានបាត ដោយសារតែទឹកជំនន់ដ៏មហន្តរាយជាប្រវត្តិសាស្រ្ត ដែលកំពុងវាយប្រហារភាគខាងត្បូងនៃប្រទេសថៃ ដោយសម្លាប់មនុស្សរាប់សិបនាក់នៅទីនោះ។ នេះបើតាមការចុះផ្សាយរបស់កាសែតបាងកកប៉ុស្តិ៍។
មជ្ឈមណ្ឌលស្រាវជ្រាវ Kasikorn (K-Research) បានប៉ាន់ប្រមាណថា ទឹកជំនន់ ប្រសិនបើអូសបន្លាយរយៈពេល ១ ខែ អាចបង្កការខាតបង់ចំនួន ២៥ ប៊ីលានបាត ដោយសារការរំខានដល់សកម្មភាពសេដ្ឋកិច្ចក្នុងវិស័យសេវាកម្ម រួមទាំងសណ្ឋាគារ ភោជនីយដ្ឋាន លក់រាយ និងដឹកជញ្ជូន ក៏ដូចជាវិស័យកសិកម្ម និងកែច្នៃអាហារ ជាដើម។
ចំំណែកឯប្រធានសាកលវិទ្យាល័យសភាពាណិជ្ជកម្មថៃ លោក Thanavath Phonvichai ឯណោះ បានប៉ាន់ប្រមាណថា ការខាតបង់អាចមានចន្លោះពី ១-១,៥ ប៊ីលានបាត/ថ្ងៃ ដោយសារតែទឹកជំនន់ក្នុងតំបន់សេដ្ឋកិច្ច និងទេសចរណ៍នៅទូទាំងខេត្តភាគខាងត្បូងចំនួន ១០។ ប្រសិនបើទឹកជំនន់នៅតែបន្តរយៈពេលមួយខែ លោកបាននិយាយថា ការខាតបង់នឹងឡើងដល់ ១០-១៥ ប៊ីលានបាត។
ជាមួយគ្នានោះ ប្រធានសភាពាណិជ្ជកម្មខេត្តសុងក្លា ដែលជាខេត្តរងនូវជំនន់ដ៏ដំណំជាងគេ បាននិយាយថា ទឹកជំនន់នៅហាត់យ៉ៃ បានគ្របដណ្ដប់សន្លោះ ៨០-៩០% 80-90% នៃតំបន់ ខណៈវិស័យពាណិជ្ជកម្មរបស់ក្រុងនេះ ត្រូវពឹងផ្អែកលើការលក់រាយ និងលក់ដុំ ទេសចរណ៍ សណ្ឋាគារ និងភោជនីយដ្ឋាន។ លោកបានបន្តថា ខេត្តសុងក្លា មានផលិតផលក្នុងស្រុកសរុប (GDP) ប្រហែល ២៥០ ប៊ីលានបាត ដោយក្រុងហាត់យ៉ៃ រួមចំណែកប្រមាណ ៤០-៥០%។
អនុប្រធានសភាពាណិជ្ជកម្មថៃ និងជាប្រធានសភាពាណិជ្ជកម្មតំបន់ភាគខាងត្បូង លោក Salil Tohtubtiang បានមានលើកឡើងថា វាពិបាកក្នុងការវាយតម្លៃការខូចខាតសេដ្ឋកិច្ចពីទឹកជំនន់ ពីព្រោះវាកំពុងរីករាលដាលហួសពីក្រុងហាតយ៉ៃ និងខេត្តសុងក្លា រហូតដល់ខេត្តផាត់ថាឡុង សាទុន នគរស៊ីធម្មរ៉ាត ប៉ាតានី និងយ៉ាឡា។
ផលប៉ះពាល់សេដ្ឋកិច្ចគ្របដណ្តប់គ្រប់វិស័យ រួមទាំងវិស័យកសិកម្ម សេវាកម្ម សណ្ឋាគារ និងផលិតកម្ម។ រោងចក្រមួយចំនួនបានផ្អាកប្រតិបត្តិការ ដោយសារតែកម្មករមិនអាចធ្វើដំណើរបាន ហើយការដឹកជញ្ជូនវត្ថុធាតុដើមទៅរោងចក្រត្រូវបានកាត់ផ្ដាច់។
តាមការចុះផ្សាយរបស់ទីភ្នាក់ងារសារព័ត៌មានរ៉យទ័រកាលពីថ្ងៃពុធ គិតតែក្នុងខេត្តសុងក្លា រោងចក្រចំនួន ៧១៥ ត្រូវបានជន់លិច ដែលបណ្តាលឱ្យខូចខាតចំនួន ១,២៨ ប៊ីលានបាត ឬប្រមាណ ៣៩,៦ លានដុល្លារ ខណៈរោងចក្រដែលបន្តដំណើរការ កំពុងប្រឈមមុខនឹងកង្វះខាតវត្ថុធាតុដើម។
ប្រធានសមាគមភោជនីយដ្ឋានថៃ លោក Thaniwan Kulmongkol បាននិយាយថា ទឹកជំនន់នៅភាគខាងត្បូងប្រទេសថៃ ជាពិសេសនៅហាតយ៉ៃ បានជន់លិចភោជនីយដ្ឋានជាច្រើន ហើយការស្ដារឡើងវិញរំពឹងថានឹងចំណាយពេលច្រើនខែ។
ជាមួយគ្នានោះ ទឹកជំនន់បច្ចុប្បន្នបានកើតឡើងក្នុងរដូវខ្ពស់សម្រាប់វិស័យទេសចរណ៍ ដែលគំរាមកំហែងដល់ទំនុកចិត្តរបស់ភ្ញៀវទេសចរ។ បើតាមអាជ្ញាធរទេសចរណ៍ថៃ វិស័យទេសរណ៍ក្នុងតំបន់ ជាពិសេសខេត្តសុងក្លា ពឹងផ្អែកខ្លាំងលើភ្ញៀវទេសចរពីម៉ាឡេស៊ី ហើយទឹកជំនន់ បង្កឱ្យភ្ញៀវទេសចរពីម៉ាឡេស៊ីលុបចោលដំណើរកម្សាន្តរបស់ខ្លួនទាំងស្រុង។
ឥឡូវនេះ អ្នកជំំនាញ និងវិស័យឯកជនថៃ បានអំពាវនាវឱ្យរដ្ឋាភិបាលផ្តល់ជំនួយសង្គ្រោះសម្រាប់ទាំងប្រជាពលរដ្ឋ និងអាជីវកម្ម ដើម្បីឱ្យពួកគេស្ដារស្ថានភានសេដ្ឋកិច្ចឡើងវិញ៕
