By ខេត្តឧត្តរមានជ័យ – គ្រោះថ្នាក់អគ្គិភ័យបានបំផ្លាញស្រូវចំនួន ១១ ហិកតាកាលពីវេលាម៉ោង ១២:៣០ នាទីថ្ងៃត្រង់ ថ្ងៃទី២៧ ខែវិច្ឆិកា ឆ្នាំ២០២៥ នៅក្នុងភូមិឈើស្លាប់ ឃុំគោកខ្ពស់ ស្រុកបន្ទាយអម្ពិល ខេត្តឧត្តរមានជ័យ។
ប្រជាពលរដ្ឋម្ចាស់ស្រែបានឲ្យដឹងថា ដីស្រែរបស់ប្រជាពលរដ្ឋចំនួន ៥ គ្រួសារ ស្មើនឹងផ្ទៃដីទំហំ ១១ ហិកតា ស្ថិតនៅចំណុចត្រពាំងព្រីងតាណែម ខាងកើតអូរកប់សេះប្រហែល ២ គីឡូម៉ែត្រ ក្នុងភូមិឃុំខាងលើ។
ប្រជាពលរដ្ឋដដែលបានបញ្ជាក់ថា ក្នុងចំណោមផ្ទៃដីស្រែទំហំ ១១ ហិកតានោះ មានដីស្រែខ្លះបានច្រូតកាត់រួចរាល់មួយចំនួនហើយ តែមិនទាន់ដឹកជញ្ជូនស្រូវនិងដីស្រែខ្លះទៀតដោយមិនទាន់បានច្រូតកាត់នៅឡើយទេ។
អាជ្ញាធរបានឲ្យដឹងថា មុនពេលកើតហេតុ មានប្រជាពលរដ្ឋម្នាក់ឈ្មោះជុង រិទ្ធ ភេទប្រុស អាយុ ៤៥ ឆ្នាំ បានដុតគល់ឈើក្នុងដីស្រែរបស់ខ្លួន បន្ទាប់មកបានពន្លត់រួចហើយដែរ តែវានៅសេសសល់ខ្លះមិនទាន់រលត់អស់ ស្រាប់តែភ្លើងបានឆេះរាលដាលឡើងវិញ។
បន្ទាប់មកក៍មានការភ្ញាក់ផ្អើលដល់អ្នកភូមិ មានមនុស្សចូលរួមពន្លត់ចំនួន ៤៥ នាក់ (ស្រី ១៨ នាក់)ដែរ តែអកុសលដោយសារតែភ្លើងឆាបឆេះលឿនពេក ស្រូវក្នុងស្រែឆេះហ្មត់ដោយមិនអាចជួយសង្គ្រោះបានឡើយ៕
