By រាជធានីភ្នំពេញ – ក្រោយទឹកជំនន់វាយប្រហារយ៉ាងអាក្រក់បំផុតនៅទីក្រុងហាតយ៉ៃ និងតំបន់ខេត្តមួយចំនួននៅភាគខាងត្បូងប្រទេសថៃ ដែលបណ្តាលឲ្យមនុស្សជាង១០០នាក់បាត់បង់ជីវិត ការរិះគន់លើការគ្រប់គ្រងរបស់នាយករដ្ឋមន្ត្រីលោក អានុទីន ឆានវីរៈគុល ក៏បានផ្ទុះឡើងយ៉ាងខ្លាំង។
សារព័ត៌មានថៃ Khaosod English បានផ្សាយថា អតីតសមាជិកគណៈកម្មាធិការរៀបចំការបោះឆ្នោត លោក ស៊ុមឆៃ ស្រ៊ីស៊ុតធីយ៉ាខន បានចេញមុខរិះគន់លោកអានុទីនជាចំហ ដោយជំរុញឱ្យនាយករដ្ឋមន្ត្រីរូបនេះលាលែងពីតំណែង និងទទួលខុសត្រូវចំពោះការគ្រប់គ្រងមិនត្រឹមត្រូវនៃទឹកជំនន់ភាគខាងត្បូង។
លោក ស៊ុមឆៃ បានរិះគន់រដ្ឋាភិបាលរបស់លោក អានុទីន ចំពោះការផ្តល់អាទិភាពលើមុខមាត់នយោបាយ និងសំឡេងឆ្នោតលើការគ្រប់គ្រងទឹកជំនន់ឲ្យមានប្រសិទ្ធភាព។ លោកបានបញ្ជាក់ថា៖ «ការលាលែងពីតំណែង និងអនុញ្ញាតឱ្យសភាជ្រើសរើសនាយករដ្ឋមន្ត្រីថ្មី គឺជាការបង្ហាញអំពីការទទួលខុសត្រូវ និងទម្រង់ខ្ពស់បំផុតនៃសេចក្តីថ្លៃថ្នូរខាងនយោបាយ»។
អ្វីដែលលោក ស៊ុមឆៃ រិះគន់ខ្លាំងបំផុត គឺការពន្យារពេល ភាពច្របូកច្របល់ក្នុងបទបញ្ជា និងផ្តោតលើរូបភាពនយោបាយ ជាជាងការសង្គ្រោះបន្ទាន់។ ការគ្រប់គ្រងមិនត្រឹមត្រូវនេះបានរួមចំណែកដល់ការស្លាប់ជាងមួយរយនាក់។
