យុវជន ៤នាក់ត្រូវចាប់ខ្លួនក្រោយបង្ហោះម៉ូតូក្បែរព្រលានយន្តហោះតេជោ

ខេត្តកណ្ដាល÷កម្លាំងនគរបាលបានឃាត់ខ្លួនក្រុមយុវជន ៤នាក់ ដែលកំពុងបង្ហោះម៉ូតូតាមផ្លូវបេតុងក្បែរព្រលានយន្តហោះអន្តរជាតិតេជោ។ ហេតុការណ៍កើតឡើងនៅវេលាម៉ោង ២០:១០ ថ្ងៃទី២៧ វិច្ឆិកា ឆ្នាំ២០២៥ នៅលើផ្លូវបេតុងក្រវ៉ាត់ព្រលានយន្តហោះ។

ក្រុមយុវជនទាំង ៤នាក់រួមមាន៖ ជា ដេវិត (១៨ឆ្នាំ) រត់តុ, ហេង សំរ៉ុង (១៧ឆ្នាំ) កម្មកររោងចក្រ, ផូ ផាន់នី (១៧ឆ្នាំ) រត់តុ និង ទី សីហា (១៤ឆ្នាំ) កម្មករដែក។

សមត្ថកិច្ចបានចាប់យកម៉ូតូចំនួន ២គ្រឿង គឺ Honda dream C125 ពណ៌ខ្មៅ និង Suzuki nex រួមទាំងទូរស័ព្ទ ០៤គ្រឿង។ ក្រុមយុវជននេះបានបបួលគ្នាជិះម៉ូតូដើរលេងនៅព្រលានយន្តហោះ ហើយកំពុងបង្ហោះម៉ូតូបានចម្ងាយប្រហែល ២០ម៉ែត្រនៅពេលត្រូវឃាត់ខ្លួន។

តាមការសារភាព ពួកគេធ្លាប់បានបង្ហោះម៉ូតូនៅតាមផ្លូវបេតុងក្នុងព្រលានអន្តរជាតិតេជោម្តងរួចមកហើយ។ បច្ចុប្បន្នក្រុមយុវជនទាំងនេះកំពុងឃាត់ខ្លួននៅអធិការដ្ឋាននគរបាលស្រុកកណ្ដាលស្ទឹង ដើម្បីសុំការអនុញ្ញាតអប់រំ និងប្រគល់ឲ្យអាណាព្យាបាលអប់រំបន្ត។