ចិនសម្ដែងការព្រួយបារម្ភខ្លាំងចំពោះកិច្ចព្រមព្រៀងពាណិជ្ជកម្មម៉ាឡេស៊ី-អាមេរិក

ចិនបានសម្តែងការព្រួយបារម្ភយ៉ាងខ្លាំងទាក់ទងនឹងខ្លឹមសារមួយចំនួននៃ «កិច្ចព្រមព្រៀងស្តីពីពាណិជ្ជកម្មបដិការ» រវាងម៉ាឡេស៊ី និងសហរដ្ឋអាមេរិក ហើយបានអំពាវនាវឱ្យម៉ាឡេស៊ីធ្វើសកម្មភាពដើម្បីផលប្រយោជន៍រយៈពេលវែងរបស់ខ្លួន។

អ្នកនាំពាក្យក្រសួងពាណិជ្ជកម្មចិនបាននិយាយថា ចិនស្វាគមន៍ចំពោះកិច្ចខិតខំប្រឹងប្រែងរបស់ម៉ាឡេស៊ីក្នុងការដោះស្រាយភាពខុសគ្នាជាមួយប្រទេសដទៃទៀត តាមរយៈការចុះហត្ថលេខាលើកិច្ចព្រមព្រៀងពាណិជ្ជកម្ម។ យ៉ាងណាមិញ «កិច្ចព្រមព្រៀងបែបនេះ មិនគួរប៉ះពាល់ជាអវិជ្ជមានដល់ការអភិវឌ្ឍពាណិជ្ជកម្មសកល និងកិច្ចសហប្រតិបត្តិការក្នុងតំបន់នោះទេ ហើយក៏មិនគួរប៉ះពាល់ដល់ផលប្រយោជន៍របស់ប្រទេសចិនដែរ»។

មន្ត្រីក្រសួងពាណិជ្ជកម្មចិន និងក្រសួងវិនិយោគ ពាណិជ្ជកម្ម និងឧស្សាហកម្មម៉ាឡេស៊ី បានជួបពិភាក្សាគ្នានៅទីក្រុងប៉េកាំងកាលពីថ្ងៃអង្គារ ទាក់ទងនឹងបញ្ហាកិច្ចព្រមព្រៀងពាណិជ្ជកម្មបដិការរវាងម៉ាឡេស៊ី និងសហរដ្ឋអាមេរិក។ ភាគីម៉ាឡេស៊ីបានផ្តល់ការពន្យល់ និងការបំភ្លឺលើកង្វល់នីមួយៗដែលចិនបានលើកឡើង ហើយបានបញ្ជាក់ថា ម៉ាឡេស៊ីឱ្យតម្លៃចំពោះភាពជាដៃគូរយៈពេលវែងជាមួយចិន។

រដ្ឋាភិបាលម៉ាឡេស៊ីមិនទាន់បកស្រាយយ៉ាងណាទេជុំវិញបញ្ហានេះ។ គួររំឭកថា ម៉ាឡេស៊ី និងសហរដ្ឋអាមេរិកបានចុះហត្ថលេខាកិច្ចព្រមព្រៀងពាណិជ្ជកម្មបដិការកាលពីចុងខែមុន នៅពេលលោកប្រធានាធិបតី ដូណាល់ ត្រាំ ធ្វើដំណើរទស្សនកិច្ចទៅម៉ាឡេស៊ី។

ខ្លឹមសារនៃកិច្ចព្រមព្រៀងនោះ រាប់បញ្ជូលទាំងភាសាដែលលើកទឹកចិត្តឱ្យម៉ាឡេស៊ីដើរតាមសហរដ្ឋអាមេរិកលើបញ្ហាសន្តិសុខជាតិ រួមទាំងការគ្រប់គ្រងការនាំចេញ ការត្រួតពិនិត្យការវិនិយោគ និងទណ្ឌកម្ម។ វាគឺជាថ្នូររបស់សហរដ្ឋអាមេរិក ក្នុងការទម្លាក់ពន្ធខ្ពស់លើម៉ាឡេស៊ីមកត្រឹម ១៩%។

ការព្រមព្រៀងដដែល បានបង្កការរិះគន់ខ្លាំងៗក្នុងស្រុកម៉ាឡេស៊ី ថាវាធ្វើឱ្យប្រទេសបាត់បង់ភាពជាម្ចាស់ការលើបញ្ហាសេដ្ឋកិច្ចរបស់ខ្លួន។ ការសម្ដែងក្ដីបារម្ភចំពោះម៉ាឡេស៊ី គឺជាលើកដំបូងហើយ ដែលចិនធ្វើដាក់ប្រទេសជាក់លាក់ជុំវិញបញ្ហានេះ។