អ៊ែបឺសប្រកាសឱ្យធ្វើបច្ចុប្បន្នភាពសូហ្វវែយន្តហោះ A320 ជិត 6,000 គ្រឿង

ទីក្រុងប៉ារីស៖ ក្រុមហ៊ុនផលិតយន្តហោះអ៊ែបឺស (Airbus) បានប្រកាសឱ្យក្រុមហ៊ុនអាកាសចរណ៍ទាំងអស់ដែលកំពុងប្រើប្រាស់យន្តហោះស៊េរី A320 ចំនួនជិត 6,000 គ្រឿង ធ្វើបច្ចុប្បន្នភាពសូហ្វវែជាបន្ទាន់។

ការប្រកាសនេះបន្ទាប់ពីមានបញ្ហាមិនប្រក្រតីកើតឡើងចំពោះយន្តហោះមួយគ្រឿងរបស់ក្រុមហ៊ុនចិតប៊្លូ (JetBlue) ដែលត្រូវចុះចតជាបន្ទាន់នៅរដ្ឋផ្លរីដា។

ក្រុមហ៊ុនអ៊ែបឺសបានវិភាគឃើញថា បញ្ហាបណ្ដាលមកពីយន្តហោះទទួលរងកាំរស្មីព្រះអាទិត្យខ្លាំងពេក ដែលធ្វើឱ្យខូចទិន្នន័យសូហ្វវែសម្រាប់គ្រប់គ្រងការហោះហើរ។

ភ្នាក់ងារសុវត្ថិភាពអាកាសចរណ៍អឺរ៉ុបបានចេញបទបញ្ជាតម្រូវឱ្យក្រុមហ៊ុនអាកាសចរណ៍ដែលប្រើប្រាស់យន្តហោះ A320 ប្រញាប់ដោះស្រាយបញ្ហានេះ។ ការជួសជុលសូហ្វវែត្រូវការពេលប្រហែល 2 ម៉ោង។

ក្រុមហ៊ុនអាមេរិកាំងអ៊ែឡាញមានយន្តហោះ A320 ចំនួន 480 គ្រឿង ដែលក្នុងនោះ 209 គ្រឿងរងផលប៉ះពាល់។ ការជួសជុលនេះអាចប៉ះពាល់រយៈពេលខ្លីទៅលើតារាងធ្វើដំណើរ។