By ខេត្តបន្ទាយមានជ័យ៖ អាជ្ញាធរបានបិទទ្វារឃ្លាំង២កន្លែង ក្រោយរកឃើញសាច់បង្កកខុសច្បាប់ទម្ងន់២៨០គីឡូក្រាម នៅក្រុងប៉ោយប៉ែត។
លោក ហ៊ុយ ទូច ប្រធានការិយាល័យផលិតកម្ម និងបសុព្យាបាលខេត្តបន្ទាយមានជ័យ បានប្រាប់ថា មន្ត្រីជំនាញបានស្រាវជ្រាវ និងកំណត់មុខសញ្ញា ហើយមន្ត្រីចម្រុះចុះពិនិត្យឃ្លាំង២កន្លែង ដោយរកឃើញសាច់បង្កកត្រូវបានរឹបអូសមានទម្ងន់២៨០គីឡូក្រាមរួមមាន៖ ទាមូល មាន់មូល ចុងស្លាបមាន់ គល់ស្លាបមាន់ ភ្លៅមាន់ ស្លាបកណ្តាលមាន់ និងប្រហិតសាច់ជ្រូក។
លោកបានបញ្ជាក់ថា សាច់បង្កក៦ប្រភេទ ទម្ងន់២៨០គីឡូក្រាម ជាសាច់ចម្រុះគ្មានច្បាប់ត្រឹមត្រូវ និងគ្មានគុណភាពស្តង់ដាតាមលក្ខណៈបច្ចេកទេស ហើយមានក្លិនស្អុយ ទើបអាជ្ញាធរសុំគោលការណ៍ដកហូតយកទៅដុតកម្ទេចចោល និងកាយកប់តាមបច្ចេកទេស។
លោក ឃ្លោក នួយ អភិបាលរងខេត្តបន្ទាយមានជ័យបានបញ្ជាក់ថា ក្រោយសាកសួរម្ចាស់ឃ្លាំងស្តប់សាច់បង្កក២កន្លែងបានប្រាប់ថា ទំនិញនេះគាត់ទិញមកពីរាជធានីភ្នំពេញគ្មានច្បាប់ឡើយ ហើយយកដាក់ឃ្លាំងស្តុកលក់ និងចែកចាយតាមខេត្តជាប់ជាយដែន។
សាច់ខុសច្បាប់ទាំងនេះត្រូវបានកម្លាំងជំនាញរឹបអូសយកទៅដុតចោលហើយបិទទ្វារឃ្លាំងទាំង២កន្លែង ព្រោះគ្មានច្បាប់ ហើយយកសំណាកទៅប៉ាស្ទ័រដើម្បីរកសារធាតុគីមី និងស្រាវជ្រាវរកបន្តទៀត។
