ចាប់ខ្លួន៨នាក់ទៀតពាក់ព័ន្ធអគ្គិភ័យហុងកុង អ្នកស្លាប់កើនដល់១២៨នាក់

តាមការផ្សាយពី BBC នាថ្ងៃ២៩ ខែវិច្ឆិកា ស្ថាប័នប្រឆាំងអំពើពុករលួយ (ICAC) ហុងកុងបានចាប់ជនសង្ស័យ៨នាក់បន្ថែមទៀត ពាក់ព័ន្ធនឹងអគ្គីភ័យដ៏អាក្រក់ដែលឆាបឆេះអគារផ្ទះល្វែងខ្ពស់មួយ ដោយសម្លាប់មនុស្សយ៉ាងហោចណាស់ ១២៨នាក់ និង២០០នាក់ទៀតនៅតែបាត់ខ្លួន។

អាជ្ញាធរបាននិយាយថា ពួកគេបានបញ្ចប់ប្រតិបត្តិការជួយសង្គ្រោះនៅអគារ Wang Fuk ក្នុងសង្កាត់ភាគខាងជើងនៃទីក្រុង Tai Po ប៉ុន្តែបានព្រមានថា ចំនួនអ្នកស្លាប់អាចនឹងកើនឡើងបន្ថែមទៀត។ សាកសពចំនួន ៨៩ នាក់មិនទាន់ត្រូវបានកំណត់អត្តសញ្ញាណនៅឡើយទេ ហើយសាកសពចំនួន ១៦នាក់នៅតែស្ថិតនៅក្នុងអគារ។

គណៈកម្មការឯករាជ្យប្រឆាំងអំពើពុករលួយក៏បានបង្កើតក្រុមការងារមួយដើម្បីស៊ើបអង្កេតអំពើពុករលួយ ដែលអាចកើតមាននៅក្នុងគម្រោងជួសជុលអគារនេះ។ លោកស្រី Eileen Chung អធិការប៉ូលិសហុងកុងនិយាយថា ភាគីទទួលខុសត្រូវរបស់ក្រុមហ៊ុនមានការធ្វេសប្រហែសយ៉ាងខ្លាំង។